Ի՞նչ է սպասվում վերադարձած 5 գերեվարվածներին․ մի մասը կալանավորվել է

Դեկտեմբերի 4-ին Հայաստան էր տեղափոխվել 10 ռազմագերի, որոնք գերեվարվել էին նոյեմբերի 16-ին։ Երեկ պարզ դարձավ, որ վերադարձած 10 գերիներից մի մասին ձերբակալել են, հետո մեղադրանք առաջադրել՝ 10-ից 5-ին։

Մեղադրանքն առաջադրվել է քրեական օրենսգրքի 365-րդ հոդվածի 3-րդ մասի հատկանիշներով՝ մարտական հերթապահության կամ ծառայության կանոնները խախտելը, որն առաջացրել է ծանր հետևանք։ Վարույթն իրականացնող մարմինը վերադարձած գերիներից 5-ի նկատմամբ կալանավորումը որպես խափանման միջոց ընտրելու մասին միջնորդություն է ներկայացրել դատարան։

 «Ես կարող եմ ձեզ տեղեկություն հաղորդել այն ժամանակվա մասով, երբ ես երեկ դատարանում եմ եղել։ Երբ ես դատարանում էի, 3 գործ է եղել՝՝ իմ վստահորդի՝ Նարեկինը ու ևս երկուսինը, բայց ես նրանց տվյալները չունեմ։ Իմ վստահորդինը մերժվել է կալանավորումը որպես խափանման միջոց ընտրել։ Մյուսների մասով մանրամասն տեղյակ չեմ, բայց գիտեմ, որ քննարկվում է։ Իհարկե հնարավոր է, որ մյուսներինն էլ է մերժվել, բայց երեկ երբ այնտեղ էի, մեկի գործով արդեն կար կալանք։ Լրիվ հանգիստ կարող եմ տեղեկացնել, որ  հինգն էլ նույն եկածներն են, դա նախաքննական գաղտնիք չի։ Ես, սակայն, չեմ կարող ասել մյուսների հետ կապված միջնորդության հանգամանքները, չէ որ դատարանն ինքն է որոշում»,-  «Հրապարակին» հայտնեց վերադարձած հինգ գերիներից Նարեկի պաշտպանը՝ Կարմեն Պողոսյանը։ 

«Դե ծնողները ի՞նչ պիտի ասեն։ Ես իրենց անձամբ ճանաչում եմ ու երբ որ վերադարձան երեխաները, 
շատ ուրախ էին, բայց հետագայում, երբ արդեն մեղադրանք առաջադրեցին ու էս խնդիրները առաջացան, դիմեցին մեզ արդեն։ Ծնողները շատ զարմացած ու զայրացած են։ Ես չեմ մտածում, որ գերիներին մեղադրանք առաջադրելու այս պրոցեսը ուղիղ կապ ունի վարչապետի՝ Ազգային ժողովի ամբիոնից արած հայտնի հայտարարության հետ՝ կրկին կապված գերիների հետ, բայց  կարող եմ ասել, որ մեր երկրի վերաբերմունքը կալանքի տակ պահելու մասով նոր վերադարձած գերիներին, կարող է վատ ազդեցություն ունենա ներկայումս գերության մեջ գտնվողների վրա»,- հավելեց Պողոսյանը։

«Հրապարակ օրաթերթ»