Խայտառակությունից փրկելու ձախողված օպերացիա. Իշխանասարի հետքերով

Սոչիում տեղի ունեցած եռակողմ հայտարարությունից եւ հերթական նվաստացուցիչ հայտարարության ընդունումից հետո Հայաստանի իշխանությունները պետական քարոզչամեքենան եւ ռեսուրսները գործի են դրել ապացուցելու մեկ միտք, որն արտահայտեց Նիկոլ Փաշինյանը , այն է՝ Սոչիի հանդիպումը դրական է մեզ համար:
Նախ «միջանցք» չլինելու մասին շարադրության մրցույթ հայտարարվեց եւ իշխանության մանր ու միջին չինովնիկները, նրանց սպասարկու վերլուծաբանները, ԱԼՄ-ները փորձեցին հայ հանրությանը վստահեցնել, որ Փաշինյանն ադրբեջանցիներին միջանցք չի տալու: Սակայն Ալիեւը քացախ լցրեց նիկոլականների ախորժակին՝ Աշխաբադում հայտարարելով, որ Սոչիի հանդիպումից հետո Զանգեզուրի միջանցքն ավելի իրատեսական է դառնում:
Իշխանությունը անցել է երկրորդ արարի: Իրեն սպասարկող լրատվամիջոցների էջերով այսօր տարածեց, թե ադրբեջանական զորքերը նահանջել են Իշխանասարի հատվածից, որտեղ նրանք առաջխաղացել էին նոյեմբերի 16-ին: Ադրբեջանական զինուժը 41 կիլոմետր ներխուժել է ՀՀ սուվերեն տարածք, մեր տղաներին հետ մղել, հիմա նրանց դիրքերը հայկական նախկին դիրքերն են: Հայաստանում սպասումներ կային, որ Սոչիում սահմանազատման, սահմանագծման գործընթացի մեկնարկից առաջ Փաշինյանը նախապայման կդներ զորքերի ՀՀ տարածքից դուրսբերման մասին, բայց, ինչպես նշեցինք, Փաշինյանը ոչ մի բանի ընդունակ չէ, բացառությամբ հանձնելու, զոհեր տալու եւ երկիրը քանելու: Ոստի մնում է նման ֆեյք-նյուզի միջոցով փիառ ապահովել, ժեխին կերակրել ոգեւորիչ լուրերով:

ԶԼՄ-ները խոսել էին Սյունիքի Իշխանասարի համայնքապետի հետ, որը նույնպես հաստատել էր լուրը, ասել, որ սարի հայկական դիրքերից ադրբեջանցիները հեռացել են:
Կարճ ժամանակ անց պարզվեց, որ համայնքապետը ստել է՝ ինքնակամ, թե վերին ատյանների պարտադրանքով, կարելի է ենթադրել: Պաշտոնական որեւէ այլ խողովակ չհաստատեց աղմկահարույց այդ տեղեկությունը: Պաշտպանության փոխնախարար Արման Սարգսյանը խորհրդարանում լրագրողների հարցերին համառորեն չպատասխանեց, ոչ հերքեց, ոչ հաստատեց Իշխանասարի մասին լուրերը:
Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը տեղեկությունը նույնպես չհաստատեց. «Ես գիտեմ, որ ադրբեջանցիները մեր ինքնիշխան տարածքից պետք է դուրս գան շուտ թե ուշ, ինչքան շուտ, այնքան լավ... Ի՞նչ փոխվեց {մայիսից հետո}, պարզապես ընկալվեց, ամեն ինչ մեկը մյուսի հետ փոխկապակցված է` կապված նաև այն զրոյական կետից, որտեղ խոսվում է քարտեզներից: Բայց դրանք հանձնաժողովների աշխատանքն են, մնում է` մենք մեր շահերը ճիշտ ընկալենք և սպասարկենք մեր երկրի շահերը»:
Ճշտող հարցին` այդ փոփոխությունները Սոչիի եռակողմ հանդիպման պայմանավորվածությունների արդյո՞ւնքն են, իշխանական պատգամավորն ասաց. «Սոչին տվել է դրական ընկալում, ու ես հիմա չեմ կարող ասել, թե այդ դրական ընկալումը հակառակորդն ինչպես է իրականություն դարձնում և ինչ տեմպերով»:Իշխանասարից ադրբեջանցիների դուրս գալու մասին հարցերին չպատասխանելով հանդերձ՝ Քոչարյանը մեծ վստահությամբ պնդեց, որ այլ ուղղություններով ևս Հայաստանի տարածք ներխուժած ադրբեջանական զինված ուժերը պետք է հետ քաշվեն։ Թե ինչն էր նման վստահության պատճառը, դարձյալ չմանրամասնեց. «Հայաստանի ինքնիշխան տարածքում այլ երկրից զինված ուժեր առանց Հայաստանի Հանրապետության համաձայնության չեն կարող գտնվել, դա միջազգային իրավունքի պարտադրանք է: Մենք էլ էինք շատ տեղեր մտել և դուրս չէինք գալի»:
Առավել խոսուն էր Պաշտպանության նախարարության պարզաբանումը: «Արմենպրես»-ի հարցմանն ի պատասխան՝ Պաշտպանության նախարարությունից ոչ հաստատեցին, ոչ հերքեցին լուրը՝ հորդորելով սահմանային իրադրության, զինված ուժերի տեղաշարժի, զբաղեցրած բնագծերի կամ այլ գործողությունների մասին տեղեկությունները տարածել ոչ թե հիմնվելով համայնքների ղեկավարների խոսքի, այլ ՊՆ պաշտոնական հաղորդագրությունների վրա: Այսինքն հերքեցին միակ հաստատումը, ասելով՝ պետք չէ հենվել համայնքային ղեկավարների խոսքի վրա, իսկ ՊՆ-ն խորհրդավոր լռեց: Ինչպես տեսնում եքն տիպիկ Փաշինյանի ձեռագիրն է, ֆեյք-նյուզը տարածում են, ապահովում առաջին էֆեկտը, իսկ հետո եթե անգամ դա հերքվի, ապա շատերի մոտ այն նստվածք է թողած լինում:

Անի Սահակյան