Նիկոլ Փաշինյանը «ծանր հրետանի» է տեղակայել Սյունիքում

Հոկտեմբերի 17-ի ՏԻՄ ընտրություններին ընդառաջ Սյունիքում կենացները քաղցրանում են: Մի քանի օր է տեղեկատվություն է սփռվում առ այն, որ իշխող Քաղպայմանագրի շտաբում իրար են ուտում, մարզպետի կողմնակիցները դուրս են եկել ընտրությունների այսպես կոչված համակարգող պատգամավոր Արմեն Խաչատրյանի դեմ, ռազբորկաներ են անում, քաշքշում իրար: Արտաքուստ տարօրինակ թվացող այս իրավիճակը միանգամայն բնական է եւ վկայում է այն մասին, որ իշխող ուժն առաջնորդվում է ոչ այնքան գաղափարական շաերով, ինչպես ներկայացնում է Նիկոլ Փաշինյանը, որքան նեղ-անձնական, խմբակային: Խնդիրն այն է, որ Սյունիքի համայնքապետերի թեկնածուներից գրեթե բոլորը Խաչատրյանի մտերիմներն են, մինչդեռ ՔՊ-ից այլ հավակնորդներ եւս եղել են ու մերժվել, բացի դա Սյունիքի մարզին ընտրություններից առաջ 1 միլիարդ դրամ է փոխանցվել։ Հիշեցնենք, որ նախորդ ընտրություններից մեկ շաբաթ առաջ եւս 500 միլիոն էր փոխանցվել, ինչ-որ հիմնադրամի միջոցով այդ գումարը սոցիալական աջակցության անվան տակ որպես ընտրակաշառք են բաժանում: Մի խոսքով՝ Սյունիքի ՔՊ կառույցում թշնամական մթնոլորտ է, այս պառակտված մթնոլորտում շատ հնարավոր է սայլուտը ներսից խփի եւ հօդս ցնդեն իշխանության ջանքերը Սյունիքը զավթելու ուղղությամբ:

Հիշեցնենք, որ Գորիսի համայնքապետ Առուշ Առուշանյանի եւ նրա տեղակալներին առաջադրված մեղադրանքը վերաբերում է սոցիալական աջակցությանը` երկար նախաքննությունից հետո դատախազությունը որոշել է, որ նախընտրական փուլում սոցիալապես անապահովներին տրամադրված գումարները տրվել են մի նպատակով, որ նրանք քվեարկեն «Հայաստան» դաշինքի օգտին:

Չնայած Առուշ Առուշանյանը կալանավայրում է, սակայն նա նույնպես մասնակցելու է ընտրություններին։ Իշխանություններն այս ընթացքում ամեն ինչ արեցին, որ չեզոքացնեն Առուշանյանին, հիմա էլ ամեն ինչ անում են, որ նա մնա բանտում եւ չհաղթի ընտրություններում, փոխարենը Նիկոլ Փաշինյանը իրենց թեկնածուի համար Գորիսում է կենտրոնացրել իր ծանր հրետանին, վերջին օրերին քաաքից տղեկություններ ենք ստանում, որ Տիգրան Ավինյանն ու Սամվել Բաբայանը դուրս չեն գալիս քաղաքից, երեկոյան հավաքներ են կազմակերպում, օրինական եւ ապօրինի միջոցնեով մոբիլիզացնում են ուժերը, որպեսզի ՔՊ թեկնածու, երբեմնի ՀՀԿ-ական մաքսայինի պաշտոնյա Վլադիմիր Աբունցը դառնա Գորիսի քաղաքապետ:

Առուշանյանը, հիշեցնենք, 2017 թվականին 97 տոկոս ձայնով էր ընտրվել քաղաքապետ։ Հիմա իշխանությունները փորձում են մի կողմից վախի մթնոլորտ ձեւավորել Գորիսում, մյուս կողմից՝ պետական միջոցներով տարատեսակ օգնություններ եւ սոցիալական ծրագրեր իրականացնել խոշորացված համայնքում, որպեսզի իրենց կողմը գրավեն Առուշանյանի ընտրազանգվածին։ Սակայն գորիսեցիները պետք է հասկանան, որ սա քաղաքական պայքարից զատ իրենց գոյության պայքարն է եւ , այո, կախված այն հանգամանքից, թե ով կլինի իրենց համայնքի ղեկավարը, կորոշվի նաեւ իրենց ապագան՝ կհայտնվեն թուրքի լծի տակ՝ ճանապարհ կամ միջանցք բացելով Նիկոլ Փաշինյանի կիրթ բարեկամնեի առջեւ եւ դիմադրությամբ կկոտրեն հակապետական ցանկացած ձեռնարկ, ինչն անում էր Առուշանյանը եւ ինչի համար հայտնվեց Նիկոլ Փաշինյանի թիրախում:

Անի Սահակյան