Գազի գնի մշուշոտ ապագան․ երբեք չի կարելի վստահ լինել, որ Մոսկվայի պլանները չեն փոխվի

 ՀՀ փոխվարչապետ Մհեր Գրիգորյանը հայտարարել է, որ գազի սակագնի վերաբերյալ կա որոշակի անորոշություն՝ հաշվի առնելով այն հանգամանքը, որ գազի սակագինը Եվրոպայում հասել է ռեկորդային բարձր ցուցանիշի։ Սեպտեմբերի 15-ին գազի գինը եվրոպական ֆյուչերսային շուկայում պատմության մեջ առաջին անգամ գերազանցել է $950-ը հազար խորանարդ մետրի համար՝ օրվա ընթացքում ապահովելով սրընթաց աճ: Հաջորդող օրերին գնանշումները մի փոքր շտկվել են, սակայն օրական աճն, այնուամենայնիվ, շատ բարձր է` մոտ 13%:

Փոխվարչապետ Մհեր Գրիգորյանը, պատասխանելով «Հայաստան» դաշինքի պատգամավոր Արմեն Գևորգյանի հարցին, թե արդյոք կա՞ որոշակիություն 2022թ․Հայաստան մատակարարվող գազի սակագնի վերաբերյալ, ասել է․ «Ըստ էության, «Գազպրոմ» խմբի հետ բանակցությունները պերմանենտ բնույթ են կրում։ Մենք ամեն տարի անդրադառնում ենք սակագնի հարցին եւ փորձում ենք խոսել առնվազն գնի պահպանման, այլ ոչ ավելացման մասին։ Թեպետ կա պնդում «Գազպրոմ»-ի կողմից, որ 2013թ․ համաձայնագրով պայմանավորված եկամտաբերության չափն իրենց չի բավարարում։ Աշխատանքային պրոցես է, այժմ բանակցությունների գործընթաց է ընթանում, հուսով եմ՝ որեւէ անսպասելի զարգացում տեղի չի ունենա գազի գնի հետ կապված, երբ բանակցություններն ամփոփման փուլում լինեն, կկիսվեմ տեղեկատվությամբ»,- ասել է ՀՀ փոխվարչապետը։

Եվրոպայում ֆյուչերսներով գազի գնի աճը ոչ մի կապ չունի Ռուսաստանի հետ եւ չի ազդում Ռուսաստանից խողովակաշարով մատակարարվող գազի արժեքի վրա: ՌԻԱ Նովոստի գործակալության փոխանցմամբ՝ նման հայտարարություն է արել է ՌԴ նախագահի մամուլի քարտուղար Դմիտրի Պեսկովը: «Այս գործընթացները որեւէ կապ չունեն Ռուսաստանի հետ, ավելին, գազի սփոթային գները չեն ազդում խողովակաշարով գազի գնի վրա, եւ Եվրոպայում գազ ստացողները չեն զգում այս փոփոխությունները, քանի որ այնտեղ գինը հաշվարկվում է այլ բանաձեւով»,- ասել է Պեսկովը:

Նրա խոսքով՝ «Հյուսիսային հոսք-2»-ի շուտափույթ շահագործումը զգալիորեն կհավասարակշռի Եվրոպայում բնական գազի գինը, այդ թվում՝ սփոթային շուկայում: «Գազի պահանջարկը մեծ է, բացի այդ, դեռ պարզ չի՝ ինչպիսին կլինի ձմեռը, ցուրտ լինելու դեպքում, բնականաբար, ավելի շատ գազ կպահանջվի»,- նշել է նա:
Օրերս Հայաստան էր ժամանել «Գազպրոմ» ՀԲԸ վարչության նախագահ Ալեքսեյ Միլլերը, որի հետ հանդիպմանը վարչապետ Նիկոլ Փաշինյանը ասել է, որ ««Գազպրոմ»-ը էներգետիկայի ոլորտում Հայաստանի ռազմավարական գործընկերն է, և կառավարությունը կարեւորում է փոխշահավետ գործակցության զարգացումը»:

Ալեքսեյ Միլլերը վստահեցրել է, որ «Գազպրոմ»-ը պատրաստ է շարունակել իրականացնել ընկերության առջև դրված բոլոր խնդիրները: «Քննարկվել է նաեւ էներգետիկայի ոլորտում հայ-ռուսական համագործակցության ընթացքը եւ զարգացման հեռանկարները, անդրադարձ է եղել «Գազպրոմ» ընկերության գործունեությանը վերաբերող հարցերի: Երկուստեք կարեւորվել են ՀՀ էներգետիկ զարգացմանը, գազամատակարարման հուսալի համակարգի ձեւավորմանն ուղղված շարունակական ծրագրերը»,- ասված է կառավարության հաղորդագրության մեջ:

Մոսկվան հիմա հանգիստ կարող է գազի գինը օգտագործել որպես մահակ։ Հանուն արդարության պետք է ասել, որ այդ խնդիրը եղել է միշտ՝ բոլոր ժամանակներում գազի գինը երբեք բացառապես տնտեսական գործոն չի եղել։ Առավել ևս հիմա գազի գինը քաղաքական է, հատկապես երբ խոսքն ՀՀ-ի մասին է։ Ի դեմս Նիկոլ Փաշինյանի՝ Մոսկվան ստացել է բացառիկ կամակատարի, և պատճառ չունի նրան պատժել գազի գնի բարձրացմամբ։ Բայց երբեք չի կարելի վստահ լինել, որ Մոսկվայի պլանները չեն փոխվել։

Հայկ Դավթյան