Հայկ Մարությանի սարսափելի վախերը

Ընդդիմադիր Նիկոլ Փաշինյանն օրուարեւ չէր տալիս քաղաքապետ Տարոն Մարգարյանին: Բյուջեի քննարկումների ժամանակ, երբ ավանդույթի համաձայն Երեւանի քաղաքապետը չէր ներկայանում խորհրդարան, Փաշինյանը մի ողջ օր նվիրում էր Մարգարյանին, հանդիսավոր ելույթներ ունենում, պահանջում էր անհապաղ բերման ենթարկել Երեւանի քաղաքապետին:
Փաշինյանի իշխանության երեք տարիներին նույնը տառացիորեն կրկնում է Փաշինյանի իշխանության քաղաքապետ Հայկ Մմարությանը:

Ազգային ժողով երեկ Երևանի քաղաքապետ Հայկ Մարությանի փոխարեն կրկին ներկայացել է Երևանի փոխքաղաքապետ Սերգեյ Ներսեսյանը՝ ներկայացնելու բյուջեի ծրագիրը:
ԱԺ «Քաղաքացիական պայմանագիր» խմբակցության պատգամավոր Սերգեյ Մովսիսյանը հերտաքրքվեց՝ ինչո՞ւ Հայկ Մարությանը անձամբ չի ներկայացել:
«Ճիշտն ասած՝ քաղաքապետն անձամբ էր ուզում գար ու ներկայացներ, բայց, ցավոք սրտի, ներկայիս համաճարակը մտավ իրենց տուն, իր երեխաներն ու կինը հիվանդ են քովիդով ու նա, լինելով վտանգավոր «զոնայում», չի ուզում վտանգել մնացած մարդկանց կյանքը:
Ներկայումս նա գտնվում է մեկուսացված վիճակում, ոչ մեկի հետ կոնկրետ շփման մեջ չի գտնվում», - ասաց փոխքաղաքապետ Սերգեյ Ներսեսյանը:

Իշխանական պատգամավորը առողջություն մաղթեց Երևանի քաղաքապետին, սակայն զգուշացրեց. «Ուղղակի փոխանցեք՝ պատգամավորներն ասում են, որ այս անգամ պատճառը հարգելի է, բայց մյուս անգամ անձամբ ներկայանա»:

Բերված հիմնավորումն, անշուշտ, զավեշտալի է, այս իշխանությունը եւ հատկապես Հայկ Մարությանն այնքան բարդույթավորված են, որ հատկապես պատերազմից հետո վախենում են իրենց ստվերի հետ հանդիպել: Նիկոլ Փաշինյանը ոստիկանական գնդերի ուղեկցությամբ է շրջում, մեկ ուրիշը ընդհանրապես տանից դուրս չի գալիս, իսկ Հայկ Մարությանն ընդհանրապես պատերազմից առաջ էլ է աչքի ընկել իր բարդույթներով: Դրանից առաջ էլ ըստ էության վախենում էր ԲՀԿ-ից ու նամանավանդ Նաիրա Զոհրաբյանից, որ 2018-ի աշնանը քաղաքապետի ընտրություններին իր մրցակիցն էր ու քարուքանդ էր անում Հայկ Մարությանին: Առավել եւս պատերազմից հետո, երբ Մարությանը սուտի հայրենասեր է խաղում, իբր խզել է կապերը թիմի հետ, ծանր է տարել պատերազմը, բայց պահում ու փայփայում է իր պաշտոնը, նա լավ գիտի, որ ազատ շրջելու ժամանակ կգտնվի մեկը, որ կպատռի նրա՝ ծաղրածուի դեմքը:

Անի Սահակյան