Արցախը դե ֆակտո անկախ պետություն է եւ պաշտոնական Թել-Ավիվը հաշվի է նստում դրա հետ. Էսկին. armtimes.com

Իսրայելցի հայտնի քաղաքագետ, հասարակական գործիչ Ավիգդոր Էսկինն Արցախում հանդիպել է տեղի բարձրագույն իշխանության ներկայացուցիչների հետ եւ քննարկել համագործակցության հեռանկարներին վերաբերող հարցեր:Diplomat.am նախագծի նախաձեռնությամբ Ստեփանակերտում իսրայելցի գործիչը հանդիպել է ԱԺ պատգամավորների հետ, ներկայացրել Իսրայելի քաղաքականությունը հարավկովկասյան տարածաշրջանի զարգացումների վերաբերյալ եւ իր տեսլականը Արցախի հետ Իսրայելի համագործակցության առումով:Արցախի խորհրդարանում ելույթի ժամանակ Ավիգդոր Էսկինը ընդգծել է, որ Արցախ է ժամանել այն ավելի մոտիկից ճանաչելու, արցախցիներին ավելի լավ հասկանալու, ինչպես նաեւ այցից ստացած տպավորություններով Իսրայելում կիսվելու համար: «Ես եկել եմ այստեղ ոչ թե ինչ-որ բան պատմելու, այլ հիմնականում սովորելու համար: Հայ ժողովուրդը, որ մարդկությանը բազմաթիվ հայտնի մարդիկ է տվել, արժանի է մեծ ուշադրության եւ հարգանքի, նրա փորձը պետք է իմաստավորվի ողջ մարդկության կողմից»,- նշել է Էսկինը:Պատասխանելով խորհրդարանականների հարցերին՝ քաղաքագետը անդրադարձել է արցախյան հիմնախնդրի վերաբերյալ իր մոտեցումներին, հայ-իսրայելական հարաբերությունների զարգացման հեռանկարներին, հրեական հայրենադարձության հաջողված փորձը ՀՀ-ում եւ Արցախում կիրառելու անհրաժեշտությանը եւ մի շարք այլ թեմաների:Էսկինը նշել է, որ ռուս հասարակական-քաղաքական գործիչ Ալեքսանդր Պրոխանովի Բաքու այցը վկայում է, թե ինչպիսի քաղաքականություն է վարում Ադրբեջանը: Էսկինի խոսքով՝ Պրոխանովը ֆաշիստական գաղափարներ ունի, կողմ է պատերազմներին եւ մարդկության նկատմամբ հանցագործություններին, եւ եթե Իլհամ Ալիեւը այդպիսի կերպարների հետ է համագործակցում, ապա ինքը միանշանակ կողմ է, որպեսզի Արցախը ունենա անկախություն:«Պրոխանովին նույնիսկ ՌԴ-ում են համեմատում որոշ կենդանիների հետ, արհամարանքով վերաբերվում, մինչդեռ Ադրբեջանի բարձրագույն իշխանությունը հորթի հրճվանք է ապրում, երբ նա կոչ է անում հարձակվել Արցախի վրա եւ գրավել այն»,- Արցախի խորհրդարանում հայտարարել է Ավիգդոր Էսկինը:Իսրայելցի գործիչը շեշտել է, որ Արցախը դե ֆակտո եւ ստատուսով անկախ պետականություն է ստեղծել, եւ պաշտոնական Թել-Ավիվը հաշվի է նստում դրա հետ: