Փաշինյանը կասկածներ ունի. նա դատախազությանը հանձնարարեց պարզել քովիդի մահերի իրական թվերը (video)

Կառավարության այսօրվա նիստում վարչապետ Նիկոլ Փաշինյանը հայտարարեց, որ կորոնավիրուսային իրավիճակով պայմանավորված՝ Հայաստանում որոշակի մեղմացում կա:

«Մյուս կողմից, սա որևէ բան չի նշանակում այն իմաստով, որ նոր շտամ է հայտնաբերվել, որը դեռևս Հայաստանում չկա, բայց դեռևս հստակ չէ, թե այս նոր շտամը ինչ նոր ազդեցություն կարող է ունենալ», - ասաց նա:

Նիկոլ Փաշինյանի խոսքով՝ առաջիկայում չպետք է թուլացնել զգոնությունը:

Առողջապահության նախարար Անահիտ Ավանեսյանն էլ ասաց, թե պատվաստումները շարունակում են մնալ ամենաարդյունավետ ու միակ միջոցը կորոնավիրուսի դեմ պայքարելու:

«Մեր բոլոր ջանքերը պիտի շարունակենք ուղղել՝ պատվաստումների գործընթացը արագացնելու ու բավարար շեմը անընդհատ բարձրացնելու: Արդեն առաջին դեղաչափ ստացել է 18 տարին լրացած քաղաքացիների 40 տոկոսը, երկրորդ դեղաչափը՝ 23,9 տոկոսը», - նշեց նա:

Նախարարի խոսքով՝ այսօր հաստատվել է կորոնավիրուսի 558 նոր դեպք, կատարվել է 9013 թեստավորում, մահացել է 21 քաղաքացի:

Նա նշեց, թե ակտիվ դեպքերի մեջ պատվաստված քաղաքացիների թիվը 1068 է, իսկ հոսպիտալացված 2349 քաղաքացուց 87-ն է, որ պատվաստված է:

Վարչապետ Նիկոլ Փաշինյանը հետաքրքրվեց՝ մահվան թվերի վիճակագրության հետ կապված եզրակացության հանգե՞լ են, թե՞ ոչ:

Նախարարն էլ ասաց, որ ուսումնասիրությունները շարունակվում են, ամբողջական պատկեր ունենալու դեպքում հանրությանը կտեղեկացնեն:

Փաշինյանը ՀՀ գլխավոր դատախազ Արթուր Դավթյանին ասաց, թե պետք է պարզել՝ այստեղ որևէ չարամտություն եղե՞լ է, թե՞ ոչ:

«Այս պահի դրությամբ տպավորությունն այն է, որ չարամտություն չկա, բայց ճիշտ կլինի, որ դատախազությունն ուսումնասիրի ու հարցի հստակ պատասխան ունենանք», - նշեց վարչապետը: