Սարգսյան-Թրամփ հանդիպում` Պուտինի հայացքի ներքո՞
ԱՄՆ-ի ու Հայաստանի դիվանագետները քննարկում են նախագահների մակարդակով հանդիպման հարցը, որի ժամկետը հայտնի կդառնա երկու երկրների արտգործնախարարների հանդիպումից հետո, Sputnik Արմենիայի հետ զրույցում հայտնել է Հայաստանում ԱՄՆ դեսպան Գրիգոր Հովհաննիսյանը: «Իհարկե, ինչ-որ փուլում պետք է դա կազմակերպել (երկու երկրների նախագահների հանդիպումը)… Հայաստանում գործընթացներ են տեղի ունենում։ Մենք խորհրդարանական հանրապետություն ենք դառնում։ Պետք է ամենաբարձր մակարդակով հայտնել այդ մասին ԱՄՆ–ի գործընկերներին` երկրի ղեկավարությանը», նշել է դեսպանը։ Հովհաննիսյանի խոսքով՝ արդեն պետք է պատրաստվել հանդիպմանը և սկզբի համար հանդիպում կազմակերպել արտաքին գործերի նախարարների մակարդակով: «Կպատրաստենք օրակարգը, և, հավանաբար, դրանից հետո կնախապատրաստվենք նախագահների մակարդակով հանդիպմանը»,– պարզաբանեց նա։ Ընդ որում, նա նշեց, որ հանդիպման ժամկետը դեռ հայտնի չէ։ Դիվանագետը հույս ունի, որ ԱՄՆ–ը Հայաստանի հետ հարաբերություններ կառուցելիս հաշվի է առնելու Ռուսաստանի հետ նրա ռազմավարական գործակցությունը։ «Մենք Ռուսաստանի հետ կարևոր ռազմավարական հարաբերություններ ունենք, բայց դա չի բացառում Միացյալ Նահանգների հետ լավ հարաբերությունները։ Մեկը մյուսին պետք է չխանգարի։ Հույս ունենք, որ մեր դիրքորոշումը հասկանալի կլինի Վաշինգտոնի նոր անձնակազմին»,– ամփոփեց նա։ Պաշտոնական Վաշինգտոնը` ի դեմս Հայաստանում ԱՄՆ դեսպանի, պարբերաբար և նախանձելի հաճախականությամբ կարևոր ուղերձներով է հանդես գալիս` Հայաստանի զարգացման հեռանկարների ու առաջնահերթ լուծում սպասող խնդիրների վերաբերյալ` կոռուպցիա, տնտեսական ազատություններ, մենաշնորհների վերացում: Այս ամենին գումարվեց վերջերս Հայաստանի էներգետիկ ոլորտում 8 միլիարդ դոլարի ներդրումների հեռանկարի մասին արձանագրումը և ամերիկյան հետաքրքրվածությունն այս ոլորտի նկատմամբ: ԱՄՆ-ում նոր վարչակազմի հետ հարաբերություններն ավելի բարձր մակարդակի հասցնելու ուղղությամբ մեծ սպասումներ ունի նաև Բաքուն, որը Օբամայի վարչակազմից ակնհայտորեն դժգոհ էր: Ավելին` Ադրբեջան-ԱՄՆ հարաբերությունները աննախադեպ լարվել էին: Հիմա Ալիևը փորձելու է ջերմացնել այդ հարաբերությունները: Իսկ Հայաստանը ի՞նչ քաղաքականություն է մշակում ԱՄՆ իշխանությունների հետ հարաբերությունների ուղղությամբ: Այդ հարաբերությունների 180 աստիճանի փոփոխություն, իհարկե, ոչ ոք չի էլ ակնկալում, բայց կան հարցեր, խնդիրներ, որոնք կոնկրետ ոլորտներում ամերիկյան հետաքրքրությունների առումով պետք է բավարարվեն` ի շահ Հայաստանի Հանրապետության քաղաքացիների և տարածաշրջանային անվտանգության: Պարզ է, որ Լեռնային Ղարաբաղի խնդրի խաղաղ լուծման և Հայաստան-Թուրքիա հարաբերությունների կարգավորման հարցերը Հայաստան-ԱՄՆ փոխհարաբերություններում կունենան իրենց տեղը, այլ հարց է, թե Վաշինգտոնի ակտիվությունն այս հարցերում որքան կլինի, և առհասարակ առաջնահերթություն կլինի՞ այս հարցերում, թե՞ ոչ... Բայց այս կարևորագույն` Հայաստան-ԱՄՆ հարաբերություններում առաջնահերթությունների ճշգրտման հրամայականի պայմաններում ի՞նչ ենք տեսնում... ԱՄՆ–ում Հայաստանի դեսպան Գրիգոր Հովհաննիսյանը Սարգսյան-Թրամփ հնարավոր հանդիպման մասին առաջին «մեսիջը» հրապարակայնացնելիս ընդամենը հույս է հայտնում, որ Երևանի հետ հարաբերություններ կառուցելիս Վաշինգտոնը հաշվի կառնի Հայաստանի և Ռուսաստանի ռազմավարական գործընկերությունը։ Մինչև ե՞րբ է հայկական դիվանագիտությունը այլ երկրների հետ փոխհարաբերություններում հիշեցնելու Ռուսաստանի հետ ռազմավարական հարաբերությունների առկայությունը: Նրանց թվում է արևմուտքում մարդիկ մոռացե՞լ են, որ Հայաստանը Ռուսաստանի ազդեցության գոտում գտնվող երկիր է և անընդհատ դրա մասին պետք է պաշտոնապես հայտարարե՞լ... Թե՞ ամեն պատեհ առիթ պետք է ծառայեցնել` Հայաստանի ինքնուրույնության աստիճանն էլ ավելի փոքրացնելու համար... Թամար Բագրատունի