Պայմանագրային զինծառայողը դասակի հրամանատարին դրդել է վատնել զորամասի դիզվառելիքը

ՀՀ ՊՆ Ն զորամասի զինծառայողները մարտական դիրքի անձնակազմին հատկացված դիզվառելիքից զգալի չափը վատնել են: Նրանց մեղադրանք է առաջադրվել, նախաքննությունն ավարտվել է և գործն ուղարկվել է Գորիսի ընդհանուր իրավասության առաջին ատյանի դատարան: Քրեական գործը դատավոր Դավիթ Սարգսյանի վարույթում է: Դատական տեղեկատվական համակարգի փոխանցմամբ՝ Գարիկ Ավետիսյանին մեղադրանք է առաջադրվել այն բանի համար, որ նա, զբաղեցնելով N զորամասի դասակի հրամանատարի պաշտոնը, հանդիսանալով պաշտոնատար անձ, 2017 թվականի մարտին իրեն վստահված մարտական դիրքի անձնակազմի համար նախատեսված 280լ. դիզելային վառելիքից, պաշտոնեական դիրքն օգտագործելով, նույն դիրքում մարտական հերթապահության նշանակված, պայմանագրային զինծառայող Արման Ստեփանյանի դրդչությամբ կատարել է զգալի չափի` 41 հազ ՀՀ դրամ ընդհանուր արժողության 140լ. դիզելային վառելիքի վատնում, որն անձնական օգտագործման նպատակով հանձնել է Արման Ստեփանյանին: Արման Ստեփանյանին մեղադրանք է առաջադրվել այն բանի համար, որ նա հանդիսանալով N զորամասի պայմանագրային զինծառայող դրդել է կոչումով լեյտենանտ Գարիկ Ավետիսյանին մարտական դիրքի անձնակազմի համար նախատեսված 280լ. դիզելային վառելիքից, պաշտոնեական դիրքն օգտագործելով կատարել զգալի չափի` 41 հազ. ՀՀ դրամ ընդհանուր արժողության 140լ. դիզելային վառելիքի վատնում: Գարիկ Ավետիսյանին մեղադրանք է առաջադրվել ՀՀ ՔՕ-ի 179-րդ հոդվածի 2-րդ մասի 1-ին կետի հատկանիշներով: Արման Ստեփանյանին մեղադրանք է առաջադրվել ՀՀ ՔՕ-ի 38-179-րդ հոդվածի 2-րդ մասի 1-ին կետի հատկանիշներով: Նրանց նկատմամբ խափանման միջոց է ընտրվել ստորագրությամբ չհեռանալը: