Այլ ելք չի մնում
«Ելք» դաշինքում շրջանառվող հակասություններն օրըստօրե ակնառու են դառնում։ Դաշինքի անդամ, պատգամավոր Սասուն Միքայելյանը այսօր անդրադառնալով ապրիլի 2-ին տեղի ունեցած խորհրդարանական ընտրություններին, վրդովված ասաց ․«Ո՞վ է ասել, որ ապրիլի ընտրությունները լեգիտիմ են եղել: Շատերը ասում են, որ «Ելք»-ը իշխանության պրոյեկտն է և նման բաներ, բայց կարո՞ղ են բերել գոնե մեկ փաստ»: Սակայն «Ելք» դաշինքի անդամներ Ալեն Սիմոնյանը, Արարատ Միրզոյանը եւ այլք նախկինում ընտրությունները համարել էին լեգիտիմ. «Ես ասում եմ՝ ընտրությունները լեգիտիմ չեն եղել, ո՞նց կարան ընտրությունները լեգիտիմ լինեն, ամբողջ աշխարհն է դա տեսել, ես չգիտեմ՝ ով ինչ է ասել: Իրավիճակից դուրս գալու համար պետք է ելք գտնել, և մեր դաշինքն իր ծրագրում ունի իշխանափոխության ելքերը» հավելյալ պնդեց ընդդիմադիր պատգամավորը: Լրագրողները Սասուն Միքայելյանից հետաքրքվեցին՝ ինչպե՞ս է վերաբերում պատգամավորը «Սասնա ծռեր» խմբի դատավարությանը: «Ես առաջինն եմ արձագանքել «Սասնա ծռեր»-ի գործողություններին: Մարդիկ ուզում են ազատագրել երկիրն այս իշխանություններից, բա ի՞նչ անեն: «Սասնա ծռեր»-ի համար ողջ պատասխանատվությունը կրում է իշխանությունը»,- ասաց Միքայելյանը: Պատգամավորի կարծիքով երկրում «Թավշյա հեղափոխություն» պետք չէ, իշխանափոխություն է պետք, որի համար հիմքեր է պետք ունենալ և «անհրաժեշտ է գործուն պլան կազմել»: Հիշեցնենք, որ խորհրդարանական ընտրություններից շաբաթներ անց Ելք» դաշինքի անդամ Ալեն Սիմոնյանը «Կենտրոն» հեռուստաընկերության «Ուրվագիծ» հաղորդաշարի եթերում հայտարարեց, որ նոր ձևավորված իշխանությունները լեգիտիմ են: «Այս ընտրությունների հետևանքով ձևավորված պառլամենտը, եթե հանում ենք էն մի միլիոն մարդուն բաժանած գումարները, եթե հանում ենք պետական ռեսուրսը, որն օգտագործվել է, ընտրական տեղամասում գրեթե տարբերություն չի եղել: Այս պարագայում լեգիտիմ է իշխանությունը, ինչ արել են, դրսում են արել»,- ասաց Ալեն Սիմոնյանը: Պետրոս Ղազարյանի այն հարցին` այսինքն` Դուք չե՞ք տեսել փող բաժանելու գործընթացը, Ալեն Սիմոնյանը նշեց, որ տեսել են, նկատել են նույնիսկ և հրապարակել, սակայն շարունակեց պնդել, որ ապացույցներ չկան: Կամ օրինակ ավագանու խմբակցության ղեկավար Արայիկ Հարությունյանը եւս համառորեն շրջանցել է իշխանության լեգիտիմության հարցը։Հարցին՝ լեգիտի՞մ է իշխանությունը, թե՞ ոչ, Արայիկ Հարությունյանն ասաց, թե քաղաքականության մեջ բարդ է «այո» կամ «ոչ» պատասխանել: «Այս լեգիտիմության հարցը առաջ է եկել մեր հայտարարությունից հետո: ԱԺ ընտրություններից հետո մենք հայտարարեցինք, որ դաշինքը արձանագրում է հետևյալը. ընտրությունների պաշտոնական արդյունքները ձևավորվել են ընտրություններին մասնակցած քաղաքացիների քվեարկության արդյունքում, և «ԵԼՔ» դաշինքին հաջողվել է արձանագրել իր օգտին տրված յուրաքանչյուր քվե»,– մի առիթով ասել է նա։ Նույն կոնկրետությունից խույս են տալիս նաեւ Էդմոն Մարուքյանն ու Նիկոլ Փաշինյանը։ Իսկ օրինակ Արամ Սարգսյանը միանշանակ պնդել է․ «Իմ կարծիքով` իհարկե ոչ: Ընտրություններում խախտումները եղել են ընտրատեղամասերից դուրս, ընտրակաշառքի տեսքով: Ասել, որ ընտրակաշառքով իշխանության գալը լեգիտիմ է, նման բան չեմ կարող ասել: Բայց ասել, որ հանրությունը ստիպողաբար է գնացել ու այդ քվեն տվել, դա էլ չեմ կարող ասել», ասել է Արամ Սարգսյանը: Խորհրդարանական ընտրությունների նախաշեմին ձեւավորված Ելք դաշինքի երեք ուժերի ներկայացուցիչները հայտարարում էին, որ սա հերթական նախընտրական դաշինքը չէ, այն ձեւավորվել է գաղափարների եւ սկզբունքների միասնության հիմքի վրա, հայտարարվում էր անգամ ապագայում մեկ կուսակցություն դառնալու ռեալ հեռանկարի մասին: Ընտրություններից երեք ամիս է անցել, բայց արդեն անհամաձայնությունները, եթե չասենք հակասությունները թաքցնելը անհնար է դառնում: «Սասնա ծռերի» վերաբերյալ էլ Ելք-ականների կարծիքները շեշտակի տարբերվում են իրարից։ Հետեւաբար այլ ելք չի մնում, քան ազդարարել Ելք-ի վախճանը։ Անի Սահակյան
Հետևեք մեզ Viber-ում
