Ռուբեն Վարդանյանի վճռորոշ քայլը. ում կընտրի նա

Սյունիքի մարզի Տաթեւ խոշորացված համայնքում հետաքրքիր իրավիճակ է ստեղծվել: Հոկտեմբերի 17-ին տեղի ունեցած ընտրություններից հետո Քաղպայմանագրի պատգամավորները շտապեցին հայտարարել, որ ՔՊ թեկնածուն այս համայնքում հաղթանակ է տարել, ավելի ուշ պարզ դարձավ, որ պարզապես առաջատարն է, բայց ձայների 50+1 քվոտային չի տնօրինում եւ չի կարող միանձնյա կառավարել համայնքը: Իշխանականները փորձեցին վարչական լծակների եւ քարոզչության գործադրմամբ տիրանալ Տաթեւում իշխանության, վերահաշվարկի դիմում ներկայացրեցին եւ ընդամենը մեկ ընտրատեղամասում կատարված հաշվարկից հետո ՔՊ թեկնածուն հայտարարեց, որ խնդիրը լուծվեց, ինքն ունի 50+1, բայց էլի ավելի ուշ պարզվեց, որ խնդիրը չի լուծվել: Հիշեցնենք, որ Տաթևում ավագանի են անցել Շանթ դաշինքն ու Ապրելու Երկիր կուսակցությունները, առաջինի հիմնադիրը Շահեն Հարությունյանն է՝ Շանթի որդին, երկրորդը գործարար Ռուբեն Վարդանյանը, սակայն կուսակցության հիմնադիրները Մանե Թանդիլյանն ու Մեսրոպ Առաքելյանն են: Շահեն Հարությունյանը լրատվամիջոցերին հայտնել է, որ Տաթեւում իրականացված վերահաշվարկի արդյունքում Շանթ դաշինքի եւ Ապրելու երկիր կուսակցությունների ձայների գումարը կազմում է 1289 , իսկ ՔՊ-ինը՝ 1288: Այսինքն՝ իշխանությունը չունի մեծամասնության մանդատ, որպեսզի կարողանա միայնակ կառավարել համայնքը եւ պետք է կոալիցիաներ ձեւավորվեն: Պատասխանելով հարցին, թե կոալիցիա կազմելու հարցում ունե՞ն պայմանավորվածություն «Ապրելու երկիր» կուսակցության հետ, Շահեն Հարությունյանը պատասխանել է, որ «Ապրելու երկիր կուսակցության հետ շփումները եղել են դեռևս ընտրությունների արդյունքների և վերահաշվարկի հետ կապված, իսկ առաջիկա օրերին կքննարկեն հարցը:

Փաստացի Ռուբեն Վարդանյանից եւ իր կուսակցությունից է կախված, թե ով կլինի Տաթեւում իշխանությունը, մամուլում տեղեկություններ կան, որ չի բացառվում նրանք համագործակցեն իշխանությունների հետ: Ըստ էության Տաթեւում կտրվի այն կարեւոր հարցի պատասխանը, թե ինչ առաքելությամբ է խոշոր գործարարը մտել քաղաքականություն , նա Նիկոլ Փաշինյանի հետ ունի պայմանավորվածություն, թե որոշել է իսկապես Հայաստանի ընդդիմադիր դաշտում որպես նոր ուժ հանդես գալ:
Շահեն Հարությունյանը հայտնել է, որ երկուշաբթի տեղի կունենա Տաթեւի ավագանու առաջին նիստը եւ այդ նիստում պետք է քաղաքապետ ընտրվի ու այդ օրը կտրվեն բոլոր հարցերի պատասխանները:

Հարկ է նշել, որ Ապրելու երկիր կուսակցությունը Տտաթեւում ստացել է 337 ձայն, մոտավորապես երեք անգամ ավելի պակաս, քան Շանթ դաշինքը:
Հիշեցնենք նաեւ, որ այս դաշիքով է առաջադրվել նաեւ Կապանի գործող համայնքապետ Գեւորգ Փարսյանը, Կապանի ընտրությունները տեղի կունենան նոյեմբերի 14-ին:

Անի Սահակյան