Հայ ազգը պետք է շնորհակալություն հայտնի մեծն հումանիստ ու հայասեր Ալիեւին

Նոյեմբերի 16-ին Սոչիում տեղի ունեցած այդքան սպասված Փաշինյան-Պուտին-Ալիեւ եռակողմ հայտարարությունից եւ ընդունած նոր փաստաթղթից հետո Հայաստանում կրկին զուգահեռ իրականություն ձեւավորվեց: Փաշինյանի աջակիցներն ու իշխանական պրոպագանդան սկսեցին թմբկահարել, թե տեսեք, ոչ մի միջանցք էլ չենք տալիս , բայց ստորագրվել է մեզ համար շահավետ փաստաթուղթ, թեպետ իրականությունն այն է, որ դեմարկացիայի ու դելիմիտացիայի գործընթացին հավանություն տալն ինքնին՝ առանց Արցախի կարգավիճակի խնդրի ամրագրման, նախ կնշանակի լվանալ ձեռքերը Արցախից, ինչ վերաբերում է միջանցքին, ապա փաստաթղթում միգուցե դա չի կոչվի միջանցք, բայց դատելով Փաշինյանի հետպատերազմական գործողություններից, ոչ միայն միջանցք, այլ Հայաստանի կեսն է պատրաստ նվիրել իր սիրելի թուրքերին, ապա թուրքական վիլայեթի ղեկավար աշխատել:
Այն, ինչ տեղի ունեցավ Սոչիի հանդիպումից հետո, պարզապես հուզիչ էր: Իշխանական քարոզչամեքենան չէր հասցրել մի լավ խրախճանք հրամցնել հանրությանը, երբ Փաշինյանի կիրթ ու կառուցողական Ալիեւը նորից խոսեց «Զանգեզուրի միջանցքի»  մասին:
Նիկոլ Փաշինյանն ու իր թիմակիցները մի քանի օր դիմադրելուց հետո, վերջապես, խոստովանեցին, որ Ալիեւը օրակարգ է բերել իր երազանքը ու իչիք դարձրել Սոչիում ձեռք բերված պայմանավորվածությունները: Իհարկե, ՀՀ «կրուտիտի» թիվ մեկ մասնագետ Նիկոլ Փաշինյանը խորհրդարանում հարցուպատասխանի ժամանակ խուսափեց ուղիղ ասել այդ մասին, ասաց, թե Սոչիի պայմանավորվածությունները չեն արձանագրվել, դրանք ըստ նախատեսվածի պետք է արձանագրվեին դեկտեմբերի 1-ին Մոսկվայում փոխվարչապետերի եռակողմ հանդիպման ընթացքում, այդ մասին Սոչիի հանդիպումից հետո ասել էր ՌԴ նախագահը: Սոչիի ձախողման մասին երեկ լրագրողների հետ զրույցում չթաքցրեց նաեւ ԱԺ փոխխոսնակ Ռուբեն Ռուբինյանը:

Նա, բնականաբար, փորձեց պապից ավելի կաթոլիկ երեւալ եւ պնդել, որ իրենց համար միջանցքային տրամաբանությունը շարունակում է մերժելի մնալ, փոխխոսնակ, նախկին արտգործնախարար ՔՊ-ականն ասաց, որ այդ պատճառով է, որ Գորիս-Կապան ճանապարհի 21 կիլոմետրը տվել են ադրբեջանցիներին, որպեսզի նրանք էլ մեզանից միջանցք չուզեն: Ըստ Ռուբինյանի որեւէ քարտեզով այդ ճանապարհը չի անցնում ՀՀ տարածքով, դա միշտ եղել է Ադրբեջանինը. «Գորիս-Կապան ճանապարհի 21 կմ-անոց հատվածի մի հատվածում մաքսատան տեղադրումը Ադրբեջանի ռեակցիան էր: Մինչ այդ Ադրբեջանը փորձում էր Գորիս-Կապան ճանապարհը ներկայացնել որպես իր կողմից տրված ճանապարհ՝ միջանցքային տրամաբանությամբ, որի դիմաց ուզում էին ստանալ մեր կողմից տրվող ճանապարհ՝ միջանցքային տրամաբանությամբ: Այդ մաքսատան տեղադրումը բնականաբար ֆիզիկական առումով խնդիրներ է առաջացրել մեր քաղաքացիների համար, ի դեպ, ժամանակավոր, որովհետեւ նոր ճանապարհների կառուցումով կլուծվեն դրանք, բայց միջազգային բանակցություններում փաստարկային իմաստով այնքան էլ վատ չէ, որովհետեւ ոչ թե մենք մտանք Ադրբեջանի միջանցքային տրամաբանության մեջ, այլ Ադրբեջանը մտավ մեր ոչ միջանցքային տրամաբանության մեջ»,- ասաց Ռուբինյանը:

Փաստորեն, Նիկոլ Փաշինյանն իսկապես չէր սխալվում՝ Ալիեւին կիրթ ու կառուցողական ասելով, Ալիեւը միայն այդպիսին չէ, նա մեծն հումանիստ, հայասեր, բարեգործ մարդ է, որ 30 տարի Գորիս-Կապան ճանապարհի նշված հատվածն անհատույց տվել է, որ մենք օգտագործենք, իսկ մենք՝ հայերս, շատ երախտամոռ ու անշնորհակալ ազգ դուրս եկանք, շնորհակալություն ասելու փոխարեն, քննադատում ենք այս մարդուն:
Իրականում կարելի էր զվարճանալ փոխխոսնակի մտքի գոհարներով, եթե ամեն բան այսքան ողբերգական չլիներ: Փաստորեն, վաղը նույն տրամաբանությամբ կարող ենք Տիգրանաշենն էլ տալ ադրբեջանցիներին, թուրքին մտցնել Հայաստանի կենտրոն ու հայտարարել, որ Ադրբեջանին բերեցինք մեր ոչ միջանցքային դաշտ:

Անի Սահակյան