Սերժ Սարգսյանի կիսաբաց խաղաքարտը․ ինչո՞ւ իշխանությունը փոխանցվեց Փաշինյանին

Հայստանի երրորդ նախագահ, ՀՀԿ նախագահ Սերժ Սարգսյանը ելույթ է ունեցել «XXI դարի գլոբալ մարտահրավերները. միջկուսակցական հարթություն» թեմայով միջազգային միջկուսակցական տեսակոնֆերանսի ժամանակ, որին մասնակից է եղել նաև ՌԴ իշխող Եդինայա Ռոսիա կուսակցությունհը։ Սարգսյանը հայտարարել է, որ Եվրասիական տնտեսական միությանը Հայաստանի անդամակցման վերաբերյալ ժամանակին կայացրած իր որոշումը ճիշտ էր: Նա նաև համոզմունք է հայտնել, որ շատ ճիշտ է եղել նաև իր նախագահության օրոք՝ 2010 թվականին Հայաստանում ռուսական ռազմակայանի տեղակայման ժամկետների երկարաձգման և նրա լիազորությունների ընդլայնման վերաբերյալ որոշումը։ <<Առ այսօր առկա է Հայաստանի և Ռուսաստանի համագործակցության հզոր, չիրացված ներուժ։ Ցավոք, այդ ուղղությամբ նույնպես Հայաստանի ներկա կառավարության ջանքերն անբավարար են, անարդյունավետ, իսկ երբեմն նաև հակադիր>>,- ասել է Սերժ Սարգսյանը։
Սերժ Սարգսյանը նաև խստորեն քննադատել է Նիկոլ Փաշինյանին ու նրա վարչակազմին։ <<Նախքան կորոնավիրուսը՝ աշխարհի բազմաթիվ երկրներ, այդ թվում Հայաստանը, ախտահարվեցին ծայրաստիճան վտանգավոր մեկ այլ վիրուսով. պոպուլիզմի վիրուսով։ Սա մեծ ցավով եմ նշում, քանի որ իմ երկիրը առ այսօր իր վրա զգում է դիլետանտ-պոպուլիստների ապաշնորհ կառավարման ծանր հետևանքները, և կորոնավիրուսը մեզ բաժին ընկած բնավ միակ փորձությունը չէր։
Անցած տարվա սեպտեմբերի 27-ին մենք լայնամասշտաբ ագրեսիայի ենթարկվեցինք Ադրբեջանի կողմից, որին անմիջականորեն և անթաքույց սատարում էին Թուրքիան և Մերձավոր Արևելքից բերված վարձկանները։
Պատերազմը, որտեղ կիրառվում էին միջազգային իրավունքով արգելված զինատեսակներ, աղետալի հետևանքներ ունեցավ իմ ժողովրդի համար՝ խլելով հազարավոր երիտասարդների կյանքեր, անօթևան թողնելով տասնյակ հազարավոր մարդկանց, թշնամական գերության մեջ նետելով մեր հարյուրավոր հայրենակիցների, որոնց գերակշիռ մասին Ադրբեջանը մինչ օրս, պատերազմից ավելի քան մեկ տարի անց, պահում և խոշտանգումների է ենթարկում Բաքվի բանտերում>>,- նշել է էքսնախագահը։
Սերժ Սարգսյանը մեր երկրի պարտության համար մեղադրել է ներկա իշխանությանը և շատ բաց տեքստով ասել, որ երեք տարի առաջ այսօրվա ռեժիմը իշխանությունը զավթել է արտաքին այն ուժերի աջակցությամբ, որոնք անցած տարվա պետարազմի ժամանակ աջակցում էին Ադրբեջանին։
<<Օգտվելով Հայաստանում գործող թուլակամ և պոպուլիստ իշխանության վարքագծից, ինչպես նաև շահագրգիռ արտաքին ուժերի թողտվությունից, որոնք երեք տարի առաջ որոշակի նպատակներով օգնեցին նրանց իշխանության գալ հայտնի տեխնոլոգիաների միջոցով, Ադրբեջանն այսօր էլ ոտնձգություններ է կատարում Հայաստանի Հանրապետության ինքնիշխան տարածքի նկատմամբ, ահաբեկում սահմանամերձ բնակավայրերի խաղաղ քաղաքացիներին, սադրում ռազմական բախումներ և շարունակում գերեվարել նոր զինվորների։
Հայաստանը դարձել է մի երկիր, որի օրինակով քաղաքագիտությունը կարող է ուսումնասիրել տգետ պոպուլիստների կառավարման կործանարար հետևանքները։
Բանակն ու դիվանագիտական կորպուսը, որոնք երեք տարվա ընթացքում հիմնովին փլուզվել են պոպուլիստական ռեժիմի կողմից, չկարողացան դիմակայել ադրբեջանական ագրեսիային։ Եվս մեկ անգամ վերահաստատում եմ, որ սա ոչ թե մեր ժողովրդի, այլ հանցավոր անպատասխանատու դեմագոգների խմբի պարտությունն է>>,- հայտարարաել է Սերժ Սարգսյանը։ Նա նաև ասել է, թե Հայաստանի  վերջին  արտահերթ ընտրությունները ելք չդարձան խորքային ճգնաժամից երկրի դուրսբերման համար և երկիրը մտավ դժոխքի նոր շրջան՝ ադրբեջանական շարունակվող ագրեսիայով, այս անգամ՝ Հայաստանի Հանրապետության ինքնիշխան տարածքներում։ <<Մենք չենք համակերպվել այս իրավիճակի հետ, և սա ռևանշիզմ չէ>>,- ասել է Սերժ Սարգսյանը և շեշտել, որ Արցախի հարցը լուծված չէ և Լեռնային Ղարաբաղի քաղաքացիների ինքնորոշման իրավունքի հարցը սակարկման ենթակա չէ։

Հայաստանի շախմատիստ նախագահի գնահատականների ճշմարտացիությունը վերստին առաջին պլան է մղում արդեն երեք տարի շարունակ հիմնավոր պատասխան չստացած հետևյալ հարցերի ակտուալությունը։ Սերժ Սարգսյանը 2018 թվականին չգիտե՞ր, որ Նիկոլ Փաշինյանը տգետ է և պոպուլիստ, նա տեղյակ չէ՞ր, որ Փաշինյանին աջակցում են արտաքին այն ուժերը, որենք երբեք պրոհայկական դիրքրոշում չեն ունեցել։ Սերժ Սարգսյանը չունե՞ր վերլուծություն, թե ի՞նչ նպատակով են հայտնի ուժերն աջակցում Փաշինյանի հեղափոխությանը։ Չէր կարող չիմանալ։ Այդ ի՞նչ հրաշքով 2017 թվականին Ելք խմբակցությունը նման մեծ ներկայացվածությամբ հայտնվեց խորհրդարանում (միգուցե Սերժ Սարգսյանն առաջարկի Միքայել Մինասյանին՝ իր խոհանոցային զրույցներից մեկը նվիրել հենց այս թեմային) ։
Վերջապես, եթե եկել էր Սերժ Սարգսյանի իշխանությունից հեռանալու պահը, ապա ինչո՞ւ իշխանությունը հանձնվեց Նիկոլ Փաշինյանի նման պոպուլիստին։ Ի՞նչն էր խանգարում իշխանությունը փոխանցել վստահելի և փորձառու ազգային գործչի։ Ոչ թե Կարեն Կարապետյանին, այլ այնպիսի մեկին, որ ի զորու կլիներ պահել իշխանությունն ու պետությունը։

Հայկ Դավթյան