Ձախողված առեւտուր. ով ում «քցեց»

Փարաքար խոշորացված համայնքում նորընտիր ավագանու առաջին նիստն էր: Ինչպես ամենուր, Նիկոլ Փաշինյանը իր թիմով որոշել է նվաճել նաեւ այս համայնքը՝ չնայած այն բանի, որ դեկտեմբերի 5-ի ընտրությունների արդյունքներով Քաղպայմանագիրը այստեղ հաղթանակ չի տարել, նույնիսկ առաջաատարը չէ:
ՏԻՄ ընտրություններին մասնակից երեք ուժերից ամենաշատ ձայնը հավաքել է՝ «Ապրելու երկիր» կուսակցությունը, որը ստացել է 48,94 տոկոս ձայն, երկրորդը «Քաղաքացիական պայմանագիր» կուսակցությունն է՝ 27,54 տոկոս ձայնով և երրորդը՝ «Դավիթ Մինասյան» դաշինքը՝ 23,51 տոկոս ձայնով:

Ավագանու առաջին նիստը անցավ բավականին արտասովոր եւ դրամատիկ վիճակում: Նիստը ցուցադրվում էր ուղիղ հեռարձակմամբ: Համայնքի ղեկավարի թեկնածու առաջադրեցին միաժամանակ եւ Ապրելու երկիր կուսակցությունը եւ Դավիթ Մինասյան դաշինքը: Սակայն նիստը վարողը հրաժարվեց գրանցել վերջինի թեկնածուն՝ պատճառաբանելով, որ գրավոր դիմումով պետք է ներկայացվեր: Այսպես մի քանի անգամ նիստն ընդմիջվեց, Դավիթ Մինասյան դաշինքի ավագանու անդամները ընդմիջում էին վերցնում, որ իրավիճակը փորձեին շտկել: Մի քանի ժամ տեւած նիստի հեռարձակումն ավարտվեց, ապա Ապրելու երկիր կուսակցությունը հայտարարություն տարածեց, որ իր թեկնածուն ընտրվել է Փարաքար համայնքի ղեկավար, դրանից հետո Դավիթ Մինասյան դաշինքի անդամները ուղիղ հեռարձակմամբ ցուցադրեցին, որ նիստ է ընթանում եւ Քաղպայմանագրի հետ ընտրում են համայնքի ղեկավար: Քվեարկության արդյունքներն ամփոփվելուց հետո հայտարարվեց, որ Դավիթ Մինասյանը ստանալով 11 ձայն ընտրվել է համայնքի ղեկավար:

Նշենք, որ Փարաքարում մանդատները բաշխվելու են հետևյալ կերպ՝ «Ապրելու երկիր»-ն ունենալու է 10 մանդատ, «Քաղաքացիական պայմանագիր»-ը՝ 6, «Դավիթ Մինասյան» դաշինքը՝ 5:
Այսպիսով կարելի է հասկանալ, որ Փարաքարում ՔՊ-ն խարդախությամբ որոշեց տիրանալ համայնքի ղեկավարի պաշտոնին՝ առանց գրանցելու իր թեկնածուին, առանձին քվեարկություն կազմակերպեց՝ իհարկե, դա արեց այլ թեկնածուի դեմքով, որպեսզի շատ քննադատության չարժանանա:
Իսկ մինչ այդ մամուլում լուրեր էին պտտվում, որ ՔՊ-ի ու Ապրելու երկրի միջեւ են բանակցություններ ընթանում, իշխանությունն ակնկալում էր Վանաձորում ԱԵ-ի աջակցությունը, որի դիմաց խոստացել էր Փարաքարը հանձնել Ապրելու երկիր կուսակցությանը: Հավանաբար առեւտուրը չի կայացել եւ իշխանությունը սովորության համաձայն որոշել է նվաճել համայնքի ղեկավարի պաշտոնը՝ չունենալով առաջնային մանդատ:

Անի Սահակյան