«Դա միֆ է». Լևոն Մկրտչյան

Կրթության ոլորտին անցած տարի հատկացվել է 122.4 մլրդ դրամ, որը կատարողականի 97.3%-ն է,ԱԺ Գիտության, կրթության, մշակույթի, երիտասարդության և սպորտի հարցերի ու Ֆինանսավարկային և բյուջետային հարցերի մշտական հանձնաժողովների համատեղ նիստում 2016 թ. պետական բյուջեի քննարկումների ժամանակ հայտարարեց ԿԳ նախարար Լևոն Մկրտչյանը` գոհունակություն հայտնելով, որ Ֆինանսների նախարարությունն իրենց ֆինանսավորումը նորմալ ապահովում է: «2016թ. փորձ է արվել կրթական համակարգը մեկ ամբողջական ծրագրի բերել, անցնում ենք միասնական կրթակարգի:Հաստատվել է որակավորումների ազգային շրջանակը, որը հնարավորություն է տալիս կրթությունը դիտարկել 1 միավոր` մանկապարտեզից մինչև բուհ»,- ասաց նախարարը: Հանրակրթության շրջանում կրթության որակն ավելի լավն է, քան բարձրագույն կրթության ոլորտում, սակայն դպրոցներում ներդրված կառավարման խորհուրդներն իրենց չեն արդարացրել, և դպրոցին պետք է հանգիստ թողնել, որ այն զբաղվի կրթության և քաղաքացի դաստիարակելու խնդիրներով,ասաց նա: Լ.Մկրտչյանի խոսքով` պետք է հասկանալ կրթության համակարգի տեսլականը, գալ ընդհանուր խնդիրներից, ապա նոր անցնել առարկայական չափորոշիչների: Նախարարն անդրադարձավ դպրոցներում ուսումնական ծրագրի ծանրաբեռնվածությանը` նշելով, որ, եթե եվրոպացի երեխան շաբաթական 14-16 առարկա է անցնում, ապա մեզ մոտ` 20-22: «Փորձեցինք ընդհանուր կրթական համակարգը բերել մեկ ամբողջական ձևաչափի: Ունենք արդեն ամփոփիչ արդյունքներ, բայց աշխատանքները պետք է  շարունակվեն 2017-2018 թվականների ընթացքում»,- ասաց նախարարը: Ըստ Մկրտչյանի՝ բարձրագույն կրթության չափորոշիչները մտահոգիչ են: «Դա միֆ է: ՀՀ-ի բնակչության, ըստ պաշտոնական տվյալների, 35 % կազմող սոցիալապես անապահով խավի ընդամենը 5 %-ն է ներկայացված բարձրագույն կրթության համակարգում: Հայաստանում բնակչությունը ներգրավված է բարձրագույն կրթությունում 51 %-ով, եվրոպական ստանդարտը 60-65 % է»: Նախարարը նշեց, որ անցած տարվա շրջանավարտ ուսանողների մոտ 70 տոկոսը հումանիտար բակալավրիատ են ավարտել, և սա շատ մտահոգիչ է: Եթե այսպես շարունակվի, ըստ Մկրտչյանի, ՀՀ-ն կդադարի դառնալ գիտական տարածք և կդառնա սպասարկող տարածք: «Սա վտանգ է, և պետք է այս խնդիրը լուծել: Ինչի համար, օրինակ, մեր դոնոր ընկերությունների ջանքերն են նաև ներդրվում՝ ստեղծել բարձրագույն որակի փոքր հետազոտական և գիտությանն ուղղված ուսումնական համակարգ»,- ասաց նա: ՀՀԿ խմբակցության պատգամավոր Կարեն Ավագյանը նախարարին ասաց, որ դպրոցներում ճիշտ դասագրքեր ունենալու խնդիր կա:Ի՞նչ տրամաբանությամբ պետք է ընտրվեն դասագիրք գրողները, որպեսզի դրանք արդյունավետ և որակյալ լինեն,հետաքրքրվեց նա: Նախարարը պատասխանեց, որ դասագրքերի որակի բարելավման համար նախատեսում են հայկական բուհերում ունենալ ծրագիր, որը կպատրաստի դասագիրք գրողներ: «Այս խնդիրը երկու եղանակով կարող է լուծվել: Հիմա դասագիրք գրելու համար ուզում ենք մասնագետներ ունենալ, այսինքն՝ համալսարանում դնենք մաստեր-ծրագիր՝ ինչպես գրել դասագիրք: Երկրորդ՝ եվրոպական դասագրքերն ադապտացնենք և փորձենք ներմուծել այստեղ»,- ասաց նա: Մկրտչյանն ընդգծեց, որ «Արարատյան բակալավրիատի» ծրագրով նման գրքեր կան, բայց դրանք տեղայնացնելու խնդիր կա, ինչպես նաև անհրաժեշտ է վերապատրաստել ուսուցիչներին, որպեսզի նրանք կարողանան դասավանդել դրանցով: Ռուզաննա Մուրադյանը ԿԳ նախարար Լևոն Մկրտչյանից հետքրքրվեց, թե առարկայական չափորոշիչների փոփոխմանն ուղղված ինչ է արվել: Նա նաև հարցրեց, թե անհրաժեշտություն տեսնո՞ւմ է ունենալ ազգային կրթակարգ, որը նախկինում ունեցել են, սակայն «Հանրակրթության մասին» օրենքով միայն որոշ դրույթներ մտան օրենքի մեջ: Պատգամավորը նշեց նաև, որ մանկավարժները ուսուցչի թափուր տեղի ատեստավորման հարցեր են բարձրացնում,  և հետաքրքրվեց, թե անհրաժեշտություն չկա՞ կարգը փոխելու և համապատասխանեցնելու արդի չափանիշներին: Պատգամավորը հարցրեց 2,8 մլրդ արտադպրոցական ծախսերի մասին և փաստեց՝ նշված է` 1 ,9%-ով աճել է, ինչի՞ հիման վրա: ԿԳ նախարար Լևոն Մկրտչյանը պատասխանեց, որ չափորոշիչների փոփոխությունը նախատեսվել էր Համաշխարհային բանկի օգնությամբ. ավագ դպրոցի կրթակարգի անցումին զուգահեռ` պետք է անցնեին նաև առարկայական չափորոշիչների փոփոխմանը: «Բայց տեսանք, որ հնարավոր չէ առաձին սեգմենտ անել և հետո անցնել մեխանիկականի, այսինքն՝ չհասկանալով կրթական համակարգի ուղղությունները, դժվար է առարկայական չափորոշիչներ մուտք անել»,- ասաց նախարարը և նշեց, որ հենց դրա համար էլ կանգնեցրել են գործընթացը, որ անցնեն ազգային կրթակարգին: