Նավթադոլարների, խավիարի «հմայքն» ու ընձեռած հնարավորությունները
Եվրոպայի խորհրդի խորհրդարանական վեհաժողովի նախագահ Պեդրո Ագրամունտին ներկայացված կոռուպցիոն և այլ մեղադրանքները լրջորեն վնասում են Եվրոպայի խորհրդի հեղինակությունը, «Ազատության» հետ զրույցում ասել է 1 Եվրոպայի խորհրդի մարդու իրավունքների հանձնակատար Նիլս Մուժնիեկսը՝ հույս հայտնելով, որ ԵԽԽՎ խորհրդարանականները «կմաքրեն իրենց տունը»: «Կարծում եմ, որ Եվրոպայի խորհրդից դուրս մարդիկ չեն տարբերակում խորհրդարանական վեհաժողովն ու Եվրոպայի խորհրդի այլ կառույցները: Խորհրդարանական վեհաժողովը կազմված է ազգային խորհրդարանների ներկայացուցիչներից, նրանք Եվրոպայի խորհրդի մշտական կազմի ներկայացուցիչներ չեն, սակայն այն, ինչ նրանք անում են՝ ազդում է բոլորի վրա, իսկ կոռուպցիային ու Սիրիա կատարած այցին վերաբերող մեղադրանքները շատ լուրջ են, և կարծում եմ, որ խորհրդարանական վեհաժողովը իրականացրել է այն, ինչ անհրաժեշտ է համարել: Ես սպասում եմ հետաքննող կոմիտեի բացահայտումներին, մեղադրանքները շատ լուրջ են, բայց հույս ունեմ, որ նրանք կկարողանան հասնել դրանց խորքին ու բացահայտել այն, ինչ պետք է»,- ասաց Նիլս Մուժնիեկսը: Հիշեցնենք, որ օրեր առաջ Եվրոպայի խորհրդի խորհրդարանական վեհաժողովի լիագումար նիստի ավարտից հետո 160 ստորագրությամբ ԵԽԽՎ քարտուղարությանն է հանձնվել կառույցի նախագահ Պեդրո Ագրամունտին անվստահություն հայտնելու նախաձեռնությունը: Ապրիլին էլ ԵԽԽՎ կառույցի իսպանացի նախագահին անվստահություն էր հայտնել կառույցի բյուրոն: ԵԽԽՎ-ի գարնանային նստաշրջանում Պեդրո Ագրամունտին ներկայացվող մեղադրանքների ու քննադատությունների պատճառը ռուսաստանցի պատգամավորների հրավերով Սիրիա կատարած այցն էր: Ավելի վաղ ԵԽԽՎ հայ խորհրդարանականները բարձրաձայնում էին, որ Ագրամունտը Ադրբեջանի հետ սերտ հարաբերություններ ունենալով՝ հակահայկական գործողություններ է իրականացնում, ազդելով նաև քվեարկության վրա: «Չեմ կարող ասել, թե ինչ կբացահայտի հետաքննող հանձնաժողովը: Ագրամունտի դեմ մեկ քրեական գործ է հարուցված Իտալիայում, նրա հասցեին բազմաթիվ այլ մեղադրանքներ են հնչեցվել, բայց մինչև այժմ որևէ հստակ փաստ չի հրապարակվել: Քննությունն ընթացքի մեջ է, եթե ապացույց չներկայացվի, որ կաշառքով քվեներ են գնվել, ապա հուսով եմ՝ համապատասխան քայլեր կիրականացվեն: Այս հարցում որոշողը ես չեմ: Խորհրդարանական վեհաժողովն է ինձ ընտրել, ես մասնակցում եմ նրանց աշխատանքին՝ ներկայացնելով տարեկան զեկույցը, երբ ինձ հրավիրում են: Բայց նրանց մնացյալ աշխատանքն անկախ է ինձնից: Ես հետաքրքրությամբ հետևում եմ և հույս ունեմ, որ նրանք կմաքրեն իրենց տունը, քանի որ դա ազդում է Եվրոպայի խորհրդի ամբողջ աշխատանքի վրա»,- ասել է Նիլս Մուժնիեկսը: Մեզանից անկախ, ստեղծվել է մի իրավիճակ, երբ Հայաստանը կարող է ԵԽԽՎ-ում ձևավորված մթնոլորտը Պեդրո Ագրամունտի շուրջ օգտագործել ի նպաստ Հայաստանի նկատմամբ վերաբերմունքի փոփոխության: Սա այն դեպքն է, երբ ադրբեջանական նավթադոլարների ու «խավիարային դիվանագիտության» բացահայտված գործարքների առկայության պայմաններում լայն հնարավորություններ են ստեղծվում եվրոպացի պատգամավորների հետ աշխատելու` ի նպաստ Հայաստանի և Արցախի շահերի: Մի կողմից բացահայտվել է ադրբեջանական կաշառակերությունն իր ողջ «հմայքով», մյուս կողմից այն կեղտը, որի մեջ հայտնվել է եվրոպական կառույցը: Սակայն բացահայտված մութ գործարքներն ինչ-որ առումով` հույս են, որ եվրոպացի պատգամավորները զերծ կմնան ապագայում Ալիևից կաշառքներ ստանալուց: Բայց դա պետք չէ բացառել ընդհանրապես: Այնպես որ, հայկական դիվանագիտությունը բավական անելիք ունի. հետևողական աշխատանք եվրոպացի պատգամավորների, դիվանագետների հետ: Ադրբեջանի իշխանությունների բացահայտված «գործերը» բավարար հիմք են այդ աշխատանքն ի նպաստ Հայաստանի և Արցախի գործածելու: Ի դեպ, ադրբեջանական կոռուպցիոն դրսևորումների մասին օրերս նոր տեղեկություններ ի հայտ եկան: Գերմանիայի Բունդեսթագի կողմից հունիսի 29-ին ընդունված Եվրամիության Արևելյան գործընկերության քաղաքականության հետ կապված բանաձևից հետո Ադրբեջանի կողմից կատարված բազմաթիվ խախտումներն ու կոռուպցիոն սկանդալները դարձել են Գերմանական հեռուստատեսության լայն քննարկման առարկա: Այս մասին հայտնել է ադրբեջանական azadliq.info լրատվական գործակալությունը: Գերմանական ամենահայտնի ZDF հեռուստաընկերությունը Ադրբեջանի կոռուպցիոն սկանդալների և գործարքների վերաբերյալ տեսանյութ է հրապարակել: Տեսանյութում անդրադարձ է կատարվել աշխարհում հայտնի խոշոր կոռուպցիոն սկանդալներին, որոնց մասնակցություն են ունեցել ադրբեջանցի պատգամավորները, ինչպես նաև ընտրակեղծարարություններին և կաշառակերության դեպքերին: Թամար Բագրատունի