Տեռոր՝ խոստման փոխարեն

Ձերբակալվել է «Ազգային անվտանգություն» կուսակցության նախագահ Գառնիկ Իսագուլյանը: Քննչական կոմիտեի հաղորդագրության համաձայն՝ ՔԿ հատկապես կարևոր գործերի քննության գլխավոր վարչությունում իրականացվել են քննչական և դատավարական այլ ծավալուն գործողություններ՝ Ազգային անվտանգության ծառայության քննչական դեպարտամենտում Քրեական օրենսգրքի 333-րդ հոդվածի 2-րդ մասի 1-ին կետով («սուտ մատնություն, որը զուգորդվել է ծանր կամ առանձնապես ծանր հանցագործության մեջ մեղադրելով») «Ազգային անվտանգություն» կուսակցության նախագահ Գ.Ի.-ի նկատմամբ հարուցված քրեական գործի նախաքննության շրջանակներում մի շարք հանգամանքներ պարզելու ուղղությամբ»:

«Փաստական տվյալներ են ձեռք բերվել այն մասին, որ 2021 թվականի սեպտեմբերի 20-ին կայացած ասուլիսի ընթացքում Գ.Ի.-ն, գիտակցելով, որ իր կողմից տրամադրվող տեղեկատվությունը կեղծ է՝ հայտնել է չկատարված հանցագործության մասին։
Մասնավորապես, հարցազրույցի ընթացքում Գ.Ի.-ն հայտնել է, թե, իբր Ուկրաինայում Հայաստանի Հանրապետության արտակարգ և լիազոր դեսպանը ուսումնասիրվել ու հավաքագրվել է թուրքական և ադրբեջանական հատուկ ծառայությունների կողմից, ինչպես նաև 2008 թվականից հետո համագործակցում է հիշյալ ծառայությունների և տվյալ ազգերի ներկայացուցիչների հետ, որի վերաբերյալ ինքը՝ Գ.Ի.-ն կասկածներ չունի։ Ըստ Գ.Ի.-ի հայտարարության Ուկրաինայում Հայաստանի Հանրապետության արտակարգ և լիազոր դեսպանը բանակցություններ է վարել Ուկրաինայում Ադրբեջանի դեսպանի հետ, որի արդյունքում որոշվել է, որ Հայաստանի Հանրապետության վարչապետը Բաթումի քաղաքում պետք է հանդիպի Թուրքիայի նախագահի ներկայացուցիչների հետ, որպեսզի վերջինից գումար խնդրի, քանի որ ՀՀ բյուջեում գումարը վերջացել է և չեն կարողանում թոշակները վճարել. այդ կերպ՝ հայ դիվանագետին հանիրավի մեղադրելով առանձնապես ծանր հանցագործություն կատարելու մեջ», - ասված է հաղորդագրությունում։

ՔԿ-ն հաղորդում է նաեւ, թե իբր Իսագուլյանը մեղադրվում է նույնական և համասեռ՝ ՀՀ Վարչապետի, նախկին և ներկա մի շարք պաշտոնատար անձանց ու հասարական գործիչների մասնավոապս, ՀՀ քննչական կոմիտեի ներկայիս նախագահ Արգիշտի Քյարամյանի, Արցախի Հանրապետության անվտանգության խորհրդի նախկին քարտուղար Սամվել Բաբայանի իբր վերաբերյալ սուտ մատնություն կատարելու, ինչպես նաև ՀՀ Վարչապետի նկատմամբ բռնություն գործադրելու հրապարակային կոչեր հնչեցնելու համար:
Գաղնիք չէ, որ Գառնիկ Իսագուլյանը Նիկոլ Փաշինյանի իշխանության ամենահուժկու քննադատներից մեկն է, նա իր եւ ուրիշների եթերներում ամենադաժան քննադատությունն է ուղղում իշխող վարչակարգի հասցեին եւ ակնհայտ է, որ նրա ձերբակալությունը մեկ նպատակ է հետապնդում՝ ընդդիմադիր գործչին լռեցնելու: Նիկոլ Փաշինյանն այլեւս սահուն քայլերով գնում է բռնապետություն եւ թուրքերի հետ խաղաղության դարաշրջանը կյանքի կոչելուց առաջ որոշել է ռեպրեսիաների միջոցով մթնոլորտը իներտացնել, լռեցնել քննադատներին, վախեցնել ընդդիմախոսների, ընդհանուր առմամբ վախի մթնոլորտ ստեղծել, որը հնարավորություն կտա կյանքի կոչել իր հայրենադավ ծրագրերը: Վարչակարգը իրեն նեղություն չի տալիս՝ նոր գործիքներ կիրառելու, գործի են դրվել հին, մաշված քրեաիրավական մեթոդները: Մի քանի օր է՝ ընդդիմադիր հայացքներ ունեցողներին են բերման ենթարկում, ձերբակալում եւ կալանավորում: Սեյրան Օհանյանին ու կնոջը դատախազություն հրավիրեցին, Նարեկ Սամսոնյանին ու Նարեկ Մանթաշյանին կալանավորեցին,ապա ազատ արձակեցին, Արթուր Վանեցյանին հրավիրեցին հարցաքննության, Մամիկոն Ասլանյանին, Վարդենիկի ընդդիմադիր թեկնածուին ձերբակալեցին: Սա այսբերգի միայն երեւացող մասն է: Մամուլն ամեն օր ահազանգում է, որ տրցակներով գործեր են կարվում ՏԻՄ ոլորտում մանր, միջին պաշտոնյաների նկատմամբ: Երկրում բռնատիրական կարգեր են, կալանավորվում են համացանցում վիրավորական քոմենթ գրողները, անհնազանդ տնօրենները, անգամ թիմակիցներին չի խնայում եւ առայժմ պաշտոնանկությամբ է բավարարվում: Փաշինյանը, որ պատրաստ էր խաղաղ եւ արագ հեռանալ, երբ ժողովուրդը կպահանջեր իր հեռացումը, հիմա անգամ մի քննադատություն չի հանդուրժում եւ հաշվեհարդար է տեսնում քաղաքական ընդդիմադիրների եւ ընդդիմախոսների նկատմամբ:

Անի Սահակյան