30 տարվա հաղթանակը չկա, Նիկոլ Փաշինյանն ու Աննա Հակոբյանն էլ այսօր արցախցու կողքին չեն

Արցախի ԱԺ-ի «Արդարություն» խմբակցությունը հայտարարություն է տարածել՝ ցավալի համարելով, որ վերջին 30 տարիների ընթացքում առաջին անգամ Արցախը հանրապետության հռչակման օրը նշում է առանց hայաստանյան իշխանության բարձր ղեկավարության մասնակցության։

Արցախի խորհրդարանը սեպտեմբերի 1-ին հատուկ նիստ է հրավիրել՝ նվիրված ԼՂՀ անկախության հռչակման 30-ամյակին։ Հիշեցնենք, որ 1991թ. սեպտեմբերից 2-ից՝ Լեռնային Ղարաբաղի Հանրապետության հռչակումից ընդամենը մի քանի ամիս առաջ, 1991-ի գարնանը, Ադրբեջանը իրականացրել էր «Օղակ» գործողությունը՝ գրավելով և իրենց տներից արտաքսելով հայկական 24 գյուղերի հազարավոր բնակիչների:

1991թ. սեպտեմբերի 2-ին Ստեփանակերտում տեղի ունեցավ ԼՂԻՄ մարզային և Շահումյանի շրջանային խորհուրդների համատեղ նստաշրջանը: Ընդունվեց հռչակագիր՝ ԼՂԻՄ և Շահումյանի շրջանի սահմաններում Լեռնային Ղարաբաղի Հանրապետություն հռչակելու մասին` հիմք ընդունելով 1990 թվականի ապրիլի 3-ի Խորհրդային Միության Գերագույն խորհրդի «Խորհրդային Միության կազմից միութենական հանրապետությունների դուրս գալու կարգի» մասին օրենքը: Ամիսներ անց՝ 1991-ի դեկտեմբերի 10-ին, Արցախում տեղի ունեցավ անկախության հանրաքվե:

2021 թվական սեպտեմբերն է, ուղիղ 30 տարի է անցել այս իրադարձություններից հետո: Ամեն տարի սեպտեմբերի 2-ին Արցախում տոնական միջոցառումներ էին անցկացվում։ Տոնական միջոցառումներից մեկի ժամանակ էլ Փաշինյանն էր տիկնոջ հետ այցելել Շուշի, շուրջպար բռնել...

Այս տարի Արցախում նույնպես մի շարք միջոցառումներ են նախատեսված, սակայն արցախցին, հայաստանցին զրկվեցին իրենց փոքրիկ հայրենիքի մի մեծ կտորից: Դեռ անցյալ տարի սեպտեմբերի 2-ին հայ ժողովուրդը հպարտ էր ու հաղթական, գրեթե երեք տասնամյակ տոնում էր իր հաղթանակը թշնամու հանդեպ:

Այսօր հայկական մնացած փոքրիկ Արցախը 30 տարեկան է, բայց արցախցին, հայը սգավոր է, պարտված, ողնաշարը կոտրված։

Ու այս պայմաններում մեկ հարց է ամենաշատ հետաքրքրում՝ ինչո՞ւ չեն այսօր Նիկոլ Փաշինյանն ու Աննա Հակոբյանն արդեն Արցախում՝ արցախցիների կողքին...

Մետաքսյա Շալունց