Անկարան ու Բաքուն Հայաստանը քաշում են նոր խմբակ. Մոսկվան կողմ է

Վրաստանը ներկայացված չի լինի «3+3» ձևաչափով նիստին, որը տեղի կունենա վաղը Մոսկվայում, այսօր հայտարարեց երկրի արտգործնախարարությունը։ «Արտաքին գործերի նախարարությունը մեկ անգամ չէ արձանագրել հստակ դիրքորոշումը «3+3» տարածաշրջանային համագործակցության նախաձեռնության վերաբերյալ, այդ թվում՝ արտգործնախարարն այդ մասին խոսել է վերջին խորհրդարանական լսումների ընթացքում։ Մենք չենք դիտարկում մեր մասնակցությունը տվյալ ձևաչափում, հետևաբար՝ Վրաստանը ներկայացված չի լինի ընթացիկ տարվա դեկտեմբերի 10-ին պլանավորված հանդիպմանը», - ընդգծել է գերատեսչությունը։

Պաշտոնական Թբիլիսին մերժում է նախաձեռնությունը՝ նշելով, թե չի կարող համագործակցել Հարավային Օսիան և Աբխազիան զավթած Կրեմլի հետ: «3+3» ֆորմատի նախանիստին Հայաստանը կներկայացնի արտաքին գործերի փոխնախարարը:

Նկատենք, որ «3+3» ձևաչափը Ղարաբաղյան 44-օրյա պատերազմից հետո առաջարկել են Ադրբեջանի և Թուրքիայի նախագահները: Այն ենթադրում է հարավկովկասյան երեք երկրների՝ Վրաստանի, Հայաստանի և Ադրբեջանի, ինչպես նաև տարածաշրջանի երեք տերությունների՝ Ռուսաստանի, Թուրքիայի և Իրանի մասնակցությամբ բանակցային հարթակ, որը կընձեռի տնտեսական և տրանսպորտային կապերի վերականգնման հնարավորություն:

Թուրքիայի արտգործնախարարության հայտարարության համաձայն՝ այդ հարթակի անդամ երկրների փոխարտգործնախարարների մակարդակով առաջին հանդիպումը տեղի կունենա վաղը Մոսկվայում։

Թուրքական և ադրբեջանական կողմերը ներկայացնելու են փոխարտգործնախարարներ Սեդաթ Օնալը և Խալաֆ Խալաֆովը։

Հայաստանը ևս, ինչպես նախօրեին խորհրդարանում հայտարարեց վարչապետը, հանդիպմանը ներկայացնելու է արտաքին քաղաքական գերատեսչության ղեկավարի տեղակալը, սակայն թե որ փոխնախարարը՝ Նիկոլ Փաշինյանը չի հստակեցրել։
«Մենք այդ ձևաչափով կարող են հետաքրքրված լինել, եթե պարզվի, որ չեն քննարկվելու այնպիսի հարցեր, որոնց քննարկման վերաբերյալ մենք ներգրավված ենք այլ ձևաչափերում։ Հարցը քննարկել ենք ՌԴ-ի հետ, ունենք ազդակ, որ իրենք էլ կիսում են տեսակետը»,-ԱԺ-կառավարություն հարցուպատասխանի ժամանակ այսօր հայտարարեց Նիկոլ Փաշինյանը՝ խոսելով տարածաշրջանի երկրների 3+3 ձևաչափի մասին։

«Եթե չեմ սխալվում, դեկտեմբերի տասին 3+2 կամ 3+3 ձևաչափի նախնական նիստի նման հանդիպում է լինելու։ ՀՀ-ն մասնակցելու է ԱԳ նախարարի տեղակալի ձևաչափով։ Հանդիպումը ԱԳ նախարարի տեղակալների մակարդակով է»,-հավելեց երեկ Նիկոլ Փաշինյանը։ Նրա խոսքով՝ փորձելու են տարածաշրջանային երկխոսության արդյունավետ հարթակներ գտնել։

Ի դեպ, երեկ Հայաստանի ԱԳ նախարար Արարատ Միրզոյանը հեռախոսազրույց էր ունեցել Ռուսաստանի ԱԳ նախարար Սերգեյ Լավրովի հետ: Նրանք քննարկել էին Լեռնային Ղարաբաղի հակամարտությանը վերաբերող հարցերի լայն շրջանակ:

Կարևորվել էր ԵԱՀԿ Մինսկի խմբի համանախագահության մանդատի ներքո Լեռնային Ղարաբաղի հակամարտության տևական ու համապարփակ կարգավորման նպատակով խաղաղ գործընթացի լիարժեք վերականգնումը։ Նշվեց, որ ՀՀ և ՌԴ ԱԳ նախարարները քննարկել են նաև «3+3» ձևաչափին առնչվող, ինչպես նաև տարածաշրջանային ու միջազգային օրակարգի փոխադարձ հետաքրքրություն ներկայացնող հարցեր։

Երեկ տեղեկատվություն ստացվեց նաև այն մասին, որ ռուսական կողմը վստահեցրել է հայկական կողմին, որ այդ ֆորմատում չեն քննարկվի հարցեր, որոնք այլ ձևաչափերում են քննարկվում, այսինքն՝ հայկական կողմի պահանջը կատարվել է:

Այսօր էլ արդեն Իրանի և Թուրքիայի նախագահներն են հեռախոսազրույց ունեցել։ Ռեջեփ Էրդողանը և Էբրահիմ Ռաիսին ի թիվս այլ հարցերի քննարկել են նաև տարածաշրջանային խնդիրները։ Իրանի նախագահի մամլո ծառայության փոխանցմամբ՝ Ռաիսին մասնավորապես ասել է․ - «Մենք ընդգծում ենք, որ տարածաշրջանի խնդիրները պետք է լուծվեն տարածաշրջանի ներսում և տարածաշրջանի երկրների ակտիվ մասնակցությամբ, արտաքին միջամտության կարիք չկա»։

Մետաքսյա Շալունց