Մենք բոլորս ուսապարկ ենք․ Նիկոլ Փաշինյանի և Երևանի ավագանու վերահաստատումը

Պաշտոնապես հաստատվեց, որ ավագանու Իմ քայլը խմբակցությունը Երևանի քաղաքապետի պաշտոնում կառաջադրի Հայկ Մարությանի առաջին տեղակալ
Հրաչյա Սարգսյանի թեկնածությունը:
Հայկ Մարությանին անվստահություն հայտնելու գործընթացը Նիկոլ Փաշինյանի ավագանու թիմակիցները, որոնք այս դեպքում իրենց դրսևորել են որպես իսկական ուսապարկեր, հիմնավորել են այն հանգամանքով, որ Հայկ Մարությանը քաղաքապետ է ընտրվել 2018 թվականի հեղափոխական մանդատի արդյունքում։
<< Հայկ Մարությանը, որը վերոնշյալ ընտրություններին մասնակցել էր որպես ՔՊ կուսակցության թեկնածու և «Իմ քայլը» դաշինքի ընտրական ցուցակի առաջին համար, 2020 թվականի դեկտեմբերին, իր դիմումի համաձայն, լքել է ՔՊ կուսակցությունը և «Իմ քայլը» դաշինքը և դրանից հետո ծավալված ու Հայաստանի ժողովրդավարության համար որոշիչ քաղաքական իրադարձությունների ժամանակ իր գործողություններով վերահաստատել է իր՝ ՔՊ կուսակցության և «Իմ քայլը» դաշինքի հետ որևէ քաղաքական պատասխանատվություն չկիսելու որոշումը;
Հայկ Մարությանը բավարար արդյունավետությամբ չի իրականացրել և չի իրականացնում «Իմ քայլը» դաշինքի՝ Երևանի քաղաքացիների առաջ ստանձնած և նախընտրական ծրագրով ամրագրված պարտավորությունները; Հայկ Մարությանը բավարար չափով չի իրականացրել և չի իրականացնում Երևանի քաղաքապետարանից համակարգային կոռուպցիայի վերացման կարևորագույն առաքելությունը;
Դաշինքը երևանցիների առաջ ստանձնած իր պարտավորությունները և մանդատը չի կարող իրագործել մի իրավիճակում, երբ քաղաքապետը խզել է կապը ավագանու քաղաքական մեծամասնության՝ «Իմ քայլը» դաշինքի հետ:
Հայկ Մարությանին շնորհակալություն ենք հայտնում համատեղ աշխատանքի համար և հաջողություն ենք մաղթում նրան իր նոր քաղաքական հանգրվանում»,- նշված է ավագանու իշխող խմբակցության տարածած հայտարարություն մեջ։
Ընդ որում այս սուպերուսապարկային հայտարարությունը հրապարկվեց ավագանու անդամների հետ Նիկոլ Փաշինյանի հանդիպումից անմիջապես հետո։
Վատ աշխատելու մասին պնդումները ծիծաղելի են, ոչ թե այն պատճառով, որ ճիշտ են կամ սխալ, այլ այն պարզ պատճառով, որ Փաշինյանի կառավարությունը ծայրից ծայր շատ վատ է աշխատում։ Եթե մյուսներին դրա համար պաշտոնից չեն ազատում, ինչո՞ւ են ազատում Հայկ Մարությանին, այն էլ հիմա, երբ նա որոշակի արդյունքներ ցույց է տվել։ Ինչ վերաբերում է կոռուպցիային, ապա դա վերացական պնդում է, որը միշտ կարելի է շահարկել՝ առանց փաստարկման։
Ավագանին պաշտոնապես ընդունեց, որ իրենք եղել և մնում են Նիկոլի ուսապարկերը․ առանց այդ կարգավիճակի՝ երևանցիները նրանց ոչ մի ձայն չէին տա։ Ընդունելով հանդերձ, որ սա բացարձակ ճշմարտություն է, պետք է ընդամենը տարակուսել՝ այս հայտարարության տակ ստորագրություն դրած ավագանու անդամները համաձա՞յն են, որ իրենք ևս չեն ստացել երևանցու քվեն, քանի որ այդ քվեն, ինչպես Հայկ Մարությանի, այնպես էլ իրենց դեպքում եղել է հեղափոխական մանդատի արդյունք։
2018 թվականի հեղփոխական մանդատն այսօր այլևս չկա, և դա որպես իրողություն ընդունել է նաև ինքը՝ Նիկոլ Փաշինյանը՝ 2021 թվականի ամռանը գնալով ԱԺ արտահերթ ընտրությունների։ Հեղափոխական մանդատի չգոյությունը փաստարկվել է նաև վերջին ՏԻՄ ընտրությունների ժամանակ, որոնցում ՔՊ-ն  պարտություն է կրել ։ Հետևաբար, եթե այլևս հեղափոխական մանդատ ասվածը չկա, ապա պետք է ոչ թե հեռացնել Հայկ Մարությանին, այլ ցրել Երևանի ավագանին և գնալ արտահերթ ընտրության։ Թող երևանիցին ինքը որոշի՝ ում է ուզում տեսնել ավագանու և Երևանի քաղաքապետի պաշտոնում ։
Հայկ Դավթյան

Հ․Գ․ Եթե Հայկ Մարությանի մեղքն այն է, որ նա այլևս քաղաքական թիմի անդամ չէ, ապա հարց է առաջանում՝ ի՞նչ կապ ունի ՔՊ-ի հետ առաջին փոխքաղաքապետ Հրաչյա Սարգսյանը, որին որպես քաղաքապետ առաջադրել է ՔՊ-ն։ Նա եղել է Մեսրոպ Առաքելյանի <<Առաքելություն>> կուսակցության անդամ և Երևանի ավագանու անդամ է դարձել այդ կուսակցության և ՔՊ-ի համագործակցության քվոտայով։ Ի դեպ, Մեսրոպ Առաքելյանը ներողություն է խնդրել երևանցիներից՝ Հրաչյա Սարգասյանի համար։ <<Ներողություն եմ խնդրում, որ մեր սիրելի քաղաքը շուտով ղեկավարելու է անդեմ ու անմեղսունակ մի անձնավորություն, ում աշխատանքային և քաղաքական կարիերայում ունեցել եմ բացառիկ ներդրում։ Ցավում եմ, որ այս դժվարին ժամանակներում երևանցիներին սպասվում է ևս մեկ անխուսափելի և երաշխավորված հիասթափություն։
Պատերազմից հետո վարչապետի հրաժարականը պնդող, սակայն իր պաշտոնը դրանից վեր դասող սույն անձնավորությունը Երևանի կառավարումը վերածելու է այնպիսի քաոսի, որ երանի եք տալու նախորդ, ու դրանից էլ նախորդ բոլոր քաղաքապետերին>>,- գրելէ Առաքելյանը։