Նիկոլ Փաշինյանը պատմական սուտ է խոսել․ նրա անունը կմնա թուրքական պատմության դասագրքերում

Նիկոլ Փաշինյանն Ազգային ժողովում հայտարարել է, որ ինքը պատրաստ է ստորագրել դեմարկացիայի և դելիմիտացիայի փաստաթղթի տակ՝ անկախ նրանից, թե ինչպիսի քննադատության կարժանան։ Ըստ Փաշինյանի՝ այս ընթացքում Ռուսաստանի կողմից 3 անգամ առաջարկվել է փաստաթուղթ, և Հայաստանը երեք անգամն էլ պատրաստ է եղել ստորագրել։ Չի ստորագրել Ադրբեջանը։

«Ինչքան էլ Հայաստանում շատ ծանր քննադատության արժանացա, 2021 թվականի մայիսին եմ հայտարարել, որ այն փաստաթուղթը, որը դրված է սեղանին, ես պատրաստ եմ և պատրաստվում եմ ստորագրել։ Բայց նաև մեր ներքաղաքական աղմուկի պատճառով պրոցեսը խափանվեց։ Դրանից հետո էլ երկու անգամ եղել են առաջարկներ՝ սկսելու, մենք համաձայնել ենք»,- հայտարարել է նա։

Փաշինյանը շեշտել է, որ Գորիս - Կապան ճանապարհի 21-կիլոմետրանոց այն հատվածը, որ իր անմիջական համաձայնությամբ անցել է Բաքվի տիրապետության տակ, որևէ փաստաթղթով, երբեք չի եղել խորհրդային Հայաստանի տարածքում։ Սա պատմական սուտ է, որը ՀՀ վարչապետի պաշտոնն զբաղեցնող անձը արտասանել է ՀՀ Ազգային ժողովի բարձր ամբիոնից։ Ալիևի շահերն սպասարկող այս ստի համար Փաշինյանի անունը կմնա թուրքական պատմության դասագրքերում։ Ի դեպ, նշված հայտարարությունից րոպեներ անց ադրբեջանական մամուլը հեղեղված էր Նիկոլ Փաշինյանի լուսանկարով, և արդեն հասկանալի է, թե ինչպիսի վերնագրով։

 Նիկոլ Փաշինյանն ընդհանրապես և նրա ղեկավարած կառավարությունը, մասնավորապես չեն տիրապետում հայ ժողովրդի պատմությանը և միտումնավոր, արդարացնելու համար հողերը հանձնելու սեփական դավաճանական քաղաքականությունը, արել և անում են իրականության հետ կապ չունեցող հայտարարություններ։ Սա փաստ է։

Հայաստանում, բարեբախտաբար, բացի թուրքական շահերն սպասարկող Նիկոլ Փաշինյանից ու նրա քաղաքական մանկուրտից, կան նաև ինստիտուցիոնալ հիշողություն ունեցող մարդիկ, որոնց ձայնը, սակայն, այս իշխանությունը չի լսում։ Ահավասիկ՝ «Ա1+»-ի հետ զրույցում Հայաստանի առաջին՝ 1990-1998թթ․ ՀՀ տրանսպորտի և կապի նախարար Հենրիկ Քոչինյանը պատմել է Գորիս-Կապան ճանապարհի կառուցման մասին։ «1964թ․ Խորհրդային Հայաստանի մինիստրների սովետը՝ կառավարությունը, հոկտեմբերի 16-ին Գորիս-Կապան ճանապարհի կառուցման, շահագործման, պահպանման մասին որոշում է կայացրել։ Դա Գորիս-Կապան այն ճանապարհն է, որն այսօր մասամբ անցել է Ադրբեջանի վերահսկողության տակ, և որի վրա Ադրբեջանն անցած շաբաթ անցակետեր է տեղադրել։ Իշխանությունների ներկայացմամբ այդ ճանապարհի որոշ հատվածներ անցնում են Ադրբեջանի տարածքով։ Եվ որ դա այդպես է ճանաչվել 2010թ․ Վարչատարածքային բաժանման մասին օրենքով։
Մինիստրների սովետը Ադրբեջանի տարածքում ճանապարհ էր կառուցո՞ւմ։ Հարցնում եմ, ինչպե՞ս։ 1964-ից առ այսօր, այդ ճանապարհի նորոգում, լայնացում, սպասարկում, շահագործում և այլն Հայաստանն է կատարել՝ Կապանի և Գորիսի ճանշինների ուժերով»,- ասել է Հենրիկ Քոչինյանը՝ հավելելով, որ իր պաշտոնավարման տարիներին այդ ճանապարհն ամբողջությամբ ՀՀ սեփականությունն է եղել։

Նա պնդել է, որ ճանապարհը միշտ եղել է ՀՀ սեփականությունը և այդ մասին կան արխիվային փաստաթղթեր՝ թող վերցնեն նայեն։ Ըստ ամենայնի՝ այն արխիվային կեղծ փաստաթղթերը, որոնք կարող են ապահովել ապացուցողական բազա Փաշինյանի ստերի համար, Բաքվում են նախապատրաստվել և ապա փոխանցվել են Հայաստանի իշխանությանը։ Նիկոլ Փաշինյանի համար դրանք ավելի վստահելի և արժանահավատ են, քան արխիվային փաստերը, որոնք տարածքի ու ճանապարհի հայկական լինելն են ապացուցում։

Որպես հավելում․ Փաշինյանի հայտարարությունից ժամեր առաջ Թուրքիայի արտգործնախարար Չավուշօղլին  էր հայտարարել , թե այդ տարածքների «ադրբեջանական» լինելու մասին Հայաստանում շատ լավ գիտեն։ Մեսիջն ուղղված էր Փաշինյանին։ Նա հրահանգը կատարել է անթերի։

 Հայկ  Դավթյան