Փաշինյանը թոզ է փչում Արեւմուտքի աչքերին. «տակից» իր սեւ գործը կանի

Տաթեւում իշխանությունն ամեն գնով զավթելու իշխող ուժի ջանքերը հաջողությամբ չեն պսակվում: Վարչական դատարանը մերժել է ՔՊ դիմումը՝ հոկտեմբերի 17-ի ընտրություններն անվավեր ճանաչելու վերաբերյալ: Ընտրությունների արդյունքներով իշխող ուժը համայնքի 15 մանդատներից 7-ն է ստացել, 6 մանդատը բաժին է հասել Շանթ դաշինքին, իսկ երկուսը՝ Ապրելու երկիր կուսակցությանը:
ՔՊ-ն, թե ինչ գործիքակազմ կկիրառի Տաթեւում իշխանությունն անաղմուկ խլելու համար, դա կերեւա առաջիկա օրերին,բայց, որ կիրառելու է, դրանում կարելի է չկասկածել:
ՏԻՄ ընտրությունները Նիկոլ Փաշինյանի համար կենաց-մահու նշանակություն են ստացել, դրանք լավագույնս ցույց են տալիս, որ ՔՊ-ն իրականում չունի ժողովրդի աջակցություն, իսկ հունիսի 20-ի խորհրդարանական ընտրությունները պարզ թվանկարչություն են, որոնք լոկալ մակարդակում է բարդ է կրկնելը, եւ ուրեմն իշխանությունը ուժային մեթոդներով է փորձում տիրանալ համայնքային իշխանությանը, ինչպես արեց Գյումրիում, ինչպես փորձում է անել Մեղրիում:
Սակայն ակնհայտ է նաեւ, որ ՔՊ-ն զերծ է մնում հրապարակային շանտաժից ու ճնշումներից, ասվածի վկայությունը վարչական դատարանի վերոնշյալ որոշումն է:
Նիկոլ Փաշինյանի իշխանությունն այլեւս ռիսկի գնալու եւ բացահայտ բեսպրեդել կիրառելու ռեսուրս չունի: Փաշինյանը արտաքին կենտրոնների հետ վերջին երեք տարիներին այնպիսի կեղտոտ խաղերի մեջ է՝ մեկ Արեւմուտքի գիրկն է նետվում, մեկ Ռուսաստանի, մեկ մոլորված պտտվում է երկուսի մեջ, որ հայտնվել է բոլոր կողմերի թիրախում: Պատահական չէ ԱՄՆ դեսպանատան վերջին օրերի զգուշացումը: Նիկոլ Փաշինյանը վերջին ժամանակները սրընթաց շարժվում է Ռուսաստանի գիրկը, ռսի սապոգը լիզելու անդիմադրելի ժամանակներ են. մամուլում լուրեր են շրջանառվում, որ նոյեմբերի 9-ին ՌԴ միջնորդությամբ հերթական փաստաթուղթն է ստորագրվելու եւ ըստ էության Արեւմուտքը վերջնականապես դուրս է մղվելու ղարաբաղյան խնդրի կարգավորման պրոցեսներից: Հիմա թերեւս այս պատճառով Փաշինյանը խիստ զգուշավորություն է դրսեւորում ներքին ասպարեզում եւ բացահայտ հակաժողովրդական քայլերից զերծ է մնում՝ հասկանալով, որ Արեւմուտքը դրանցից կառչելով կարող է իր իշխանության վերջը տալ:

Այս պահից Տաթեւում կսկսեն ներքին ճնշումները , որպեսզի այդ ճանապարհով պարտադրեն կոալիցիա կազմել դիցուք Ռուբեն Վարդանյանի Ապրելու երկիր կուսակցության հետ:
Կա նաեւ մեկ տարբերակ, որով հնարավոր է հիմնավորել Վարչական դատարանում ձախողումը: Ըստ էության Նիկոլ Փաշինյանն այս օրերին ավելի կարեւոր եւ բախտորոշ քայլ պետք է անի եւ դրա համար էլ Տաթեւի համար չի ցանկանում մեծ աղմուկ բարձրացնել:

Անի Սահակյան