Սերժ Սարգսյանի «անեծքը» Կարեն Կարապետյանին

Հունիսի 29-ի կառավարության նիստը վարել է Սերժ Սարգսյանը, որը կարճ ելույթ է ունեցել և անդրադարձել կառավարության անելիքներին: Նա նշել է, որ կառավարության ծրագրի խորհրդարանական հաստատումը նշանակում է նոր շրջափուլի մեկնարկ, և «մեր խնդիրն է այդ շրջափուլը անցկացնել հնարավորինս անցնցում և արդյունավետ»: «Պետք է հետևողական բացատրենք մեր ունեցած սուղ միջոցները օպտիմալ բաշխելու և արդյունավետ կառավարելու կարիքը: Թափանցիկությունն ինքնանպատակ չէ, դրա հիմնական նպատակն է կոռուպցիայի և հովանավորչության վերացումը, պետական ծախսերի, գնումների համակարգը պետք է լինի ամբողջությամբ վերահսկելի թե խորհրդարանի, թե հասարակության համար: Այժմ մենք ներդնում ենք կոռուպցիայի դեմ պայքարի նոր և արդյունավետ միջոցներ, որոնք պետք է համադրվեն մեր նպատակասլաց աշխատանքին», ասում է Սերժ Սարգսյանը: Ապա` նշել է նաև, որ պետք է հետևողական աշխատեն արտաքին միջավայրը բարելավելու ուղղությամբ և պետք է աշխատեն ելնելով այն կանխադրույթից, որ մեր անբարյացակամ հարևանների հետ հարաբերություններում որևէ դրական բան առայժմ տեղի չի ունենում: Ըստ էության, Սերժ Սարգսյանը հասկացրել է, որ Ադրբեջանի կողմից առկա է պատերազմի բռնկման վտանգ, իսկ Թուրքիայի կողմից հարաբերությունները կարգավորելու և Հայաստան-Թուրքիա սահմանը բացելու ուղղությամբ չարժե որևէ դրական ակնկալիք ունենալ: Սերժ Սարգսյանի այցելության նպատակը կառավարություն, առհասարակ ունի մի քանի նշանակություն: Նա ցույց է տալիս, որ խորհրդարանական կառավարման անցած Հայաստանում ինքը ինչպես հիմա, այնպես էլ ապագայում` 2018-ից հետո, իրավիճակը հսկողն ու ղեկավարողն է լինելու: Բայց առավել հետաքրքրական են Սերժ Սարգսյանի ակնկալիքները Կարեն Կարապետյանից, այն բառապաշարը, որ նա օգտագործել է` ցույց տալով բացթողումները` թափանցիկություն, կոռուպցիայի և հովանավորչության վերացում, պետական ծախսերի, գնումների համակարգի վերահսկելիություն... Այսինքն, մի կողմից Սերժ Սարգսյանը պահանջներ է ներկայացնում Կարեն Կարապետյանին` մյուս կողմից, բոլորի համար պարզ է, որ վարչապետը չի կարող իրեն ազատություն տալ, հետևաբար ընկել է փակ շրջանի մեջ, ի ցույց դնելով իր անելանելիությունը, որում, խոշոր հաշվով, հայտնվել է ներկայիս կառավարությունը: Ու այստեղ է առավել քան ուշագրավ է Սերժ Սարգսյանի կողմից չինական ասացվածքի մասին հիշատակումը. «Հարգելի բարեկամներ, հաճախ է այս տարիներին հնչում չինացիներին վերագրվող ասացվածքը՝ շատերը սկսել են դա հնչեցնել, ըստ որի անեծք է որևէ մեկին մաղթել ապրել փոփոխությունների ժամանակ: Կարծում եմ, որ նման ժամանակներում ապրելը իսկապես դժվար է, բայց նաև հետաքրքիր...»: Իրավիճակն, իսկապես հետաքրքիր է, մանավանդ Կարեն Կարապետյանի համար, որն էլ փաստացի հայտնվել է, կարծես, «անիծվածի» կարգավիճակում. նրան հրապարակային` կառավարության ողջ անդամների ներկայությամբ, թափանցիկ աշխատելու, կոռուպցիայի և հովանավորչության դեմ պայքարելու դասեր են տալիս, բայց մյուս կողմից արդեն ամիսներ շարունակ այս կառավարությունը որևէ արդյունք ի վիճակի չէ ցույց տալ: Ամեն անգամ Սերժ Սարգսյանը, կարծես, վերջին նախազգուշացումն է հնչեցնում Կարեն Կարապետյանին, իսկ վերջինս էլ, կարծես, իր հերթին, հաշտվել է իր «ընդունակությունների» ու «հնարավորությունների» սահմանագծի հետ: Արդեն իսկ ակնհայտ է, որ Կարեն Կարապետյանն աշխատում է թևաթափ եղած և ինքն էլ գիտի, որ եթե անգամ շարունակի աշխատել` աշխատելու է Սերժ Սարգսյանի թելադրած խաղի կանոններով, ինքնագործունեություն թույլ չեն տալու: Դա լավագույն դեպքում, իսկ վատագույն դեպքում` Սերժ Սարգսյանի այսօրվա տոնայնությունը հուշում է, որ Կարեն Կարապետյանին մի քանի ամիս է մնացել «զվարճանալու», կամ «զվարճացնելու» համար: Իհարկե, Սերժ Սարգսյանը նաև սփոփիչ խոսքեր է ասել. «Հավատում եմ, որ կառավարությունը Կարեն Կարապետյանի գլխավորությամբ կարող է դա ամբողջովին անել: Անհրաժեշտ է կարծրատիպերից դուրս ստեղծագործական մոտեցումներ, և մեր ժողովուրդը հենց ձեզ է վստահել դրանք գտնելու և իրագործելու պատվաբեր առաքելությունը»: Բայց, երբ դրանից հետո խոսել է Կարեն Կարապետյանը` դրան հետևել է իսկապես հիշարժան մի միջադեպ: «Պարոն նախագահ, նախ շնորհակալ ենք այցի և խոսքերի համար: Ուզում ենք հավաստիացնել, որ այն ծրագիրը, որ ձևավորել է մեր թիմը, գործադիրը, իրագործելի է: Մենք շատ լավ հասկանում ենք ինչ սպասումներ ունի հասարակությունը մեզանից, շատ լավ հասկանում ենք, որ ճանապարհը հեշտ չի լինելու, բայց մենք վճռական ենք տրամադրված և բոլոր նախատեսված մեր ծրագիրը իրագործելու ենք», ասել է վարչապետը: Սրան էլ հետևել է Սերժ Սարգսյանի ոչ պակաս ուշագրավ արձագանքը. «Եթե հեշտ լիներ, պարո´ն վարչապետ, մինչև հիմա ամբողջը արած, պրծած կլինեիքն: Բոլորս դա գիտակցում ենք: Հաջողություն եմ մաղթում»: Կառավարության ամբողջ կազմի ներկայությամբ երկրի վարչապետին այսպիսի տոնայնությամբ «տեղը դնելը», թերևս, աննախադեպ է ՀՀ անկախության 26-ամյա պատմության մեջ: Սա վկայում է Սերժ Սարգսյանի մոտ առկա վերաբերմունքի ու տրամադրվածության մասին Կարեն Կարապետյանի անձի նկատմամբ, որն, ըստ երևույթին, դրական չես անվանի: Սերժ Սարգսյանն, իսկապես, ի ցույց է դնում Կարեն Կարապետյանի` «անիծված» լինելը... Թամար Բագրատունի