Ուզում են թաղել հարցը, բայց չի ստացվելու

Ազգային ժողով-կառավարություն վերջին հարցուպատասխանի ժամանակ Նիկոլ Փաշինյանը հայտարարեց, որ պատրաստվում է ստեղծել 44-օրյա պատերազմի հանգամանքներն ուսումնասիրող ԱԺ հանձնաժողով:

Պարզվում է՝ Նիկոլ Փաշինյանը մտադիր է այդ հանձնաժողովում, բացի խորհրդարանական ուժերից, ներգրավել նաև իր շատ սիրելի արտախորհրդարանական ուժերի ներկայացուցիչներին: Արտախորհրդարանական քաղաքական ուժերի հետ համագործակցության խորհրդակցական ժողովի հերթական նիստին, ըստ պաշտոնական հաղորդագրության, ներկա են գտնվել «Հանրապետություն» կուսակցության նախագահ Արամ Սարգսյանը, Ազատական կուսակցության առաջնորդ Սամվել Բաբայանը, «Ալյանս» առաջադիմական ցենտրիստական կուսակցության ներկայացուցիչ Տիգրան Արզաքանցյանը, «Արդար Հայաստան» կուսակցության ղեկավար Նորայր Նորիկյանը, «Ինքնիշխան Հայաստան» կուսակցության ղեկավար Դավիթ Սանասարյանը, Հայաստանի եվրոպական կուսակցության ղեկավար Տիգրան Խզմալյանը, Հայաստանի Քրիստոնեա-ժողովրդավարական կուսակցության նախագահ Լևոն Շիրինյանը, «Միասնական հայրենիք» կուսակցության նախագահ Մհեր Տերտերյանը, Պահպանողական կուսակցության ղեկավար Միքայել Հայրապետյանը, Սոցիալ Դեմոկրատ Հնչակյան կուսակցության Հայաստանի վարչության ատենապետ Սեդրակ Աճեմյանը:

Նիկոլ Փաշինյանը ողջունել է ժողովի մասնակիցներին ու նշել. «Սա մեր այս ձևաչափի չորրորդ հանդիպումն է, և կարծում եմ, որ այս պահի դրությամբ կարող ենք ասել, որ այն՝ որպես խոսակցության հարթակ, կարևորում ենք: Եվ այն, որ այսօր այստեղ ներկա ենք, թերևս դրա վկայությունն է, և մեր առաջիկա անելիքը թերևս պետք է լինի այս հարթակն ավելի արդյունավետ դարձնելը և իր գործունեությունը կոնկրետ արդյունքներով պսակելը: Ինչքանով դա կհաջողվի՝ մեզնից է կախված: Իհարկե, ոչ մի երաշխիք չկա, բայց մեր նպատակադրումը հենց դա է: Այս պահի դրությամբ մենք ունենք մի շատ կոնկրետ որոշում, որ այս ֆորմատի երեք ներկայացուցիչներ պիտի ներգրավված լինեն 44-օրյա պատերազմի հանգամանքներն ուսումնասիրող քննիչ հանձնաժողովում»,- նշել է վարչապետ Փաշինյանը՝ շեշտելով, որ ներկայումս լուծումներ են փնտրվում՝ դե յուրե այդ հարցը կազմակերպելու համար։

Ի՞նչ են անելու Նիկոլին հավատարիմ մարդ-կուսակցությունների անդամներն այնտեղ: Ճիշտ եք, օգնելու են ավելի խորը թաղել վարչապետի մեղքը, որը չի սահմանափակվում պատերազմի 44 օրերով: Մեր պետության պարտությունն սկսվել էր դրանից շատ առաջ և շարունակվում է հիմա: Երբ ամիսներ առաջ, երբ Փաշինյանը ստեղծեց արտախորհրդարանական քաղաքական ուժերի հետ համագործակցության խորհուրդը, հասկանալի չէր, թե ի վերջո ինչ ակնկալիք ունի Փաշինյանը իրեն սատարող մարդ-կուսակցություններից։ Բանն այն է, որ վարչապետին կից արտախորհրդարանական ուժերի խորհրդում ներառված են հիմնականում այսպես կոչված հեղափոխությանը սատարող ուժեր։ Հիմա արդեն կարծես թե ամեն ինչ ընկնում է իր տեղը։ Այդ ուժերը Փաշինյանին պետք են պատերազմի և պարտության մեղքը թոթափելու, պարտության և ձախողումների խորքային պատճառները պարտակելու և լղոզելու համար։

Կա հայտնի ռուսական ասույթ՝ ուզում ես հարցը թաղել, ստեղծիր հանձնաժողով։
Հատկապես եթե այդ հանձնաժողովում Փաշինյանը նաև իր շատ սիրելի արտախորհրդարանականներին է մտցնելու, կարելի է չկասկածել, որ նրանք փորձելու են թաղել Փաշինյանի՝ որպես պատերազմող երկրի ղեկավարի, դավաճանության հասնող տգիտությունն ու պատմական պատասխանատվությունը։ Բայց սա այդ դեպքը չէ, չի ստացվելու, «Նիկոլ դավաճան» արտահայտությունը պատմական փաստ է, և ոչ մեկը այլևս դրանից Փաշինյանին փրկել չի կարող։

Հայկ Դավթյան