Համաձայնեցված սցենարով Փաշինյանը գործում է. Կապիտուլյացիայի մղձավանջը շարունակվում է

Աշխարհաքաղաքական խաղը Հայաստանի շուրջ հասնում է իր կուլմինացիային: Երեկ երեկոյան շնչակտուր, բավական հուզված ձայնով ՀՀ Անվտանգության խորհրդի քարտուղար Արմեն Գրիգորյանը շտապել էր Հանրային հեռուստաընկերություն՝ հարցազրույց տալու:

Նա «ավետեց». «Ադրբեջանական կողմը այսօր հայկական կողմին տեղեկացրել է, որ այսօրվանից՝ գիշերը 12։00-ից սկսած, ադրբեջանական կողմը Գորիս-Կապան ճանապարհի այդ հատվածում կիրականացնի սահմանային և մաքսային հսկողության գործառույթ, այսինքն՝ մաքսակետեր կտեղադրի»։

Հասկանալու համար, թե ինչ պրոցեսներ տեղի ունեցան հաշված օրերի ընթացքում, վերհիշենք մի քանի կարևոր դրվագներ:

Ի՞նչ տեղի ունեցավ մինչև նոյեմբեր 9-ը: Մի քանի օր առաջ ռուսական կողմից արտահոսք եղավ, թե նոյեմբերի 9-ին եռակողմ նոր հանդիպում կարող է կազմակերպվել ու փաստաթուղթ ստորագրվել: Ապա՝ Փաշինյանը դա հերքեց, իսկ Մոսկվայից հայտարարեցին, թե այո՛, կա նման մտադրություն, բայց դեռ հստակ չէ, թե երբ կարող է նման եռակողմ հանդիպում կազմակերպվել:

Ապա, Շուշի այցելեց Ադրբեջանի նախագահը, այնտեղ հրավառություններ էին՝ նոյեմբերի 8-ին, «հաղթանակ» էին տոնում, ու նույն օրը հայ քաղաքացիական անձանց վրա հարձակում տեղի ունեցավ Արցախում՝ Ռուսաստանի խաղաղապահ առաքելության վերահսկողության տակ գտնված տեղանքում՝ Շուշիի մերձակայքում: Ապա՝ Հայաստանի սահմանների տարբեր մասերում լարվածություն նկատվեց:

Ի դեպ, այս օրերին անգամ Թուրքիայի պաշտպանության նախարարը մեծ պատվիրակությամբ ժամանեց Բաքու, որտեղից անգամ հասցրեց սպառնալիքներ հնչեցնել Հայաստանի ուղղությամբ՝ «եթե չանենք իրենց ակնկալածը՝ վատ կլինի» տոնայնությամբ:

Ակնհայտ էր, որ ինչ-որ մի բան նախապատրաստվում է ու դրա համար ապահովվում էր համապատասխան մթնոլորտ:

Հիմա արդեն պարզ է, թե ինչ: Երեկ Ռուսաստանում էր Հայաստանի պաշտպանության նախարար Արշակ Կարապետյանը, որտեղ ԱՊՀ ՊՆ-ների հավաք էր, այնտեղ էր նաև Ադրբեջանի պաշտպանությանը նախարարը: Նրանք նույնիսկ միասին, իրար կողքի՝ լուսանկարներ ունեն:

Հայաստանին, ըստ ամենայնի ասվել է՝ չեք ուզում եռակողմ նոր հանդիպում և նոր փաստաթղթի հանդիսավոր ստորագրություն, ուրեմն կանեք այն, ինչ ձեզնից ակնկալվում է: Եվ դա արվեց, իսկ Փաշինյանին մնաց Արմենի Գրիգորյանին շտապ կարգով գործուղել Հանրային՝ լուրն «ավետելու»:

Խորհրդարանական ընդդիմությունն այսօր առավոտյան հասարակությանը հրավիրել է Հանրապետության հրապարակ՝ «պատասխաններ լսելու» կառավարությունից, թեև բոլոր պատասխանները վաղուց տրված են ու Փաշինյանի իշխանությունը գործում է վաղուց համաձայնեցված սցենարով:

Մնում է հասկանալ՝ հայաստանյան քաղաքական դաշտը գոնե հիմա ունա՞կ է համախմբվել ու աշխարհին ցույց տալ, որ համաձայն չէ Հայաստանի ստորացմանը՝ շարունակական կապիտուլյացիայի հերթական քայլին:

Մետաքսյա Շալունց