Ով է ում ընդդիմությունը

Ազգային ժողովում ընդդիմություն հռչակված Ծառուկյան դաշինքը հերթական փորձությունը ձախողեց եւ մեկ անգամ եւս կասկածի տակ դրեց  ընդդիմադիր կարգավիճակը։ ԱԺ արտահերթ նիստում քվեարկության դրվեց նախորդ տարվա պետական բյուջեի կատարողականի հաշվետվությունը: Մինչ այդ ամփոփիչ ելույթով հանդես եկավ ՀՀ Ֆինանսների նախարար Վարդան Արամյանը: Քվեարկությունից առաջ վարման կարգով ելույթ ունեցավ ԵԼՔ խմբակցության ղեկավար Նիկոլ Փաշինյանը: Նա հայտարարեց, որ իրենց խմբակցությունը դեմ է 2016 թվականի պետական բյուջեի կատարման հաշվետվությանը: «Կարծում եմ ճիշտ կլիներ, որ ընդդիմությունը չքվեարկեր, քանի որ խորհդարանական մեծամասնության քվեարկության դեպքում այն չի անցնի: Առաջարկում ենք չմասնակցել քվեարկությանը, որպեսզի դեմը հաստատվի նաեւ դե յուրե»,- ասաց Փաշինյանը: Այսօր ԱԺ ՀՀԿ խմբակցության պատգամավորներից շատերը բացակա էին, շատերը գործուղումների էին։ Վարման կարգով խոսեց նաեւ Ծառուկյան դաշինք խմբակցության քարտուղար Վահե Էնֆիաջյանը: Նա հայտարարեց, որ խմբակցությունում հարցը քննարկել են, եւ 2016 թվականին տեղի ունեցածն արդեն իսկ իրականություն է: «Մեր դիրքորոշումը չի փոխվել, մենք դեմ ենք եւ չքվեարկելու հիմք չենք տեսնում»,- հայտարարեց Էնֆիաջյանը: ԱԺ նախագահ Արա Բաբլոյանն էլ տեղեկացրեց, որ ՀՀԿ խմբակցության պատգամավոր Մարգարիտ Եսայանը գործուղման է, սակայն գրավոր տեղեկացրել է, որ կողմ է կատարման հաշվետվությանը: Արդյունքում կողմ քվեարկեց 52 պատգամավոր, դեմ էր 22-ը, իսկ եւս մեկ պատգամավոր ձեռնպահ մնաց: Ի դեպ, քվեարկությունից հետո արդարանում էին ոչ միայն Ծառուկյան դաշինքի ներկայացուցիչները, այլեւ նրանց աջակցում էին ՀՀԿ-ական պատգամավորները։ ԱԺ փոխնախագահ, ՀՀԿ խոսնակ Էդուարդ Շարմազանովը կառավարության 2016թ. բյուջեի կատարողականի հաստատումից հետո լրագրողներին վստահեցրեց, որ, անկախ «Ծառուկյան» դաշինքի քվեարկությունից, ՀՀԿ-ի և ՀՅԴ-ի պատգամավորների ձայները բավարար էին բյուջեի կատարողականը հաստատելու համար: «Մեր պատգամավորների թիվը բավարար էր, առավել ևս` մեկ ձայնով էլ ավելի էր»,- ասաց նա: Չգիտես ինչ հաշվարկով՝ Շարմազանովը նշեց, որ ՀՀԿ-ն և ՀՅԴ-ն 54 ձայն ապահովել են, և բացատրեց, որ 53 կողմ է գրանցվել, իսկ ՀՀԿ-ական Վահան Հարությունյանի «կողմ» քվեարկությունը չի արձանագրվել տեխնիկական պատճառներով, քանի որ կոճակը չի աշխատել, բայց դահլիճում հայտարարվել է, որ նա ներկա է և կողմ է քվեարկել: Բացի դրանից՝ Շարմազանովը նշեց, որ ՀՀԿ-ական պատգամավոր Մարգարիտ Եսայանն էլ գործուղման էր և գրավոր հայտնել էր, որ կողմ է քվեարկելու: «Ուստի ընդդիմադիրների մտահոգությունը, որ եթե «Ծառուկյան» դաշինքը չմասնակցեր, բյուջեի կատարողականը չէր անցնի, իրականության հետ որևէ աղերս չունի»,- ասաց նա և ընդգծեց, որ որևէ մեկը ուրիշի փոխարեն չի քվեարկել: Սակայն ԱԺ պաշտոնական կայքում ցուցանիշներն այլ են, որի մասին վերեւում նշել ենք։ Դե ինչ ստացվում է, որ Ծառուկյան դաշինքը հերթական անգամ ապացուցեց իր կեղծ ընդդիմադիր կարգավիճակը, իսկ Ելք-ն էլ առիթը բաց չթողեց դիվիդենտներ շահելու, հատկապես որ իրենց հասցեին էլ իշխանության հետ համագործակցելու մեղադրանքների պակաս չի զգացվում։ Անի Սահակյան