Բերանները ջուր առած «դուխովները»
ՀՀ սահմաններից ահազանգող տեղեկությունները չեն դադարում, սակայն իշխանությունները զբաղված են իշխանությունն ամրապնդելու ներքին գործընթացներով, ի մասնավորի՝ ՏԻՄ ընտրություններով:
Պաշտպանության փոխնախարարն ու խորհրդարանի անվտանգության հանձնաժողովի իշխանական պատգամավորները բերանները ջուր էին առել եւ չէին արձագանքում հայ-ադրբեջանական սահմանից՝ Սյունիքից և Գեղարքունիքից եկող լուրերին, թե ադրբեջանական զինված ուժերը առաջինի դեպքում առաջխաղացում ունեն, երկրորդի դեպքում էլ Հայաստանի ինքնիշխան տարածքի այն հատվածներում, որտեղ հաստատվել էին մայիսին, ակտիվ ամրաշինական աշխատանքներ են կատարում։
Մասնավորապես Փայլասարը ադրբեջանցիներին զիջելու մասին վերջին տեղեկությունները պաշտպանության փոխնախարարը ամեն գնով շրջանցում է՝ հղում անելով ԱԱԾ հաղորդագրությանը, որը հերքել էր տեղեկությունը, մինչդեռ մենք բազում նման հերքումներ ենք լսել, իսկ ժամանակի ընթացքում իրականությունը ջրի երես է դուրս եկել:
Ինչ վերաբերում է ԱԱԾ-ի հայտարարությանը, դրա մեջ ընդդիմադիր պատգամավոր Աննա Գրիգորյանը այդուհանդերձ խնդիր է տեսնում, այդ մասին բարձրաձայնեց այսօր Պաշտպանության և անվտանգության հանձնաժողովի նիստին.«Եթե դելիմիտացիա տեղի չի ունեցել, ինչո՞ւ է ԱԱԾ-ն իր հաղորդագրության մեջ ասում, որ դա պետական սահման է, ի վերջո դա լեգիտիմացնում է այն, որ ադրբեջանցիներն այս պահին գտնվում են ճիշտ այն դիրքում, որտեղ պետք է գտնվեին, մինչդեռ դա պետական սահման չէ, իմ ամբողջ ասածի իմաստը դա էր», - նշեց Գրիգորյանը։
Կապանի քաղաքապետ Գևորգ Փարսյանն է «Զանգեզուր TV»-ին նոր մանրամասներ պատմել Փայլասարի վերաբերյալ։ Նրա խոսքով, սարը դեռ դեկտեմբերին է զիջվել, և այս ընթացքում տեղում հսկողություն են իրականացրել ռուս սահմանապահները։ Բայց օրերս, Փարսյանի համար անհայտ պատճառներով, ռուսներն իջել են բարձունքից, և վերահսկողությունն անցել է Ադրբեջանին. - «Այդ հատվածը կարևոր բարձունք է, ստրատեգիական նշանակություն ունեցող հատված է մեր համար։ Հիմա ռուսների բացակայության պատճառով ամբողջովին այդ հատվածը անցավ արդբեջանցիների վերահսկողության ներքո»։
Ինչ վերաբերում է Գեղարքունիքի սահմանին, դեռեւս երկու օր առաջ ՀՀ ՄԻՊ-ը հաղորդեց, որ ողջ երկայնքով ադրբեջանցիներն ամրաշինական աշխատանքներ են իրականացնում :
ՊՆ փոխնախարարը խորհրդարանում լրագրողների հետ զրույցում բերանը ջուր էր առել եւ ոչ հերքում, ոչ հաստատում էր օմբուդսմենի հայտնած տեղեկատվությունը: Միայն օրվա վերջոմ, հավանաբար, թիվ մեկ պատասխանատուի հրահանգով ՊՆ-ն հաղորդագրություն տարածեց՝ Թաթոյանի հայտարարությունը որակելով ուռճացված՝ պնդելով, թե «ադրբեջանական կողմի նման աշխատանքների փորձերը կանխվում են հայկական Զինված ուժերի կողմից»։
Մինչդեռ փաստը, որ ընդդիմադիր պատգամավորներին չեն թույլատրում այցելել սահմանային զորամասեր, դիրքեր, ինչի մասին հրապարակային հայտարարում է Պատիվ ունեմ խմբակցության պատգամավոր Տիգրան Աբրահամյանը, վկայում է այն մասին, որ ոչինչ էլ ուռճացված չէ: Եւ, ահա, այս հույժ կարեոր հարցերն պատասխանելու փոխարեն հոխորտում ու գլուխ են գովում Սյունիքում ոստիկանական զորքեր լցնելու, վախի մթնոլորտ ձեւավորելու համար: Սյունեցի պատգամավոր Արմեն Խաչատրյանը, որ հավանաբար հետընտրական դեպրեսիայի մեջ էր խայտառակ պարտությունից հետո, երեկ լրագրողներին մերժում եւ հարցազրույց չէր տալիս, բայց հասցրեց փոխանցել, որ լավ են արել, Գորիսում ոստիկաններ են լցրել: Արմեն Խաչատրյանին խորհուրդ կտանք իրենց դուխը ցուցադրել թշնամու հետ փոխհարաբերություններում եւ Ալիեւին պատասխանել իրենց ուղղված նվաստացումների ու վիրավորանքների համար, այլապես Գորիսում երեւաց՝ ով ինչ է լավ անում:
Անի Սահակյան
Հետևեք մեզ Viber-ում
