Բացահայտվել է, թե ինչ աջակցություն է ցուցաբերել Ալիևը Նիկոլ Փաշինյանին` ԱԺ ընտրությունների ժամանակ

ՀՀ վարչապետ Նիկոլ Փաշինյանը, խորհրդարանում պատասխանելով Գորիս-Կապան ճանապարհին ստեղծված իրավիճակի վերաբերյալ պատգամավորների հարցերին, հայտարարել է, որ 2020 թվականի դեկտեմբերին ՀՀ Զինված ուժերը հետ են քաշվել դեպի Խորհրդային Հայաստանից ժառանգված սահման` համաձայն ձեռք բերված պայմանավորվածության: «Այն իրադարձությունները, որոնք տեղի են ունենում հայ-ադրբեջանական սահմանագծի երկայնքով, ունեն բազմաթիվ շերտեր, ենթատեքստեր: Կարևոր է, որ դրանք ճիշտ ընկալենք և թարգմանենք», - ասել է նա։

Փաշինյանը հիշեցրել է, որ 2020թ․ դեկտեմբերին իրականացրել են ՀՀ ԶՈւ դիրքերը ԽՍՀՄ-ից ժառանգած սահմանների հետ համապատասխանեցնելու գործընթաց, որն իրականացվել է ռազմական նոր էսկալյացիայից խուսափելու համար: «2020-ի դեկտեմբերին պայմանավորվածություն է ձեռք բերվել, որ այդ ճանապարհը անարգել կերպով պետք է օգտագործվի ՀՀ տրանսպորտային միջոցների և բեռների տարանցման համար: Ենթադրում եմ՝ քանի որ այդ պայմանավորվածության մեջ չի ֆիքսվել նաև օտարերկրյա բեռների հանգամանքը, տվյալ իրավիճակում Ադրբեջանը կիրառում է այդ միջոցը, թերևս ի պատասխան մեր այն հայտարարությունների, որ թե՛ նոյեմբերի 9-ի, թե՛ հունվարի 11-ի եռակողմ հայտարարությունների մեջ հիշատակված չէ ՀՀ տարածքով միջանցք տրամադրելու վերաբերյալ դրույթ»,- հայտարարել է Նիկոլ Փաշինյանը` կրկին հիշատակելով իր կողմից շատ սիրված 2010թ․-ին ընդունված վարչատարածքային բաժանման մասին օրենքը, որտեղ ըստ Փաշինյանի Շուռնուխ և Որոտան գյուղերի վարչական սահմանները համապատասխանում են հայ-ադրբեջանական սահմանին:

Փաստորեն, սեպտեմբերի 12–ին ՀՀ ԱԱԾ–ի տարածած հայտարարությունը, որտեղ նշվում էր, թե Գորիս-Կապան միջպետական ճանապարհի Որոտան բնակավայրի մոտ Ադրբեջանի վերահսկողության տակ գտնվող Էյվազլի բնակավայրի հատվածում, Ադրբեջանի Հանրապետության ոստիկանության կողմից իրականացվում է իրանական պետհամարանիշներով բեռնատարների վարորդների ու բեռի փաստաթղթերի ստուգում, Փաշինյանի հետ համաձայնեցված տեքստ է եղել։ Անհասկանալի է միայն, թե ՀՀ ազգային անվտանգության ծառայության սահմանապահ զորքերի և ՌԴ ԱԴԾ սահմանապահ ծառայության զինծառայողների կողմից իրավիճակը կարգավորելու ուղղությամբ ինչ համատեղ աշխատանքներ են իրականացվում, եթե բնակավայրը, դատելով բնակավայրի անվանումից, Նիկոլ Փաշինյանը, նրա հրահանգով՝ նաև ԱԱԾ-ն, ադրբեջանական են համարում:

Ի վերջո, ի՞նչ պայմանավորվածության մասին է խոսում Նիկոլ Փաշինյանը: Դեկտեմբերին ձեռք բերված պայմանավորվածությունը, որով ճանապարհի օգտագործման հարցն է քննարկվել, որտե՞ղ է հրապարկված, ինչու՞ է այն թաքուն պահվել հայ հասարակությունից:
Տեքստը, որն ԱԺ ամբիոնից արտաբերել է Նիկոլ Փաշինյանը, փաստում է, որ Գորիս-Կապան միջպետական ճանապարհի տերը այլևս Հայաստանը չէ, ադրբեջանական կողմն էլ մեծահոգաբար թույլ է տվել, որ ՀՀ տրանսպորտային միջոցների և բեռների տարանցման համար ճանապարհն օգտագործվի, իսկ ահա իրանական մեքենաները, քանի որ դրանք հայկական չեն, պետք է հարկ վճարեն` հօգուտ Ադրբեջանի պետական բյուջեի:

 Փաստորեն, Ալիևը ՀՀ ԱԺ ընտրություններում Նիկոլ Փաշինյանի հաղթանակին աջակցելու նպատակով համաձայնվել է այդ փաստը թաքուն պահել, հակառակ պարագայում իրանական բեռնատարները կհարկվեին 2020 թվականի պայմանավորվածությունից անմիջապես հետո: Դա ամենափոքր բանն էր, որ Ալիևը կարող էր անել Նիկոլ Փաշինյանի` Ադրբեջանին և անձամբ Ալիևին մատուցված ծառայությունների դիմաց: Փաշինյանը դեռ պետք է բացատրություն տա, թե իր ասած 2020 թվականի դեկտեմբերի պայմանավորվածությունից հետո ինչո՞ւ է Ալիևը համաձայնվել մինչև 2021 թվականի սեպտեմբեր իրանական բեռնատարների երթևեկը Գորիս-Կապան մայրուղուվ թույլատրել` առանց հարկային գանձումների:
Ազգային դավաճանությունն ու դավադրությունը պոզուպոչով չի լինում, հենց այս ձևով է լինում:

Հայկ Դավթյան