Բաց թողնված պահը. ինչ է սպասվում Դավիթ Տոնոյանին

ԱԱԾ-ն խուզարկություններ է իրականացնում Պաշտպանության նախարարության նախկին եւ ներկա բարձրաստիճան պաշտոնյաների բնակարաններում։ Հայտնի է, որ նախկին նախարար Դավիթ Տոնոյանը ձերբակալվել է, դատարանն առաջիկա ժամերին կքննի նրա կալանքի հարցը։

Ըստ հրապարակումների, խուզարկությունները կապված են անորակ հրթիռների քրեական գործի հետ։ Օրերս ԱԱԾ-ն հաղորդեց, որ այդ գործով ձերբակալված Զինված ուժերի ավիացիայի պետ-վարչության պետի պաշտոնը զբաղեցնող բարձրաստիճան զինվորականը տեղյակ է եղել, որ դեռ 2011-ին մատակարար ընկերություններից մեկը ներմուծել է հրթիռներ, որոնց ժամկետներն անցած են եղել, սակայն սա չի խանգարել զինվորականին գնել անորակ հրթիռները, որոնց համար պետբյուջեից վճարվել է 4,7 միլիոն դոլար։ Այս հրթիռները 44-օրյա պատերազմում հնարավոր չի եղել կիրառել, հաղորդել էր ԱԱԾ-ն ու հավելել՝ մատակարարումից որոշ ժամանակ անց հրթիռների մի մասը չի օգտագործվել և դուրս է հանվել հաշվեկշռից, իսկ մնացածն ընդհանրապես չի կիրառվել։
ԱԱԾ-ն չի մանրամասնում, թե որ բարձրաստիճան զինվորականի մասին է խոսքը։ 2009-ից մինչև 2019-ը ավիացիայի պետ-վարչության պետի պաշտոնը զբաղեցնում էր գեներալ-մայոր Ավետիք Մուրադյանը։
Եւ չնայած Նիկոլ Փաշինյանն ու իր փիառ կամպանիան փորձում էին պատերազմի պարտության հերթական դրվագի պատասխանատվությունը դնել նախկինների վրա, սակայն օրերս հայտնի դարձավ, որ իրականում այդ առքուվաճառքի գործարքը կատարվել է ոչ թե 2011-ին, այլ 2018-ի աշնանը հայտնի իրադարձություններից հետո։
2011 թվականին ՀՀ է ներկրվել սպառազինություն, որը այդպես էլ չի համալրել ԶՈՒ զինանոցը, այլ ի պահ է տրվել։ Եւ միայն թավշյա հեղափոխությունից հետո է կայացել այս խայտառակ գործարքը։
Ընդ որում՝ կյանքի է կոչել իշխանությունների սրտի զենքի մատակարար Դավիթ Գալստյանի՝ Պատրոն Դավիթի կողմից։ Վերջինս եւս ձերբակալվել է Դավիթ Տոնոյանի հետ։ Հիշեցնենք, որ Պատրոն Դավիթի եւ Նիկոլ Փաշինյանի հանցավոր համագործակցության մասին հայտնի դարձավ դեռեւս պատերազմից առաջ։ Սերժ Սարգսյանի հայտնի մերձավորներից մեկը հայտարարեց, որ Փաշինյանը Պատրոն Դավիթի հետ Հայաստանը ներքաշել է զենքի միջազգային սեւ շուկա։ Պատերազմից հետո Պատրոն Դավիթին գնումների մատակարարման հայտնի գործերով ձերբակալեցին, կարճ ժամանակ անց ազատ արձակեցին՝ ցույց տալով, որ իրական նպատակը հետպատերազմական շոուն էր, հանրության աչքին թոզ փչոցին։ Հիմա էլ նույն սցենարով գործընթաց են սկսել պատերազմի պարտության գլխավոր մեղավոր-պատասխանատուներից մեկի՝ Դավիթ Տոնոյանի նկատմամբ, բայց ոչ թե այդ դրվագներով, այլ տարիներ առաջ անորակ զենք գնելու հարցով, ինչը եւս հուշում է, որ նպատակը շոու սարքելն է եւ այդ աղմուկի տակ քողարկելը հայ-թուրքական օրակարգի ըստ էության հերթական վտանգավոր համաձայնությունը, որի մասին, անշուշտ, կլսենք ավելի ուշ։
Ակնհայտ է, որ Նիկոլ Փաշինյանն իր օրակարգն իրականություն դարձնելու համար չի խնայելու ոչինչ եւ ոչ մեկին եւ ցանկացածին օգտագործելու է ըստ նպատակահարմարության եւ որեւէ մեկը չի կարող ընդվզել նրա խեղկատակությունների դեմ, քանի որ ընդվզելու եւ պարտության թիվ մեկ մեղավորին պատասխանատվության ենթարկելու պատեհ պահը բաց են թողել։ ՊՆ գեներալիտետից ու բարձրաստիճան պաշտոնյաներից միայն Մովսես Հակոբյանը առանց վախենալու խոսեց Փաշինյանի թույլ տված հանցանքների մասին, իսկ մյուսները չցանկացան դուրս գալ իրենց կոմֆորտի զոնայից, ուստի թող պատրաստ լինեն, որ իրենց ետեւից էլ են գնալու, խոսքը Օնիկ Գասպարյանի, Տիրան Խաչատրյանի եւ այլոց մասին է։

Անի Սահակյան