Քրեական տարրերն ակտիվանում են

Նոյեմբերի 14-ին և դեկտեմբերի 5-ին սպասվող ՏԻՄ ընտրությունները գործող իշխանությունների համար ստացել են կենացմահու նշանակություն:
Հոկտեմբերի 17-ի խայտառակ ֆիասկոյից հետո հասկանալով, որ, մեղմ ասած, այդքան էլ հեշտ չէ տեղերում հաղթանակ ապահովել, իշխանությունները մարզերում մոբիլիզացրել են իրենց հնարավոր ու անհնար բոլոր ուժերը՝ վարչականի լծակներից սկսած, վերջացրած քրեական տարրերով։ Քանզի նորմալ մարդիկ արդեն չեն էլ ցանկանում Փաշինյանի ու իր կուսակցության հետ համագործակցել, ընտրությունների ՔՊ-ական պատասխանատուների հույսը գողականներն ու քրեական ռեզերվն է, մի բան, որը նախկինում Նիկոլ Փաշինյանը դարձրել էր մատի փաթաթան եւ Սերժ Սարգսյանի իշխանությանը քննադատում էր հանցագործ տարրերին ընտրական գործընթացներին ներգրավվելու հարցում:
Օրինակ արդեն տեղեկություններ կան, որ Աբովյանի ՏԻՄ ընտրություններում իշխող Քաղպայմանագրի թեկնածուն Պավել Ցուգունյանն է, որը Կոտայքում ավելի հայտնի է Պաշ մականվամբ։ Պաշը Կոտայքի նախկին մարզպետ, ներկայումս շրջակա միջավայրի նախարար Ռոմանոս Պետրոսյանի կնոջ ազգականն է։ 2018-ից հետո Պաշը մարզում մի քանի պաշտոններ է զբաղեցրել՝ նախ նշանակվել էր մարզպետի օգնական և վարում էր Հրազդան բ/կ-ի վրա հաշվառված ավտոմեքենան, ապա նշանակվել է Կոտայքի մարզի ՋՕԸ-ի տնօրեն։ 2020 թվականի սեպտեմբերից Ցուգունյանը նշանակվել է «Հայանտառ» ՊՈԱԿ-ի տնօրենի պաշտոնակատար։ Աբովյանում նա հայտնի է աղմկահարույց միջադեպերից, համարվում է Ռոմանոս Պետրոսյանի թեկնածուն: Մամուլում տեղեկություններ կան, որ իշխանականները փորձում են ճնշումներ գործադրել նաև Աբովյանի գործող քաղաքապետ Վահագն Գևորգյանի վրա, որպեսզի նա այս ընտրություններում չառաջադրվի, քանի որ ՔՊ-ականներն լուրջ մտահոգություններ ունեն, որ 2019-ի սցենարը կարող է նորից կրկնվել և Գևորգյանը կարող է կրկին հաղթել։
Սեւանից էլ լուրեր են հասնում, որ գողականներ Ալիկ եւ Արա Բանդուրյան եղբայրներն են բավականին ակտիվ, նրանք էլ են աշխատում իշխանության թեկնածուի հաղթանակի համար: Ի տարբերություն այլ համայնքների, Սեւանում ընդգծված ընդդիմադիրներ չկան, անձերի պայքար է, շահերի պայքար , հասկանալի է, որ գողականների ներկայությունն ընդդիմադիր պրոցեսներին շատերին հետ է պահել դրանցից:

Ինչպես նշեցինք ոչ բոլորն են ցանկանում իշխանության թեկնածուն դառնալ: Ստեփանավանում համայնքապետի ժամանակավոր պաշտոնակատար Արմեն Գրիգորյանն է առաջնորդելու ցուցակը, մի մարդ, որն այդ պաշտոնում նշանակվեց պատերազմի ավարտից հաշված օրեր անց, երբ մեղմ ասած շունը Փաշինյանի ձեռքից պաշտոն չէր վերցնի:

Արարատում կոկորդիլոսների մեծ մասնագետ , Արարատի նախկին մարզպետ Գարիկ Սարգսյանն է առաջադրվելու, Իջեւանում շուրջերկու տարի ձգեցին ընտրական պրոցեսը, որովհետեւ Փաշինյանի քավորը զրո վարկանիշ ունի իր հայրենի քաղաքում, ի վերջո, նրան մարզպետ նշանակեցին, որպեսզի վարչական ռեսուրսները չխնայի եւ իր ընկեր Արտակ Ճաղարյանին դարձնի հարազատ քաղաք Իջեւանի քաղաքապետ:
Արթիկում ՔՊ-ի թեկնածուն գործող քաղաքապետ Մխիթար Վարագյանն է։
Մխիթար Վարագյանի՝ Ղազախստանում ապրող գործարար, մեծահարուստ եղբայր Դավիթ Վարագյանը Նիկոլ Փաշինյանի սիրելի Հայկ Սարգսյանի` ԱԺ պատգամավորի, հարսանիքի քավորն է:

Անի Սահակյան