Ուշագրավ երկխոսություն Քննչական կոմիտեում Նիկոլ Փաշինյանի և Արգիշտի Քյարամյանի միջև

Քննչական կոմիտեի կազմավորման 7-ամյակին նվիրված հանդիսավոր նիստի ժամանակ Նիկոլ Փաշինյանը հայտարարել է, թե կարևոր է համարում, որ հանրությունն ստանա ամբողջական պատասխաններ 44-օրյա պատերազմի հանգամանքների և ամբողջ պատկերի վերաբերյալ: <<Իհարկե չեմ կարծում, թե այդ պատասխանները պիտի ակնկալենք միայն Քննչական կոմիտեից, որովհետև, ի վերջո, խնդիրն ավելի լայն համատեքստ ունի, և կարծում եմ՝ Ազգային ժողովի քննիչ հանձնաժողովն այդ լայն համատեքստին ավելի ընդարձակ կանդրադառնա:

Բայց նաև կարևորում եմ պատերազմի հանգամանքների հետ կապված քրեական գործերի արդյունավետ նախաքննությունը, որպեսզի մեր հանրությունը և մեր նահատակների հարազատները կոնկրետ հարցերին ստանան կոնկրետ պատասխաններ: Ընդ որում, այստեղ որևէ կանխավարկած նկատի ունենալը կլինի ճակատագրական սխալ: Պարզապես պետք է ձևակերպված հարցերն ստանան օբյեկտիվ պատասխաններ, որպեսզի մեղավորության կամ անմեղության մասին պնդումները հիմնված չլինեն անհատական ընկալումների և իրավիճակի ոչ ամբողջական պատկերացման վրա>>,- նշել է Փաշինյանը։

Անդրադառնալով 2020 թվականի սեպտեմբերից մինչ օրս կատարված աշխատանքներին՝ Քննչական կոմիտեի նախագահ Արգիշտի Քյարամյանը նշել է, որ ՔԿ քննիչներն այդ ժամանակաշրջանում աշխատել են գերծանրաբեռնվածության պայմաններում, և դա շարունակվում է նաև այսօր՝ պայմանավորված հարուցված քրեական գործերի մեծաթիվությամբ ու նախաքննության գործընթացով: Նրա խոսքով՝ ՔԿ համապատասխան ստորաբաժանումն այժմ քննում է պատերազմի ընթացքում զինվորական ծառայության կարգի դեմ ուղղված հանցագործությունների վերաբերյալ քրեական գործերը, և ՔԿ-ն ի զորու է իրականացնել բազմակողմանի և օբյեկտիվ քննություն՝ 44-օրյա պատերազմի հանգամանքները լիարժեք բացահայտելու և հասարակությանը ներկայացնելու նպատակով:

Այսպիսով՝ կարծես թե բացահայտվում է այն վեհ նպատակը, որի համար Նիկոլ Փաշինյանը Արգիշտի Քյարամյանին գործուղեց ՔԿ։ Կառույցի հիմնադրման հանդիսավոր նիստի ընթացքում տեղի ունեցած ուշագրավ երկխոսությունը թերևս վկայում է, որ Քննչական կոմիտեում Արգիշտի Քյարամյանի առաքելությունը 44-օրյա պատերազմի գործով Նիկոլ Փաշինյանին և իր սեփական պատասխանատվությունը մաքրելն ու պարտության համար մեղավորներ գտնելն է։ Իրականում սակայն, եթե երբևէ իրական քննություն անցկացվի, իսկ դա անպայման արվելու է, ապա Փաշինյանն ու Քյարամյանը առաջինը պետք է կանչվեն հարցաքննության՝ պատերազմը նախ չկանխելու, ապա նաև օր առաջ չկանգնեցնելու, ինչպես նաև բազմաթիվ մութ գործերի համար, որոնց մասին առ այսօր խոսում են, սակայն հստակ պարզաբանումներ ու պատասխաններ չեն տրվել։

Մասնավորապես Փաշինյանը պետք է բացատրի, թե այդ ի՞նչ էր արել այն ժամանակվա ԱԱԾ պետ Արգիշտի Քյարամյանը, որ ինքը պատերազմի ամենաթեժ պահին նրան ազատեց պաշտոնից։ Պաշտոնից ազատված Քյարամյանը մինչև պատերազմի վերջին օրը ի՞նչ իրավասությամբ էր մասնակցում հրամկազմի գաղտնի խորհրդակցություններին, ո՞ւմ և ի՞նչ էր զեկուցում այդ ընթացքում։ Սրանք հարցեր են, որոնց երբևէ Քյարամյանն ու Փաշինյանը ստիպված են լինելու պատասխանել։ Պարզ է, որ առայժմ Փաշինյանը Քյարամյանի օգնությամբ փորձելու է, իրավիճակը գլխիվայր շուռ տալով, բոլորովին այլ մարդկանց, միանգամայն այլ հարցեր ուղղել, որպեսզի շեղի ուշադրությունը կատարվածի իրական բացահայտումից։ Այս թեմայի հետ կապված անհանգստությունը, սակայն, մնում է, և Փաշինյանն ակամա մատնել է ինքն իրեն՝ 44-օրյա պատերազմում տեղի ունեցածի բացահայտման հանձնարարությունը տալով հենց Քյարամյանին, մի մարդու, որի անունը հնարավոր և ենթադրյալ դավադիր օպերացիաների կազմակերպման հարցում ամենաշատն էր շրջանառվում։

Հայկ Դավթյան