Ընդդիմությունն ունի իշխանությանը տապալելու զենքը

Արդեն պարզ է դառնում, որ Արցախը Նիկոլ Փաշինյանի ու իր թիմի համար դարձել է «աչքի փուշ», նրանք տանել չեն կարողանում Արցախը, նրա խնդիրները, կարգավիճակը, արցախցիներին եւ առհասարակ ցանկացած բան, որտեղ կա այս բառը։ Արցախը հանձնելուց հետո Նիկոլ Փաշինյանն ու իր իշխանությունը ինչպես երեւում է հետեւողականերոն վերացնում են նաեւ այդ բառի անգամ գործածությունը։ Մենք տեսանք, որ Կառավարության հնգամյա ծրագրից դուրս էր մնացել Արցախի հանրապետություն արտահայտությունը, խորհրդարանի նիստերի մեկնարկին իշխանությունը մերժեց նաեւ Պատիվ ունեմ խմբակցության առաջարկը՝ Արցախի հարցով նոր մշտական հանձնաժողով ստեղծելու վերաբերյալ։ Հակառակ ընդդիմության ջանքերին, որ նման հանձնաժողովի գոյությունը պատերազմից հետո կենսական նշանակություն է, իշխանությունները տապալեցին այդ նախաձեռնությունը։ Նրանց համարընդունելի չէ նաեւ «Հայաստան» դաշինքի ավելի մեղմ առաջարկը, այն է Արտաքին հարաբերությունների մշտական հանձնաժողովը վերակազմավորել՝ դարձնելով Արտաքին հարաբերությունների եւ Արցախի հարցով մշտական հանձնաժողով։ Արդեն տեղեկություններ կան, որ իշխանությունը կմերժի նաեւ այս առաջարկը։

Ինչպես տեսանք ՀՀ պետական բարձրաստիճան այրերից եւ ոչ մեկը ներկա չէր Արցախի անկախության 30-ամյա միջոցառումներին, պատերազմից հետո որեւէ պաշտոնյա չի էլ այցելել Արցախ, փոխարենն այդ օրերին Նիկոլ Փաշինյանն արձակուրդն էր վայելում Սոչիում, իսկ ԱԺ նախագահ Ալեն Սիմոնյանն ու մի խումբ ՔՊ-ական պատգամավորներ՝ Հունաստանում էին տժժում։

Քաղաքական վերլուծաբան Արմեն Բաղդասարյանը ֆեյսբուքյան իր էջում սեպտեմբերի 6-ին գրել էր, որ նկարահանվում է ՀՀ օրհներգի նոր տեսահոլովակ, որտեղից բացակայելու են Արցախին առնչվող պատկերները։
«Արդեն շատ երկար ժամանակ է, ինչ ամեն օր ուղիղ կեսգիշերին հայկական բոլոր հեռուստաալիքներով ցուցադրվող ցանկացած հաղորդում ընդհատվում է, հնչում է ՀՀ օրհներգը, և Հայաստանից ու Արցախից գեղեցիկ կադրեր են ցուցադրվում։ Պարզվում է, հեղափոխական իշխանությունները որոշել են «թարմացնել» նաև այդ կադրերը, ու հիմա ահռելի գումարներ են ծախսվում նոր հոլովակներ նկարահանելու համար։ Իսկ բուն նպատակն այն է, որ այլևս Արցախից որևէ կադր չցուցադրվի։
Ո՛չ Շուշիից, ո՛չ Գանձասարից, ո՛չ «Տատի-պապիի» արձանից։ Երևի դա նույնպես նոյեմբերի 9-ի «բանավոր փոխըմբռնումների» շրջանակներում է»,- գրել էր վերլուծաբանը։
Որքան էլ ցավալի է արձանագրել այս իրողությունը,սակայն այն կանաչ լույս է վառում հայրենի ընդդիմության առջեւ, իշխանությանը նոկաուդի ենթարկելու հզոր զենք է տալիս։ Ասենք՝ ընդդիմությունը կարող է օրումեջ նման նախագիծ ներկայացնել, կամ ասենք խորհրդարանի նիստերին գնալ Արցախի դրոշով շապիկներով, կամ էլ հենց դրոշը դնեն իրենց սեղաններին, Նիկոլ Փաշինյանին բացառապես Արցախի վերաբերյալ հարցեր ուղղել։ Ակնհայտ է, որ Փաշինյանն ու թիմը գենետիկ ատելությամբ են լցված Արցախի նկատմամբ եւ որոշել են բառարաններից եւ երկրագնդի երեսից ջնջել Արցախ բառը։ Եւ ուրեմն ընդդիմությունը պետք է պահը բաց չթողնի եւ նոկաուդի ենթարկի իշխանություններին։

Անի Սահակյան