Ալիևի աջակցությունը Նիկոլ Փաշինյանին՝ սահմանազատումից առաջ

Խաղաղության դարաշրջանը նշանավորվում է նոր սահմանային կրակոցներով, վիրավորներով, զոհերով և սադրանքներով։ Պաշտպանության նախարարությունը տեղեկացնում է, որ դեկտեմբերի 10-ի կեսօրին Ադրբեջանի ԶՈՒ ստորաբաժանումների ձեռնարկած նախահարձակ գործողությունների պատճառով ծավալված փոխհրաձգության հետևանքով հայկական կողմն ունի մեկ զոհ, ևս մի քանի զինծառայող վիրավոր է։ Ավելի ուշ հաղորդվեց, որ վիրավորների թիվը 8-ն է, ընդ որում 6-ի վիճակը ծանր է։

Զարմանալի զուգադիպությամբ ադրբեջանական սադրանքը համաընկով Վարդենիսում բռնկված հանրային ընդվզմանը։ Վարդենիսի բնակիչները փակել էին Մարտունի-Վարդենիս ավտոճանապարհը և պահանջում էին ազատ արձակել «Միասնական Վարդենիս» դաշինքի ցուցակը գլխավորող Արամ Հարությունյանին։ Ինչպես հայտնի է, դեկտեմբերի 5-ին Վարդենիսում տեղի ունեցած Վարդենիսի ՏԻՄ ընտրություններում «Ահարոն Խաչատրյան» դաշինքը ստացել է 16.51 տոկոս, «Միասնական Վարդենիս» դաշինքը՝ 37.76 տոկոս։ Եվ ընտրությունների արդյունքում ձայների 46.11%-ը ստացած «Քաղաքացիական պայմանագիր» կուսակցությունը, որի համամասնական ցուցակը գլխավորում է Վարդենիսի գործող քաղաքապետ Արամ Մելքոնյանը, չկարողացավ տեղական իշխանություն ձեւավորել: ՏԻՄ ընտրություններից հետո, երբ «Ահարոն Խաչատրյան» և «Միասնական Վարդենիս» դաշինքները կոալիցիա կազմելու մասին հայտարարություն տարածեցին, «Միասնական Վարդենիս» դաշինքի ցուցակը գլխավորող Արամ Հարությունյանին հրավիրվել է Սևանի քննչական կոմիտե՝ հարցաքննության ու տեղում ձերբակալել։
Այս փաստը բարձրացրել է դժգոհության ալիք։ Դեկտեմբերի 10-ի սահմանային կրակոցներից հետո սակայն վարդենիսցիները բացել էին ճանապարհը՝ պայմանով, որ ազատ արձակվի նաև Վարդենիս խոշորացված համայնքի ղեկավարի իրենց մեր թեկնածուն։
«Հաշվի առնելով, որ սահմանային իրավիճակը լարվել էր, ունեինք վիրավորներ, որպեսզի որեւէ պրոցեսի չխոչընդոտեինք, որոշեցինք ճանապարհը բացել։ Բայց նորից կվերսկսվեն, եթե Արամ Հարությունյանին ազատ չարձակեն»,- հայտարարել էին ճանապարհը փակած վարդենիսցիները ։
Զուտ փաստերի վիճակագրությանը հետևելով՝ կարելի է ստանալ տպավորություն, թե սահմանին ադրբեջանական կարակահերթերն ու նախահարձակ գործողությունները ընթանում են սինխրոնացված՝ Հայաստանի իշխանության ձեռնարկած քայլերի հետ։ Իշխող ուժը, պարտվելով Վարդենիսի ընտրություններում, փորձում է չեզոքացնել տեղական ուժեղ լիդերներին, որոնք սահմանազատման հետ կապված իշխանության ծրագրերը կարող են տապալել։ Թերևս հանուն հենց այս ընդհանուր նպատակի էլ ադրբեջանցիները հեռահար աջակցում են Հայաստանում իրենց շահերն սպասարկող Փաշինյանի ռեժիմին։ Ի դեպ, Սոթք Խոզնավար հատվածում դեռ ամիսներ առաջ ադրբեջանական զինուժը ներխուժել է ՀՀ սուվերեն տարածք։ Նիկոլ Փաշինյանի իշխանությունը, ինչպես ցույց է տալիս կյանքը, ապրում և վերարտադրվում է ՝այս իրողության հետ հաշտված։

Հայկ Դավթյան