Սպեցնազը կմտնի՞ Սյունիք

ՀՀ կառավարությունը վերջին նիստում որոշում կայացրեց՝ Սյունիքի մարզին կհատկացվի շուրջ 1 միլիարդ դրամ՝ մարզում առաջնահերթ լուծում պահանջող հիմնախնդիրների լուծման նպատակով։
Գումարը, մասնավորապես, տրամադրվում է մարզային և համայնքային ենթակայության ենթակառուցվածքներում, ինչպես նաև բնակչության համար սոցիալական և կենսական նշանակություն ունեցող կարևորագույն և հրատապ ծրագրեր իրականացնելու համար:

Ենթադրվում է, որ առաջիկա օրերին Քննչական կոմիտեի ղեկավարը կամ իրավապահ մյուս կառույցները պետք է սպեցնազ մտցնեն Սյունիք՝ պարզելու ՏԻՄ ընտրություններից առաջ ինչու է կառավարությունը գումար հատկացրել, որ թեկնածուի համար, ով է պաշտոնական դիրքը չարաշահում եւ այդ գումարները որպես ընտրակաշառք բաժանում:
Ճիշտ այնպես, ինչպես եղավ ամիսներ առաջ՝ Սյունիքի ընդդիմադիր համայնքապետերին եւ համայնքապետարանի աշխատակիցներին մեղադրանք առաջադրելուց եւ կալանավորելուց առաջ: Բանն այն է, որ նրանք մեղադրվում են ընտրություններից առաջ համայնքի բնակիչներին սոցիալական աջակցություն ցուցաբերելու, իսկ ՔԿ ձեւակերպմամբ «պաշտոնական դիրքի չարաշահման» մեղադրանքով:
Մանավորապես Արգիշտի Քյարամյանի ղկավարած հիմնարկից այսօր հայտնեցին, որ ավարտվել է «Գորիս համայնքի ղեկավարի պաշտոնակատարի, տեղակալի և համայնքապետարանի երկու աշխատակիցների կողմից կատարված չարաշահումների» կապակցությամբ հարուցված քրեական գործի նախաքննությունը եւ մանրակրկիտ ներկայացրեց, թե ինչ են պարզել այդ նախաքննության ժամանակ:
Ներկայացնում ենք ՔԿ հաղորդագրությունից մեկ հատված.«Գորիս համայնքի ղեկավարի պաշտոնակատար Իրինա Յոլյանը 2021թ. հունիսի 20-ի ՀՀ Ազգային ժողովի արտահերթ ընտրությունների նախաշեմին, ընտրություններում առաջադրված «Հայաստան» դաշինքի պատգամավորության թեկնածու, Գորիս համայնքի ղեկավար Առուշ Առուշանյանի հեղինակությունը բնակչության շրջանում բարձր պահելու, բնակչությանը հաճոյանալու և ընտրություններին Ա.Առուշանյանի օգտին դրական արդյունքներ ապահովելու անձնական և խմբային շահերից ելնելով, հանցավոր համաձայնություն է ձեռք բերել համայնքի ղեկավարի տեղակալ, «Սոցիալական և բնակարանային հարցերի ուսումնասիրության» հանձնաժողովի նախագահ Մենուա Հովսեփյանի, նույն հանձնաժողովի անդամներ, համայնքապետարանի երկու աշխատակիցների հետ՝ համայնքի բյուջեի միջոցները սահմանված կարգի խախտմամբ տնօրինելու և դրանք իբրև թե Գորիս համայնքի սոցիալապես անապահով ընտանիքներին ուղղելու հարցի շուրջ»:
Հետո պարզվում է, որ Գորիսի ղեկավարների մեղքն այն է, որ 115 բնակչից սոցիալական աջակցության դիմումներ են ստացել, կազմել են հանձնաժողով, որն ուսումնասիրել է այդ դիմումները, արձանագրություններ է կազմել եւ օգնություններ տրամադրել այդ անձանց: Քննչական կոմիտեում ուսումնասիրել են այդ դիմումներն ու դիմումատուներին եւ պարզել են, որ 115-ից 54-ի դիմումները կարող էին եւ չբավարարվել: Եւ որոշել են, որ այդ մարդկանց տրամադրված օգնությունը` 3 միլիոն 200 հազար դրամը, համայնքի շահերին հասցված «ծանր վնաս է»՝ պաշտոնական դիրքի չարաշահում:
Նշենք, որ ՔԿ հաղորդագրությանն անդրադառնալով Իրինա Յյոլյանը ֆեյսբուքյան հետեւյալ գրառումն է արել. «Սահմանամերձ դարձած Որոտան, Շուռնուխ, Վերիշեն, Ակներ բնակավայրերի բնակիչներին դրամական օգնություն տալու նպատակով, քաղաքական պատվերի շրջանակներում, քննչական կոմիտեն սպեցնազեր էր ուղարկել Գորիս, մեզ մեղադրանք առաջադրել վատնում կատարելու պատճառաբանությամբ: Հիմա քննչական կոմիտեն հրաժարվել է նախնական մեղադրանքից բնակչությանը տրված սոցօգնությունը դիտարկել են որպես դիրքի չարաշահում: Հրամանը կատարելուց հետո, քննչական կոմիտեն խայտառակությունից փրկվելու համար որոշել է, որ շրջափակաման մեջ գտնվող գյուղերի բնակիչներին աջակցելու համար ավելի հարմար է պաշտոնական դիրքի չարաշահում որակել գյուղացուն օժանդակելը, քան հետո գործը շիլաշփոթ լինի, երբ Հայաստանից դուրս՝ օրինական դատարաններում, գործը հասնի «դիվանբաշուն»: Տևական ամիսներ տանջվել են , 400-ից ավել մարդ հարցաքննելուց հետո պարզվել է , որ անգամ մի դեպք չի կարողանում կարվել, որով հնարավոր լինի յուրացում որակել : Կարևորը ընտրությունից առաջ սպեցնազ ուղարկելն է եղել, գլխավոր թալանչիների հետ ատկատով համագործակցության գնացածներին աղմուկն էր պետք ընդամենը, առաջիկայում ընտրություն է, ամեն ստորության ընդունակ են : Այն որ պետական բյուջեն մսխվում է, պարգևավճարների, երեսփոխանների գրպանի փողի, ասում են՝ հիմա էլ պատգամավորների բնակարանների վարձի համար , դա պաշտոնական դիրքի չարաշահում չէ, կամ վատնում չէ, բայց սահմանը պահող գյուղացուն 20.000-ից- 100.000 դրամ տրամադրելը դիրքի չարաշահում է»: Ապա հավելում.«Ի դեպ քննչական կոմիտեն, որ հաղորդագրություն է տարածում, թե այդ երեք միլիոնը ընտրությունից առաջ է բաժանվել, իբր փորձում են երանգ տալ , հիշեցնեմ, որ Գորիսի համայնքապետարանը 11000 արցախցի հյուրընկալած համայնքի բնակիչներին տարվա ընթացքում 43 անգամ դրամական աջակցություն է տրամադրել, քանի, որ հումանիտար աղետի մեջ մնացել էին անուշադրության մատնված, իսկ օրինակ, երբ կառավարությունը Սյունիքին ընտրությունից մեկ շաբաթ առաջ մի քանի հարյուր միլիոն փող է տալիս և ինչ որ կասկածելի հիմնադրամով բաժանվում է , դա , փաստորեն, պարտադիր է, հակաօրինական չէ: Ասում են՝ դատախազությունը գործը ջրել է, պետության փողը իշխանության օգտին վատնելը , ընտրակաշառք տալն ու ձայն մուրալը պաշտոնական դիրքի չարաշահում չէ»:

Հ.Գ. Կեղծ գործեր կարելը, քաղաքական հրաման տալն ու կատարելը ավելի ծանր հանցանք է՝ պետական դավաճանությանը հավասարազոր, պատասխան տալու օրը գալու է:

Անի Սահակյան