Հետապնդումների նոր ալիք՝ ՀՀ-ում

Այսօր Գլխավոր դատախազի խորհրդական Գոռ Աբրահամյանը ֆեյսբուքով տեղեկացրեց, որ ՀՀ վերաքննիչ դատարանը բավարարել է դատախազության բողոքը, բեկանել Շիրակի մարզի առաջին ատյանի ընդհանուր իրավասության դատարանի որոշումը և քրեական գործով մեղադրյալ Սպարտակ Ղուկասյանի նկատմամբ որպես խափանման միջոց ընտրել կալանավորումը: Հիշեցնենք, որ ոստիկանության աշխատակցի նկատմամբ բռնություն կիրառելու սպառնալիքի դեպքի առթիվ քննվող քրեական գործով 2021թ. օգոստոսի 18-ին վարույթն իրականացնող մարմնի կողմից Ս. Ղուկասյանին առաջադրվել էր մեղադրանք ՀՀ քրեական օրենսգրքի 316-րդ հոդվածի 1-ին մասով և միջնորդություն ներկայացվել դատարան՝ նրա նկատմամբ կալանքը որպես խափանման միջոց ընտրելու վերաբերյալ:

Սպարտակ Ղուկասյանը օգոստոսի 19-ին ձերբակալվել էր իշխանության ներկայացուցչի նկատմամբ բռնություն գործադրելու կասկածանքով։ Քննչական կոմիտեի հաղորդմամբ՝ Ղուկասյանը մեղադրվում է Ոստիկանության Կումայրիի բաժնի քրեական հետախուզության բաժանմունքի պետի նկատմամբ բռնություն գործադրելու սպառնալիքի համար։
Քննչական մարմնի տարածած հաղորդագրության համաձայն՝ <<Գյումրիի նախկին քաղաքապետի որդին ձերբակալվել է Գյումրիի մի բնակչուհու դիմումի հիման վրա: Վերջինս տեղեկացրել է, որ Սպարտակ Ղուկասյանը օրեր առաջ երեք-չորս տղամարդկանց հետ մտել է իր տան բակ՝ իր թոռան հետ պարզաբանումներ կատարելու նպատակով։ Դրանից հետո ոստիկանության Կումայրիի բաժնի քրեական հետախուզության աշխատակիցները, քաղաքացու դիմումում մատնանշված հանգամանքներն ստուգելու նպատակով, այցելել են Գյումրու նախկին քաղաքապետի բնակության վայր, սակայն Սպարտակ Ղուկասյանը նախ հրաժարվել է տան դուռը բացել, այնուհետև՝ ժամեր անց, զանգահարել է Ոստիկանության Կումայրիի բաժնի քրեական հետախուզության բաժանմունքի պետին, սպառնացել բռնություն գործադրել նրա նկատմամբ` կապված վերջինիս կողմից իր ծառայողական պարտականությունները կատարելու հետ:
Հարուցված գործով քրեական հետախուզության բաժանմունքի պետը ճանաչվել է տուժող>>:
Առաջարկում ենք մեկ անգամ եւս կարդալ քննչականի հաղորդագրությունը եւ կտեսնեք, որ ընդամենը մեկ կնոջ հաղորդման հիման վրա կառուցված քրեական գործ է, իսկ թե ինչպես է <<տուժել>> բաժանմունքի պետը, դեռ պետք է հասկանալ: Այն, որ Գյումրու նախկին քաղաքապետի որդու անունն առաջին անգամը չէ, որ շրջանառվում է աղմկահարույց պատմության մեջ, չի տալիս որեւէ հիմք պնդելու, որ նա մեղավոր է: Իսկ առհասարակ կալանքը խափանման միակ միջոցը չէ, որ կարելի է կիրառել: Պարզից էլ պարզ է, որ ՏԻՄ ընտրություններից առաջ Հայաստանում հետապնդումների նոր ալիք է սկսվել: Նիկոլ Փաշինյանը, որ ժամանակին Սերժ Սարգսյանի իշխանությանը դատափետում էր նման գործելաոճի համար, այժմ կատարելագործված է դա իրականացնում: Վարդան Ղուկասյանն ու իր մերձավորները խորհրդարանական ընտրություններին աշխատել են ՀՀ երկրորդ նախագահ Ռոբերտ Քոչարյանի համար, ենթադրվում է, որ ՏԻՄ ընտրություններին նույնպես ունեն հետաքրքրություններ, չնայած սեփական թեկնածու չեն առաջադրել, բայց հաստատ որեւէ թեկնածուի աջակցություն կցուցաբերեն: Հենց այս պատճառով էլ Փաշինյանի գրպանային ուժային կառույցները իրար են խառնվել: Նույն հետապնդումների մասին լսում ենք նաեւ Սյունիքից, օրերս հայտնի դարձավ, որ Առուշ Առուշանյանի մտերիմ տասնյակ մարդկանց է մեղադրանք առաջադրվել: Առաջիկա երկու ամիսներին քաղաքական օպոնենտների համար դժվարին օրեր են սպասվում, քանզի ՀՀ-ում մեկնարկել է քաղաքական հետապնդումների նոր փուլ:

Անի Սահակյան