Երկու մեսիջների ինտրիգը
2017 թվականը նշանավորվում է Հայաստանի և Միացյալ Նահանգների միջև դիվանագիտական հարաբերությունների հաստատման 25-ամյակով: ԱՄՆ Անկախության օրվա առթիվ Սերժ Սարգսյանն երեկ այցելել է Հայաստանում ԱՄՆ դեսպանություն, շնորհավորել դեսպան Ռիչարդ Միլսին, դեսպանատան աշխատակիցներին «և ի դեմս նրանց՝ ԱՄՆ-ի բարեկամ ժողովրդին՝ մաղթելով բարեկեցություն և շարունակական զարգացում»: ԱՄՆ անկախության տոնի առթիվ Սերժ Սարգսյանը շնորհավորական ուղերձ է հղել Դոնալդ Թրամփին: ՀՀ նախագահը բարձր է գնահատել դիվանագիտական հարաբերությունների հաստատումից ի վեր ԱՄՆ-ի հետ ձևավորված սերտ համագործակցությունն ու երկկողմ միջպետական հարաբերությունների մակարդակը և ընդգծել, որ արագ փոփոխվող ու մարտահրավերներով լի աշխարհում Հայաստանը կարևոր է համարում ԱՄՆ-ի հետ շարունակել երկխոսությունը փոխադարձ հետաքրքրություն ներկայացնող բոլոր բնագավառներում: «Այսօր աներկբայորեն կարող ենք արձանագրել, որ անցած ժամանակահատվածում մեզ հաջողվել է կառուցել սերտ, ամուր գործընկերային և բարեկամական հարաբերություններ՝ խարսխված փոխադարձ հարգանքի ու վստահության վրա: Ուրախությամբ եմ նշում, որ մեր քաղաքական երկխոսությունը կրում է դինամիկ բնույթ՝ նպաստելով փոխշահավետ համագործակցության ընդլայնմանը, այդ թվում՝ առևտրատնտեսական բնագավառում: Բարձր եմ գնահատում Հայաստանի տնտեսական զարգացմանը, բազմոլորտ բարեփոխումներին, ժողովրդավարության և քաղաքացիական հասարակության կայացմանը տարիներ շարունակ ցուցաբերվող՝ ԱՄՆ-ի աջակցությունը՝ միտված մեր երկրի պետականության ամրապնդմանը: Չեմ կարող չնշել Միացյալ Նահանգների՝ որպես ԵԱՀԿ Մինսկի խմբի համանախագահող երկրի ներդրման կարևորությունը Հարավային Կովկասում խաղաղության հաստատման գործում: Հավատացած եմ, որ ԱՄՆ-ի ակտիվ ներգրավվածությունը մյուս համանախագահող երկրների՝ Ռուսաստանի և Ֆրանսիայի հետ համատեղ, ղարաբաղյան հակամարտության կարգավորման գործընթացում կհանգեցնի ցանկալի արդյունքի՝ խնդրի խաղաղ և տևական կարգավորման», ասվում է Սերժ Սարգսյանի` ԱՄՆ նախագահ Դոնալդ Թրամփին ուղղված շնորհավորական ուղերձում: Երեկ նաև Ադրբեջանի նախագահն է ուղերձ հղել ԱՄՆ նախագահին: Ադրբեջանը «մեծ հույսեր է կապում» ԱՄՆ-ի՝ որպես ԵԱՀԿ Մինսկի խմբի համանախագահ երկրի և «անձամբ» նախագահ Դոնալդ Թրամփի հետ․ ասված է Ադրբեջանի նախագահ Իլհամ Ալիևի՝ ԱՄՆ-ի Անկախության օրվա կապակցությամբ ամերիկացի պաշտոնակցին ուղղված շնորհավորական նամակում։ Ադրբեջանական լրատվամիջոցների փոխանցմամբ, Ալիևը հույս է հայտնել, որ Վաշինգտոնի և անձամբ Դոնալդ Թրամփի ջանքերով ղարաբաղյան հակամարտությունը կստանա «խաղաղ և արդար լուծում՝ միջազգային իրավունքի նորմերի հիման վրա՝ Ադրբեջանի տարածքային ամբողջականության սկզբունքի շրջանակում»։ Ղարաբաղյան կարգավորման գործընթացում ԱՄՆ-ի ակտիվ ներգրավման մասին դեռևս չի կարելի խոսել: ԱՄՆ նորընտիր նախագահը, թերևս, դեռ չի ճշգրտել իր քաղաքականությունն, առհասարակ Հարավային Կովկասի երկրների նկատմամբ և ԼՂ խնդրի շուրջ: Իհարկե, ԱՄՆ-ը ԵԱՀԿ Մինսկի խմբի համանախագահող պետություն է, և մասնակցում է խաղաղ կարգավորմանը: Բայց խոսքը դրա մասին չէ: Թրամփի ընտրությունը «փրկություն» էր Ալիևի համար, որը Օբամայի վարչակազմից դժգոհ էր, ԱՄՆ-Ադրբեջան հարաբերություններն Օբամայի օրոք աննախադեպ լարվել էին: Հիմա Ալիևի հույսը Թրամփի միջոցով ադրբեջանա-ամերիկյան հարաբերությունները մեղմելն ու մասնավորապես ԼՂ խնդրում Բաքվի ցանկալի պահանջները ամերիկյան վարչակազմին հանգցնելն է: Հայաստան-ԱՄՆ հարաբերությունները` Թրամփի օրոք պետք է չզիջեն այն ակնկալիքներին, որն ունի Ալիևն այսօր Վաշինգտոնից: Ավելին` կարևոր է ԵԱՀԿ Մինսկի խմբում հավասարության պահպանումը, ինչը չի կարող տեղի ունենալ ռուսական «մենաշնորհային» ազդեցության պայմաններում: Դրա հետևանքը մենք տեսանք` անցյալ տարի ապրիլյան քառօրյա պատերազմն էր: Հետևաբար, չպետք է թույլ տալ Թրամփ-Ալիև հարաբերությունների այնպիսի մակարդակ, որը վնասի ԼՂ խնդրում համանախագահող երկրների միջև հավասարակաշռության նոր խախտմանը, դա կործանարար կլինի Արցախի համար: Հայաստանի կողմից ճշգրիտ դիվանագիտությամբ, ինչպես նաև ԱՄՆ-ում հայկական լոբբիստական կառույցների աշխատանքը ի շահ Հայաստանի և Արցախի ծառայեցնելու ուղղությամբ հսկայական անելիք կա: Թամար Բագրատունի
Հետևեք մեզ Viber-ում
