Երեկ սպանված Արտյուշ Սիմոնյանը՝ Տյուշը, հայտնի դպրոցների մեկի տնօրենի հարազատ եղբայրն է

Նոյեմբերի 11-ին, աղմկահարույց սպանություն էր տեղի ունեցել Քանաքեռ-Զեյթուն վարչական շրջանում.  սեփական տներից մեկում կրակոցներ էին հնչել, ինչի արդյունքում սպանվել էր 4 անձ, իսկ երեք անձ մարմնական տարբեր վնասվածքներով տեղափոխվել էին հիվանդանոց: Սպանվածների մեջ էր քրեական հեղինակություն Քանաքեռցի Տույը՝ Արթուր Ղազարյանը եւ ԱԺ նախկին պատգամավոր 61-ամյա Արտյուշ Սիմոնյանը:

Վիրավորների մեջ է սպանված նախկին պատգամավորի որդին Վլադիմիր Սիմոնյանը: Ի դեպ, կրակոցները հնչել են հենց նախկին պատգամավորի տանը: Նշենք, որ Արտուշ Սիմոնյանը 2003թ-ին մեծամասնականով Քանաքեռ -Զեյթուն վարչական շրջանից ընտրվել է ԱԺ պատգամավոր:

Մամուլը գրեց, որ նա վերջին տարիներին բնակվել է Մոսկվա քաղաքում եւ Հայաստան բավականին ուշ ուշ է եկել, խիստ անհարաժեշտության դեպքում:

Սակայն մեր ունեցած տեղեկություններով՝ նա բնակվել է Հոլանդիայում, և այնտեղ ծավալել է բիզնես գործունեություն: Սպանված նախկին պատգամավորի քեռին Վյաչեսլավ Յարալովն է, որը 2000 թվականին եղել է քաղաքացիական ավիացիայի գլխավոր վարչության պետ եւ զբաղվել է հայկական ավիաուղիների գործունեությամբ:  

Մեզ նաև հայտնի է դարձել, որ Արտյուշ Սիմոնյանը Երևանի թիվ 114 դպրոցը շուրջ 23 տարի ղեկավարող Ռուզաննա Կոստանյանի հարազատ եղբայրն է: