Փոխնախարարն ապտակեց Փաշինյանին

Պատերազմից հետո Նիկոլ Փաշինյանն ու իր թիմը, ինչպես նաեւ պետական քարոզչական մեքենան փորձում են ՀՀ սահմանների հետ կապված այսօրվա անմխիթար վիճակի պատճառները գցել նախկինների գրպանը, հայտարարում են, որ դեռեւս 2010 թվականին ընդունված Վարչատարածքային օրենքով է որոշվել Հայաստանի եւ Ադրբեջանի սահմանը եւ որ այդ օրենքով Շուռնուխից ու Որոտանից հետո սկսվում է Ադրբեջանը: Իհարկե նախկինները շուրջ մեկ տարվա ընթացքում փորձում են բացատրել, որ այդ օրենքը ըստ էության կապ չունի Հ պետական սահմանի հետ, ավելին մինչ օրս Հայաստանի ու Ադրբեջանի սահմանը որոշված չէ, իսկ եթե անգամ ունի, ապա այդ օրենքն ընդունվել է 1995 թվականին՝ Փաշինյանի քաղաքական կնքահոր՝ Լեւոն Տեր Պետրոսյանի իշխանության տարիներին:

Այսօր խորհրդարանում հերթական նիստի ընթացքում Նիկոլ Փաշինյանի կառավարության փոխնախարարը նույնպես հերքեց Փաշինյանին՝ ասելով, որ այդ օրենքը պետական սահմանի մասին չէ:
Տարածքային կառավարման և ենթակառուցվածքների փոխնախարար Վաչե Տերտերյանը պատասխանելով ընդդիմադիր պատգամավորներից մեկի հարցին, թե կարո՞ղ է արդյոք երկրի պետական սահմանը որոշվել նախկինների կողմից ընդունված վարչատարածքային բաժանման մասին օրենքով, Տերտերյանն առանց մի վայրկյան մտածելու հայտարարեց՝ ոչ:
Ընդդիմադիրները հիշեցնում էին վարչապետ Նիկոլ Փաշինյանի հայտարարությունները, թե Ադրբեջանի հետ Հայաստանի սահմանների նկարագրությունը տրվել է դեռևս 2010-ի ընդունված օրենքով։ «Հայաստան» դաշինքից Արծվիկ Մինասյանն ու Արթուր Խաչատրյանը, մասնավորապես հիշեցնելով Տերտերյանի երկարամյա փորձը կառավարությունում, փորձեցին ճշտել:«Դուք նաև լսել եք մեղադրանքները հնչեցված այդ օրենքին, ձևակերպումներին, թե իբր այդ օրենքով նկարագրված են Հայաստանի Հանրապետության պետական սահմանները, այդ թվում` Ադրբեջանի հետ: Դուք այս տեսակետի կո՞ղմ եք», - հարցրեց Մինասյանը.«Ես չեմ լսել որևէ հիմնավորում, երբ ասվել է, որ սահմանները որոշվում են «Վարչատարածքային բաժանման մասին» օրենքով, ոչ ոք այդպիսի բան չի ասել, համենայն դեպս իմ հիշողության մեջ այդպիսի բան չկա և՛ հին, և՛ նոր ժամանակաշրջաններում», - նորերին եւս հիշատակելով փորձեց իրեն ապահովագրել Տերտերյանը:
Արթուր Խաչատրյանն էլ, խոստանալով ուղարկել ձայնագրություններ, նկատեց. «Կարծում եմ` նաև նիստերի արձանագրություններ կան, որտեղ հստակ հստակ հղում է նշվում, որ սահմանը, այսօր թուրքերը եկել են Շուռնուխ, որովհետև 2010 թվականին ընդունվել է օրենքի փոփոխություն, որն ասում է, որ Շուռնուխից արևելք Ադրբեջան է, չնայած որևէ կոնկրետ կորդինատ չկա, թե Շուռնուխից ինչքան հեռու է անցնում Ադրբեջանը»:
ԱԺ փոխխոսնակ Ռուբեն Ռուբինյանը անհասկանալի բառախաղի դիմեց,ասելով, նախ, որ ոչ մեկ չի պնդել, ապա ավելացնելով՝ պնդումն այլ է՝ այն պատգամավորները, որոնք ժամանակին քվեարկել են այդ նախագծի օգտին, նաև քվեարկել են դրանում ներառված պնդման կողմ: Այսպիսով, Վաչե Տերտերյանը համալրեց այն պաշտոնյաների շարքը, ովքեր հանդգնում են, լինելով այս կամ այն պաշտոնի, հերքել Փաշինյանի և իր մերձավոր թիմակիցների առաջ քաշած թեզերը: Պարզ ասած՝ Տերտերյանն ապտակեց Փաշինյանին, ով ԱԺ ամբիոնից անձամբ էր պնդում, որ ՀՀ պետական սահմանները կարող են որոշվել վարչատարածքային բաժանման մասին օրենքով, երկար տարիներ այս ոլորտում աշխատած Տերտերյանը իր հերթին հերքում է վարչապետին: Հաշվի առնելով փաստը, որ Փաշինյանը չի ներում այլակարծությունը իր քաղաքական թիմի ներսում, կարելի է սպասել, թե ինչ կտտանքների է ենթարկվելու փոխնախարարը:
 

Անի Սահակյան