Վարչապետին խորհուրդ տվողը հանցագործ է. S.O.S Սևան նախաձեռնության անդամ

Արդեն տեղեկացրել ենք,որ «SOS Սեւան» նախաձեռնությունն այսօր ԱԺ-ի դիմաց բողոքի ակցիա է անցկացնում՝ պահանջելով խորհրդարանից, որպեսզի արտահերթ նիստում դեմ արտահայտվի կառավարության ներկայացրած օրենսդրական նախաձեռնությանը: «Կառավարությունը թույլատրել է, որ ոչնչացնեն մեր քաղցրահամ ջրերի գլխավոր ավազանը, որը ոռոգմանեւ խմելու ջրով է ապահովում Արարատյան դաշտի գյուղացիներին»,- Ազգային ժողովի դիմաց հայտարարեց բնապահպան Լեւոն Գալստյանը՝խոսելով Սեւանա լճից լրացուցիչ 100 միլիոն խորանարդ ջրի բացթողման նախաձեռնության մասին: Նրա խոսքով՝ մի խումբ պաշտոնյաներ ոչնչացրել են Հայաստանում մեծությամբ երկրորդ ջրային ավազանը և որևէ մեկը դրա համար որևէ պատասխանատվություն չի կրել։ «Հիմա էլ աչքերը դրել են Սևանի վրա և վարչապետը դեռևս 3 ամիս առաջ հանձնարարական է տվել, թե իբր Սևանում 1 մլրդ խմ հավելյալ ջուր է հավաքվել և պետք է այդ ջուրը տնտեսապես ճիշտ օգտագործման մեխանիզմներ մշակել և 3 տարվա ընթացքում օգտագործել։ Չգիտեմ՝ ով է վարչապետին այդ խորհուրդը տվել, բայց այդ մարդը հանցագործ է», - ասաց Լևոն Գալստյանը։ Բնապահպան Ինգա Զարաֆյանն էլ ասաց, որ եթե խորհրդարանը հավանության արժանացնի կառավարության ներկայացրած նախագծին, ապա իրենք ստիպված կլինեն բացահայտել, թե ում շահերին է ծառայում ջրի բացթողումը: Նրա խոսքով, իրենք արդեն հետաքննություն են սկսել։ Նշենք, որ Ջրպետկոմ նախագահ Արսեն Հարությունյանն այսօր Ազգային ժողովում հայտարարել է, որ Սևանա լճից ջրառ չանելու դեպքում կունենանք թերի ոռոգում և գյուղատնտեսական ապրանքների կորուստ։