Անդրիաս Ղուկասյանի փաստաբանն ու հարազատներն ահազանգում են
Ազգային ժողովում Գլխավոր դատախազության նախորդ տարվա գործունեության հաշվետվության ներկայացման ժամանակ Ելք խմբակցության ղեկավար Նիկոլ Փաշինյանը նշեց, որ իրենք Անդրիաս Ղուկասյանի համար պատրաստ էին նաև անձնական երաշխավորությամբ հանդես գալ, բայց իրենց միջնորդությունը մերժվել է։ «Կարծում եմ՝ այստեղ հաշվեհարդարային դրսևորումների հետ գործ ունենք և նրա՝ կալանքի տակ գտնվելն այդքան էլ կապված չէ այս քրեական գործի հետ։ Հիմա էլ նրա փաստաբանն ու հարազատներն ահազանգում են, որ վկաներ կան, որոնք կարող են հերքել նախաքննության մեղադրանքները և նախաքննության մարմինը հրաժարվում է այդ մարդկանց հարցաքննել՝ որպես վկա»,-ասաց Փաշինյանը։ Գլխավոր դատախազ Արթուր Դավթյանն ի պատասխան ասաց, որ պատգամավորների դիմումին պատասխանել են և դրանում նշել, որ համապատասխան քրեական գործով ձեռք բերված փաստական տվյալները, Անդրիաս Ղուկասյանին մեղսագրվող արարքներն ու դրանց կատարման հանգամանքներն այնպիսին են, որ անձնական երաշխավորությունը հնարավորություն չի տալիս երաշխավորել, որ կապահովվի նրա պատշաճ վարքագիծը:
Հետևեք մեզ Viber-ում
