Փաշինյանի վառած «կանաչ լույսը». սպանության հետքերով

Հայաստանն այլեւս ձեռնոց է նետել հանցավոր Սիցիլիային, ամեն օր կրակոցներ, բռնության դեպքեր, ծեծ, ջարդ: Ատելության ու անպատժելիության այն մթնոլորտը, որը գերացվել է երեք տարի շարունակ, առարկայական հետեւանքներ է ունենում: Երեկ գիշեր Երեւանի Քանաքեռ թաղամասի սեփական տներից մեկում մարտաֆիլմ հիշեցնող միջադեպ է գրանցվել, ավտոմատներով, զենքով կրակել են իրար վրա տեղի թաղային հեղինակություններից մեկի բանդան ու ԱԺ նախկին պատգամավորներից մեկի տղաները, կա չորս զոհ, ծանր վիրավորներ: Սպանվածներն են քրեական հեղինակություն Քանաքեռցի Տույը՝ Արթուր Ղազարյանը և ԱԺ նախկին պատգամավոր 61-ամյա Արտյուշ Սիմոնյանը, ում տանն էլ տեղի է ունեցել դեպքը: Վերջինիս որդին՝ Վլադիմիր Սիմոնյանը, որը վիրավոր է, ըստ մամուլում շրջանառվող տեղեկությունների, կասկածվում է Տույի սպանության մեջ։
Վլադիմիր Սիմոնյանը Հայաստանում տեղի ունեցած իշխանափոխությունից հետո աշխատել է Երևանի քաղաքապետարանի Կենդանաբանական այգում՝ որպես փոխտնօրեն, այնուհետև՝ տնօրենի ժամանակավոր պաշտոնակատար, սակայն ամիսներ առաջ ազատվել էր տնօրենի ԺՊ-ի պաշտոնից՝ փաստաթղթերով տնօրենին ներկայացվող պահանջներին չհամապատասխանելու պատճառով։
Վլադիմիր Սիմոնյանի հայրը՝ Արտուշ Սիմոնյանը, 1998-2001թ-ը եղել է Հայկական ավիաուղիների կոմերցիոն տնօրենը։ 2003թ-ին մեծամասնականով Քանաքեռ-Զեյթուն վարչական շրջանից ընտրվել էր ԱԺ պատգամավոր: Նա անկուսակցական էր:
Իսկ «Քանաքեռցի Տույը»՝ Արթուր Ղազարյանը, ինչպես նշեցինք, քրեական հեղինակություն է, նա բազմիցս է հայտնվել իրավապահների տեսադաշտում: Նա այս իշխանությունների սրտի գողականներից է, վերջին ընտրություններին էլ վիզ էր դրել հող հանձնած Նիկոլ Փաշինյանի եւ նրա իշխանության վերարտադրության համար: Այդ պատճառով էլ անպատիժ շրջում էր Երեւանի փողոցներում եւ նոր հանցագործություններ իրականացնում:

2019 թվականին Տույի վերաբերյալ քրեական գործը կասեցվել է, ըստ մամուլի հրապարակումների՝ նա մի քաղաքացու էր պահել անազատության մեջ, ծեծի ենթարկել և սպանության սպառնալիքներ տալու միջոցով պահանջել հրաժարվել իրեն պատկանող հացի արտադրամասի իր մասնաբաժնից, որի դիմաց խոստացել են վճարել 150.000 ԱՄՆ դոլար: Քաղաքացի Ա.Հակոբյանը ստիպված համաձայնել է կատարել վերջիններիս պահանջը, սակայն նրան վճարել են ընդհամենը 10.000 ԱՄՆ դոլար: Սրանից հետո սկսվել էր քաղաքացու հետ հաշվեհարդարը: Այս պատմությունը տեղի էր ունեցել մինչեւ հեղափոխությունը, գործ էր հարուցվել, որը ջրվեց Փաշինյանի գրպանում տեղավորված իրավապահների կողմից: Չնայած այն բանի, որ Փաշինյանն իբր պայքարում էր քրեական ենթամշակույթի դեմ, անգամ օրենք ընդունվեց, սակայն իր աջակից գողականներն անպատիժ են ու այդ անպատժելիությունն է, որ նոր հանցանքներ է ծնում:
Ի դեպ, 2021 թվականին մամուլը գրեց, որ պատերազմի ավարտից հետո մի շարք անձինք Արցախի նախագահի հրամանագրով պարգեւատրվել են մարտական զենքով։ Նրանց թվում էր Տույը, ցուցումը եղել է Նիկոլ Փաշինյանի կողմից։ Ըստ մամուլի՝ Արայիկ Հարությունյանի տված զենքով էլ Տույը սպանել է ԱԺ նախկին պատգամավորին, ընդ որում սա միակ դեպքը չէ. ամիսներ առաջ էլ Խաչատուր Սուքիասյանի եղբայրը կենցաղային հողի վրա կրակեց Երեւանի կենտրոնում նույն Հարությունյանի տված զենքով:

Անի Սահակյան