Փաշինյանը բավարարում է Ալիեւի հերթական պահանջը

Կառավարությունն իր հոկտեմբերի 14-ի նիստում հավանություն է տվել «ՀՀ քաղաքացու անձնագրի մասին» և «Նույնականացման քարտերի մասին» օրենքներում փոփոխությունների նախագծին:
Հարցն ընդգրկված էր չզեկուցվող 42 նախագծերի մեջ : Փոփոխության ն պատակը անձնագրերում ծննդավայրի սյունակում երկրի փոխարեն նշել ծննդյան մարզը կամ շրջանը կամ քաղաքը կամ ավանը կամ գյուղը:
Ըստ օրենքի նախագծի հիմնավորման՝ գործող օրենքով ՀՀ քաղաքացու անձնագրի մեջ ծննդյան վայրը դաշտում նշվում է այն պետությունը, որի տարածքում քաղաքացին ծնվել է:
«Այս մոտեցումը առաջացնում է խնդիրներ այն դեպքերում, երբ քաղաքացու ծննդյան վայրը Հայաստանի Հանրապետության կողմից չճանաչված պետություն է կամ միջազգայնորեն վիճարկելի տարածք: Հարցը քննարկվել է ՀՀ արտաքին գործերի նախարարության հետ, որտեղից ստացվել է միջազգային փորձի վերաբերյալ ուսումնասիրություն առ այն, որ աշխարհի զարգացած երկրների ճնշող մեծամասնությունն իր քաղաքացիներին տրամադրվող անձնագրերում որպես ծննդյան վայր նշվում է ոչ թե պետությունը, որտեղ ծնվել է տվյալ անձը, այլ ծնվելու քաղաքը, ավանը կամ շրջանը, որոշ երկրներ՝ նաև պետությունը»,- ասվում է հիմնավորման մեջ շարունակելով.«Այս դիրքորոշման ձեւավորման հիմքում դրվել է այն հանգամանքը, որ հաշվի առնելով միջազգային չափանիշները, ցանկացած այնպիսի դեպքում, երբ «ծննդյան վայրը» դաշտում կոնկրետ պետություն նշելը խնդրահարույց է կամ որեւէ այլ հիմնավոր կամ ակնհայտ պատճառով նպատակահարմար չէ, պետությունները քաղաքացիների անձնագրում նշում են միայն անձի ծննդյան քաղաքը, ավանը, գյուղը կամ շրջանը` հիմք ընդունելով այդ փաստը հավաստող փաստաթուղթը (ծննդյան վկայական, օտարերկրյա անձնագիր, այլ փաստաթուղթ)։ Արդյունքում, առաջարկվել է ՀՀ օրենսդրության մեջ եւս կատարել համապատասխան փոփոխություններ` քաղաքացուն հնարավորություն ընձեռելով իր ցանկությամբ որպես ծննդավայր նշել այն տարածքը, որտեղ ծնվել է (կից ներկայացվում է ՀՀ արտաքին գործերի նախարարության համապատասխան գրությունը), ինչն էլ հիմք է հանդիսացել սույն հոդվածով նախատեսվող օրենսդրական փոփոխության համար»,-գրված է նախագծի հիմնավորման մեջ:

Եւ չնայած այս փոփոխություն իմպերատիվ նորմ չէ, սակայն դա ժամանակի հարց է եւ Նիկոլ Փաշինյանի ու իր իշխանության գործողությունները հուշում են, որ շատ մոտ ապագայում այն դառնալու է իմպերատիվ, իսկ գլխավոր նպատակն այն է, որ արցախցիները այսուհետ իրենց անձնագրերում չնշեն պետության անվանում, այլ նշեն այն գյուղը կամ քաղաքը, որտեղ ծնվլ են: Չի բացառվում , որ սա Ալիեւի հերթական գաղտնի պահանջն է Նիկոլ Փաշինյանին ուղղված, որը վերջինս փորձում է իրագործել առանց դիմադրության, սիրով ու հանդուրժողականությամբ: Ինչպես օրինակ ենթարկվեց Արցախ ոտք չդնելու, Արցախ չայցելելու պահանջը: Ալիեւի գերխնդիրն է աշխարհի երեսից ջնջել Արցախ անունը, իսկ նրան այդ հարցում անդուլ ջանքերով օգնում է Նիկոլ Փաշինյանը, ով համարձակություն չունեցավ նույնիսկ Արցախի անկախության 30-ամյակին այնտեղ այցելել,իսկ իշխող թիմը խորհրդարանում մի քան անգամ տապալեց Արցախի հարցերով զբաղվող հանձնաժողով ստեղծելու գաղափարը:

Անի Սահակյան