Փաշինյանն ակտիվացրել է կրիմինալը.ով է հաջորդ «զոհը»

Ի հեճուկս իշխանականների հայտարարությունների՝ դեկտեմբերի 5-ին կայացած ՏԻՄ ընտրությունների արդյունքները մեծամասամբ գոհացուցիչ չէին գործող իշխանությունների համար։ Մի քանի խոշոր համայնքներում իշխանությունն ուղղակի խայտառակ պարտություն կրեց, որոշ համայնքներում էլ անգամ եթե բոլոր մասնակիցներից շատ ձայներ հավաքեց, այնուամենայնիվ, մեծամասնություն ապահովել ու համայնքային իշխանություն ձևավորել չի հաջողվում։ Իշխանական ուժը լիարժեք հաղթանակ է տարել ընդամենը մի քանի համայնքում, այն էլ՝ երբ գրեթե մրցակցություն չի եղել:
Ստեղծված վիճակը գրեթե ամենօրյա ռեժիմով «ռազբորկաների» պատճառ է դարձել ՔՊ կենտրոնական գրասենյակում ու տարածքային կառույցներում:
Ամենաբարձր մակարդակով հրահանգ է իջել կառույցներին, ճնշումներով կլինի, սպառնալիքներով, թե այլ ճանապարհներով այն համայնքներում, որտեղ ՔՊ-ն չի հաղթահարել 50+1 տոկոսը, ձեւավորել իշխանական կոալիցիաներ՝ մրցակից թեկնածուներին վախեցնելու, կամ համոզելու ճանապարհով: Մեկ շաբաթից ավել է տարբեր համայնքներից մամուլին տեղեկություններ են հասնում, որ ՔՊ-ն ուղղակի տեռոր է անում, Վարդենիսում ընդդիմադիր թեկնածուներից մեկին կալանավորեցին, Արթիկում Սամվել Բբաբայանի միջոցով ստիպեցին իշխանական կոալիցիա ձեւավորել, Աբովյանում Ռոմանոս Պետրոսյանն է տեռոր անում, իսկ երեկ Թաշինում փլուզեցին հերթական հակաիշխանական կոալիցիան: ՔՊ-ն Թալինում եւս չի հաղթահարել 50 տոկոսի շեմը, ընտրությունների հաջորդ օրը, սակայն, մասնակից երեք ուժերը՝ Արա Զոհրաբյանի «Զարթոնք» ազգային քրիստոնեական կուսակցությունը, «Հայք» լիբերալ կուսակցությունը և «Մեր համայնքը» կուսակցությունների դաշինքը հայտարարեցին համագործակցության մասին, հրապարակեցին նաեւ քաղաքապետի թեկնածուի անունը՝ Թալինի դպրոցներից մեկի ֆիզկուլտուրայի ուսուցիչ Կարեն Գրիգորյանի, որը գլխավորում է «Հայք» կուսակցության ցուցակը։ Ավագանու 21 մանդատից՝ Զարթոնքը ստանալու է 6, Հայքը՝ 3, Մեր համայնքը՝ 2 մանդատ՝ ընդհանուր ունենալով 11 մանդատ ավագանիում, իսկ ՔՊ-ին հասնելու է 10 մանդատ: Երեկ Հայք-ի ցուցակը առաջնորդող Կարեն Գրիգորյանը Ֆյեսբուքյան իր էջում հայտարարություն է տարածել, որով տեղեկացնում է մանդատներից հրաժարվելու մասին.«Դեկտեմբերի 5-ին կայացած տեղական ինքնակառավարման մարմինների ընտրությունների հետընտրական լարվածությունը թոթափելու նպատակով՝ Թալին խոշորացված համայնքում առաջադրված «Հայք» լիբերալ կուսակցությունը որոշում է կայացրել հրաժարվել մանդատներից։ Թեկնածուները կներկայացնեն ինքնաբացարկի դիմումներ» գրել է նա:
Սա նշանակում է, որ մանդատային մեծամասնությունը պատկանում է ՔՊ-ին՝ 10-ը 8-ի դեմ եւ առաջիկա նիստում ՔՊ-ն Տավրոս Սափեյանին կընտրի քաղաքապետ:

Իսկ ընդդիմադիր ուժը պայքարից դուրս է գալիս իշխանության ճնշումների ներքո: Մամուլում տեղեկություններ կան, որ իշխանությունը այս համայնքում գործուղել է կրիմինալին, Ռուստամ Ստեփանյանը՝ Չաղ Ռուստամն է աշխատանքներ տարել Կարեն Գրիգորյանի հետ, նրանք բարեկամներ են:
Այսպիսով՝ Նիկոլ Փաշինյանը վախի ու սպառնալիքների միջոցով փորձում է տիրել իշխանությայնը, արհամարհում է ժողովրդի կամարտահայտությունը եւ ընտրությունների արդյունքները ձեւում է իր վրայով:

Անի Սահակյան