Սյունիքի հարցով Նիկոլ Փաշինյանի և Ալիևի պայմանավորվածությունը սկսել է իրականացվել

Զանգեզուրի հանձնման օպերացիան, որի մասին խոսվում էր դեռ նոյեմբերի 9-ի չարաբաստիկ կապիտուլացիոն ակտի ստորագրումից հետո, թևակոխում է իրագործման փուլ։ Բանավոր պայմանավորվածությունը, որը վերջնական ու հստակ երբևէ ՀՀ իշխանության և կոնկրետ Նիկոլ Փաշինյանի կողմից չի հերքվել, փուլային տարբերակով իրագործվում է։

Անցնող շաբաթ-կիրակի օրերին Գորիս-Կապան միջպետական ճանապարհին ադրբեջանական կողմը տեղադրել է ուղեկալ։ Այս փաստը լրատվամիջոցների հետ զրույցում սեպտեմբերի 12-ին հաստատել էր Սյունիքի մարզպետ Մելիքսեթ Պողոսյանը։
Զուգահեռաբար տեղեկոություններ տարածվեցին, թե ադրբեջանցի զինվորականները Իրանից Հայաստան բեռնափոխադրում կատարող իրանցի վարորդներից գումարներ են պահանջում՝ մեկ բեռնատարի դիմաց մոտ 250 դոլարի չափով։ Համացանցում հայտնվեցին վճարման կտրոնները։ Տարբեր ԶԼՄ-ների հետ զրույցում գումարներ գանձելու փաստը հաստատել են նաև իրանցի վարորդները։ Նրանք նաև հայտնել են, որ այս կերպ շարունակվելու դեպքում նրանք պարզապես կհրաժարվեն բեռնափոխադրում իրականացնել դեպի Հայաստան։

Խնդրի մասին ուշագրավ հայտարարություն է տարածել ՀՀ ազգային անվտանգության ծառայությունը։ <<Սույն թվականի սեպտեմբերի 12-ին, ժամը 12։00-ից Գորիս-Կապան միջպետական ճանապարհի Որոտան բնակավայրի մոտ Ադրբեջանի վերահսկողության տակ գտնվող Էյվազլի բնակավայրի հատվածում, Ադրբեջանի Հանրապետության ոստիկանության կողմից իրականացվում է իրանական պետհամարանիշներով բեռնատարների վարորդների ու բեռի փաստաթղթերի ստուգում։ ՀՀ ազգային անվտանգության ծառայության սահմանապահ զորքերի և ՌԴ ԱԴԾ սահմանապահ ծառայության զինծառայողների կողմից համատեղ աշխատանքներ են իրականացվում առաջացած իրավիճակը կարգավորելու ուղղությամբ>>,- նշված է ԱԱԾ տարածած հաղորդագրության մեջ։

Այսպիսով՝ ՀՀ ԱԱԾ-ն պաշտոնական տեքստում փաստացի օգտագործել է Սյունիքի մարզի Որոտան բնակավայրի ադրբեջանական անվանումը՝ անուղղակիորեն հաստատելով, որ նշված տարածքն ադրբեջանական է։ Հաջորդաբար, արդեն Ադրբեջանի մաքսային մարմինները Գորիս-Կապան ճանապարհին իրանական մեքենաներից գանձվող գումարների վերաբերյալ հայտարարել են, թե <<իր երկիր>> մտնող և երկրից դուրս եկող իրանական մեքենաները միջազգային բեռնափոխադրումներ կարարելու համար ենթակա են հարկման, և իրենք իրականացնում են Ադրբեջանի մաքսային օրենսդրության պահանջները։

Խորհրդարանում իշխող մեծամասնության՝ ՔՊ-ի խմբակցության ղեկավար Հայկ Կոնջորյանը Գորիս-Կապան մայրուղու Որոտանի ճանապարհին ադրբեջանցիների՝ իրանական բեռնատարներից փող գանձելու վերաբերյալ հարցը չի մեկնաբանել։
«Կան կոնկրետ մարմիններ, որոնք այս հարցով աշխատանք են տանում, դա նշանակում է, որ առաջիկայում կլինի հայտարարություն, մեկնաբանությունները գալիս են այդ մարմիններից>>,- ասել է նա։ Լրագրողների պնդմանը, թե Գորիս-Կապան միջպետական ճանապարհը ի վերջո հայկակա՞ն տարածք է, Կոնջորյանը որևէ արձագանք չի տվել՝ այս կերպ հայտնելով իր հլու-հնազանդությունը շեֆի՝ Նիկոլ Փաշինյանի՝ Սյունիքի հանձնման գաղտնի պայմանավորվածությանը, որի մասին խոսվում է նոյմեբերի 9-ի ակտի ստորագրումից հետո։

Այսպիսով՝ Հայաստանի իշխանությունը դիտորդի կարգավիճակում է։ Չզարմանաք, եթե առաջիկայում ադրբեջանական ուղեկալը հարկեր գանձի նաև ՀՀ պետհամարանիշով մեքենաներից՝ Գորիսից-Կապան հակառակ ուղղությամբ երթևեկելու համար։ Ռուսական կողմն առայժմ չի մեկնաբանել իրանական բեռնատարների հարկման փաստը։ 

Հայկ Դավթյան