Նիկոլ Փաշինյանի, Սերժ Սարգսյանի եւ Ռոբերտ Քոչարյանի արանքում

ՀՀ նախագահ Արմեն Սարգսյանը հերթական ստուգատեսի առջեւ է կանգնա: Հայտնի է, որ օրերս՝ սեպտեմբերի 25-ին իշխանությունը հապճեպ կարգով ընդունեց «ՀՀ վարչատարածքային բաժանման մասին» ՀՀ օրենքում փոփոխություններ և լրացումներ կատարելու մասին» օրենքը, որով 2021 թվականի հոկտեմբերին, նոյեմբերին և դեկտեմբերին սպասվող տեղական ինքնակառավարման մարմինների ընտրություններին ընդառաջ իշխանությունն ուզուրպացրած Նիկոլ Փաշինյանն ու իր խմբակը փորձում են ամբողջական վերահսկողություն հաստատել նաև տեղական մակարդակում՝ տեղական ինքնակառավարման համակարգը վերացնելու միջոցով։ Այդ կապակցությամբ ՀՀ Ազգային ժողովի «Հայաստան» և «Պատիվ ունեմ» դաշինքները դիմել են Հանրապետության նախագահին՝ առաջարկելով, որ նա օգտվի Սահմանադրությամբ իրեն տրված իրավունքից և օրենքը չստորագրի և դիմի Սահմանադրական դատարան՝ պարզելու համար դրա սահմանադրականության հարցը՝ ներկայացնելով չափազանց ծանրակշիռ փաստարկներ և հիմնավորումներ։

Նախագահը 21 օրյա ժամկետում պետք է կամ ստորագրի օրենքը, կամ դիմի ՍԴ, կամ էլ ոչ մեկն անի, ոչ մյուսը, ինչպես սովորաբար լվանում է ձեռքերը, եւ այդ դեպքում օրենքն իրավունքի ուժով կյանքի կկոչվի: Մինչդեռ միայն նախագահի կողմից Սահմանադրական դատարան դիմելն արդեն կարող է խափանել իշխանության ծրագրերը, քանզի Սահմանադրական դատարանում դիմումների ընդունման ուսումնասիրության և որոշումների կայացման օրենքով սահմանված ժամկետները շատ ավելին են, քան հայտարարված տեղական ընտրությունների օրերը։ Իսկ այդ օրենքի հակասահմանադրական լինելն ակնհայտ է։ Եթե նախագահը չդիմի Սահմանադրական դատարան, դա կարող են նաև ԱԺ ընդդիմադիր պատգամավորներ, սակայն այդ դեպքում օրենքը կմտնի ուժի մեջ և կիրականացվի իշխանությունների սցենարը։

Իսկ այդ օրենքի հակասահմանադրության մասին ոլորտի փորձագետները բազմիցս են անդրադարձել:
Ուշագրավ է, որ խորհրդարանի կողմից այդ օրենքի ընդունումից օրեր անց Ալեն Սիմոնյանը շտապել է նախագահական, երեկ էլ Նիկոլ Փաշինյանն էր այցելել Բաղրամյան 26: «Հանրապետության նախագահի նստավայրում այսօր տեղի է ունեցել նախագահ Արմեն Սարգսյանի և վարչապետ Նիկոլ Փաշինյանի հանդիպումը:
Քննարկվել են արտաքին և ներքին մարտահրավերների հաղթահարմանը, կառավարության առաջնահերթություններին, 2022 թվականի պետական բյուջեի նախագծով նախատեսվող ծրագրերին վերաբերող հարցեր»,- նշված է հանդիպման մասին տարածված հաղորդագրության մեջ, սակայն չի բացառվում, որ թե ԱԺ նախագահի, թե վարչապետի հանդիպման օրակարգում եղել է նաեւ այս նախագիծը, որն ըստ էության իշխանությունը վերջնականապես եւ երկարաժամկետ ուզուրպացնելու նպատակ է հետապնդում, քանի որ խոշորացման արդյունքում Նիկոլ Փաշինյանը մարզային եւ համայնքային բդեշխներ կկարգեն, որոնք ընտրություններին կաշխատեն ՔՊ-ի համար:

Անի Սահակյան