Հերթական անբարոյականությունը Փաշինյանից

Երեւանի պետական համալսարանում շաբաթ օրը արտակարգ դրություն էր հայտարարված։ Համալսարան էր այցելել փոխվարչապետ Սուրեն Պապիկյանը։ Մեծաթիվ ախրանան լավագույնս կատարել է իր պարտականությունները, հավքն իր պորտով չի կարողացել մտնել դռներից ներս, որտեղ ԵՊՀ Հոգաբարձուների խորհուրդ էր ընտրում, Սուրեն Պապիկյանն էլ ընտրվել է ԵՊՀ հոգաբարձուների խորհրդի նախագահ։ Նիկոլ Փաշինյանն ու իր կողմնակիցները հեղափոխությունից առաջ բազմիցս ընդդիմադիր ելույթներ էին ունենում, հայտարարում, թե պետք է վերջ դնել բուհերի կուսակցականացման արատավոր պրակտիկային, կրթությունը զերծ պահել քաղաքականացումից, իսկ իշխանության գալուց հետո ամեն ինչ արել են նույն այդ բուհերն իրենց վերահսկողության տակ մտցնելու համար։ Որոշ ուսումնական հաստատություններում ստացվեց Փաշինյանի մտադրությունը, ռեկտորներին փոխարինեցին իրենց հավատարիմ կադրերով, մի շարք բուհերում էլ նախկին հանրապետականներն արագ անցում կատարեցին դեպի «Քաղաքացիական պայմանագիր»՝ անցնելով Նիկոլ Փաշինյանի թրի տակով։ Միայն Երևանի պետական համալսարանում իշխանությանը չհաջողվեց ամբողջությամբ վերցնել իշխանությունը։ Երեք տարի շարունակ մայր բուհի ուսանողներն ու դասախոսները պայքարեցին իրենց իրավունքների համար, բողոքի ակցիաներով և իրավական ընթացակարգերով խափանեցին Փաշինյանի մտադրությունները։ Գործող իշխանությունը նույնիսկ կրթական օրենքի փոփոխություն նախաձեռնեց, որպեսզի կարողանա խոշոր հարկատու հանդիսացող մայր բուհում վերջնականապես վերցնել իշխանությունը։ Ցայսօր ռեկտորի հարցը բաց է, այդ պատճառով էլ թերեւս ծանր հրետանին է գործուղվում ԵՊՀ։

Հիմա մի պահ պատկերացրեք, թե ընդդիմադիր պատգամավոր Նիկոլ Փաշինյանն ինչպես կարձագանքեր նման ինֆորմացիայի, անարգանքի սյունին կգամեր ԲՈւՀ-երը կուսակցականացնող իշխանությանը։
Ավելին, հիմա անգամ վիրավորական է համեմատության եզրեր տանել ապազգային ՔՊ-ի ու ազգային ՀՀԿ-ի միջեւ։ Անշուշտ կան տարբերություններ, բայց դրանք հաստատ Փաշինյանի թիմի օգտին չեն։ Մի բան փաստ է, որ անկախ բոլոր թերացումների, ՀՀԿ-ն հայրենիք հանձնող չէր։
Նիկոլ Փաշինյանն ու իր թիմը տարիներ շարունակ հայտարարել են, որ համալսարանների կուսակցականացումը պետք է բացառվի։ Ավելին՝ խստորեն դատապարտել են նախագահ Սերժ Սարգսյանի՝ ԵՊՀ հոգաբարձուների խորհրդի նախագահ լինելու, Հովիկ Աբրահամյանի՝ ժողինստիտուտի հոգաբարձուների խորհրդի նախագահ լինելու փաստը։
Իսկ այսօր այդ նույն մարդիկ իրենց կուսակցական կատարածուին գործուղում են ԵՊՀ՝ տիրելու հոգաբարձուների խորհդրի նախագահի պաշտոնին։
Անբարոյականությունը հենց այս դեմքն ունի, Նիկոլ Փաշինյանը ցուցադրում է անբարոյականության բոլոր երեսները։

Անի Սահակյան