Փաշինյանի վաղեմի երազանքը. ովքեր են նրա ապավենը

ՏԻՄ ընտրությունների նախնական արդյունքների հրապարակումից Նիկոլ Փաշինյանն անդրադարձավ դեկտեմբերի 5-ի ընտրություններին՝ նշելով, որ ՏԻՄ ընտրությունների որակը, երբ քաղաքացին տեր է եւ որոշող, ի կատար է ածված:
Փաշինյանն իր «Ֆեյսբուք»-ի էջում մասնավորապես գրել է. «Որքան էլ ակնհայտ է, որ մեր օրակարգի առաջնահերթությունները կապված են արտաքին մարտահրավերների հետ, այնուամենայնիվ պիտի արձանագրեմ, որ ՏԻՄ ընտրությունների այս որակը, երբ քաղաքացին Տեր է եւ Որոշող, մեր վաղեմի երազանքն է՝ ի կատար ածված: Գիտեմ եւ հասկանում եմ տեսակետը, թե ավելի լավ է ընտրությունները կեղծվեին, բայց անվտանգության ավելի բարձր մակարդակ ունենայինք, բայց իմ համոզմունքը եղել է, կա եւ կլինի, որ հենց ընտրությունների կեղծման երկարամյա պրակտիկան է քայքայել 90-ականների սկզբին ձեւավորվող պետական դիմակայունության համակարգը եւ շղթայական ռեակցիաներով հանգեցնել անվտանգային աղետների»:

Նիկոլ Փաշինյանն ըստ էության ասում է, որ ՏԻՄ ընտրությունների իրենց երազանքն ի կատար է ածվել: Փաստորեն, երբ քաղաքական եւ ընտրական դաշտն այնքան ես ապականում, որ ընտրություններին անգամ 50 տոկոս մասնակցություն չի գրանցվում, սա համարվում է երազանքի կատարում: Պաշտոնական տվյալներով դեկտեմբերհինգյան ընտրություններին ընտրողների մոտ 42 տոկոսն է մասնակցել:

Երկրորդ՝ փաստորեն Փաշինյանի վաղեմի երազանքն էր նախկին` կլանային, ցուցակագրելու, ընտրողներին նյութական խոստումներ տալու, վախի մթնոլորտ ձևավորելու և այլ բարքերի շարունակությունը հեղափոխությունից հետո շարունակելը:
Կամ ինչպես ընդդիմադիր Փաշինյանն էր ասում ՝հին հանրապետական տեղական իշխանիկներին թավշյա քաղաքապետեր վերարտադրելը :

Իրականում Փաշինյանը հասկացավ, որ մարդիկ տեղական մակարդակում մերժում են իրենց, որովհետև հասկացել են, նախկիններից վատն են , ուստի Փաշինյանն էլ հույսը դրեց նախկինների վրա: Եւ մի շարք համայնքներում ՔՊ-ին հաղթանակ են պարգեւել այդ նախկինները:

Թալինում ՔՊ-ի տառաճանաչ թեկնածու Տավրոս Սափեյանին օրինակ ըստ մամուլի տեղեկությունների աջակցում էին Արագածոտնի նախկին մարզպետ, ներկայումս ՀՀԿ տարածքային կառույցի ղեկավար Սարգիս Սահակյանն ու մարզի երբեմնի ՀՀԿ-ական գյուղապետերը:

Նույն մարզի Աշտարակ համայնքում թեկնածուն՝ Թովմաս Շահվերդյան ինքն էր նախկին, հինգ տարի առաջ քաղաքապետ էր դարձել ՀՀԿ-ի <<դաբրոյով>> եւ ծառայում էր նախկիններին, բայց այս ընտրություններին դարձավ Փաշինյանի ու իր թիմի սրտի թեկնածուն:

Ջերմուկում Սերժ Սարգսյանի ամենամտերիմ մարդկանցից մեկի՝ գործարար Աշոտ Արսենյանի որդին է հաղթանակ տարել, Արսենյանը ՀՀԿ-ական նախկին պատգամավոր է, Ջերմուկ գրուպի սեփականատերը:
Մարտունիում Հովհաննես Հովյանը նույնպես Սերժ Սարգսյանի մտերիմներից էր, մամուլը բազմիցս է գրել, որ Հովեյանի մոսկվայաբնակ գործարար եղբայրը ընտրություններին մեծ աջակցություն էր ցուցաբերում ՀՀԿ-ին, իսկ կրտսեր եղբայրը, 2017-ին ՀՀԿ-ի ռեյտինգային ցուցակով պատգամավորության թեկնածություն էր առաջադրել: Արթիկ համայնքում ՔՊ թեկնածուն Պեմզաշեն համայնքի ղեկավար Անան Ոսկանյանն էր, ով գեներալ Մանվել Գրիգորյանի սանիկն է: Սա ամբողջական ցանկը չէ եւ գրեթե բոլոր համայնքներում նախկինները ստիպողաբար, կամ ինքնակամ աշխատել են իշխանական թեկնածուների օգտին, այն նախկինները, որոնց հրեշ ներկայացնելով Փաշինյանն ամրապնդում է իր իշխանությունը: Հավանաբար սա էր նրա երազած իշխանությունը, այսպիսին՝ ՏԻՄ ընտրությունը:

Անի Սահակյան