Արտառոց. Երկու մետրանոց երկաթյա ձողը ծակել է շինարար բանվորի գլուխը, եւ նա ողջ է մնացել

Հնդկաստանից 24 տարեկան շինարար բանվորի գլուխը ծակել-անցել է մոտ երկու մետրանոց երկաթյա ձողը: Ձողը ծակել է նրա գանգը եւ ուղեղը, բայց հրաշքով չի վնասել ուղեղի բունը եւ զարկերակները, եւ տղան ողջ է մնացել: Մումբայում հաջողվել է   5-ժամյա վիրահատության միջոցով հանել ձողը: Մուհամեդ Գուդդուն ցեմենտ էր խառնում, երբ մոտակա շենքի չորրորդ հարկից պատահաբար երկաթյա ձող է ընկել, որը խրվել է ուղիղ նրա գլխի մեջ: Ձողը ծակել անցել է գանգը, բայց տղան գիտակցությունը չի կորցրել եւ անմիջապես հասցվել է հիվանդանոց, տեղեկացնում է    The Daily Mirror-ը: Ձողը գլխից հանելու վիրահատական գործողությունը հինգ ժամ է տեւել: Այժմ տղամարդու կյանքին ոչինչ չի սպառնում, եւ  նրա վիճակը լավանում է: Ճիշտ է, առայժմ նրա մարմնի ձախ հատվածը կաթավածահար է, բայց բժիշկները պնդում են, որ մի քանի ամսից շարժողական կարողությունները լիովին կվերականգնվեն: Նեյրովիրաբույժ Բատուկ Դիյորան, որն իրականացրել է վիրահատությունը,  «իսկական հրաշք» է կոչել այն փաստը, որ  շինարարը ողջ է մնացել նման վնասվածք ստանալուց հետո: Նրա խոսքով, վիրահատությունը բարդ էր, բայց տղայի բախտը բերել է, որ ձողը չի վնասել նրա զարկերակները, ոչ էլ ուղեղի բունը, հակառակ դեպքում նա գործնականում շանս չէր ունենա: Բժիշկների խոսքով, Մուհամեդը ստիպված կլինի եւս երկու շաբաթ մնալ հիվանդանոցում` բժիշկների հսկողության ներքո:   NEWS.am Medicine