Մոսկվա-Երեւան երթուղու վթարված ավտոբուսը ներգրավված չի եղել մրցույթին ներկայացված ավտոբուսների ցանկում

Մոսկվա-Երեւան երթուղու վթարված ավտոբուսը ներգրավված չի եղել մրցույթին ներկայացված տրասնպորտային միջոցների ցանկում։ Այս մասին հաղորդագրություն է տարածել ՀՀ տրանսպորտի, կապի եւ տեղեկատվական տեխնոլոգիաների նախարարության լրատվական ծառայությունը։ «Վրաստանի Մառնեուլի - Թբիլիսի ավտոճանապարհին վթարվել է ուղեւորափոխադրում իրականացնող հայկական ավտոբուս։ Ավտոբուսը պատկանում է «Ալբերտ տուր» ընկերությանը: Ընկերությունը մասնակցել է Երեւան–Բրյանսկ ուղղությամբ կանոնավոր ուղեւորափոխադրումներ իրականացնելու համար հայտարարված մրցույթին: Սակայն վթարված ավտոբուսը ներգրավված չի եղել մրցույթին ներկայացված տրասնպորտային միջոցների ցանկում։ Այն անօրինական ուղեւորափոխադրում է իրականացրել։ Դրանից բացի, գործունեության ընթացքում ընկերությունը թույլ է տվել մի շարք խախտումներ, որոնց համար ՀՀ տրանսպորտի, կապի եւ տեղեկատվական տեխնոլոգիաների նախարարության տրանսպորտային տեսչության կողմից 2017թ. մայիսի 23-ին տուգանվել է 450 հազար դրամով, իսկ հունիսի 13-ին՝ 900 հազար դրամով»,-ասված է հաղորդագրության մեջ։ Ավելի վաղ Հայաստանի ԱԻՆ-ում այսօր՝ հունիսի 25-ին, ժամը 11:08-ին Վրաստանի ՆԳՆ ԱԻ դեպարտամենտից նախնական տեղեկություն է ստացվել, որ Թբիլիսի-Գարդաբանի ավտոճանապարհի 35-րդ կմ-ին Մոսկվա-Երեւան երթուղին իրականացնող «Scania» մակնիշի 97 DT 777am պետհամարանիշով ավտոբուսը (վարորդ՝ Արա Հովհաննիսյան) բախվել է «Nissan Tiida» մակնիշի IL100KA պետհամարանիշով ավտոմեքենային (վարորդ՝ Էթերի Գավաշելիշվիլի): Ժամը 13:04-ին Վրաստանի ՆԳՆ ԱԻ դեպարտամենտից նախնական տեղեկություն է ստացվել, որ ավտովթարը տեղի է ունեցել Մառնեուլ-Թբիլիսի ավտոճանապարհին՝ Տսալասկուրի գյուղի մոտակայքում, եւ ավտոբուսի ուղեւորներից կան տուժածներ՝ Մարգարիտա Մարտիրոսյան (60 տ), Բարբարա Պետրոսյան (60 տ) եւ Մարգարիտա Կիրիեւա (78 տ): Մարգարիտա Մարտիրոսյանն ու Բարբարա Պետրոսյանը տեղափոխվել են Մառնեուլ քաղաքի հիվանդանոց, որտեղ ստանալով համապատասխան բուժօգնություն՝ դուրս են գրվել: Վթարի ենթարկված ավտոբուսի ուղեւորները նշել էին, որ «Nissan Tiida» մակնիշի IL100KA համարանիշով ավտոմեքենան (վարորդ՝ Էթերի Գավաշելիշվիլի) վթարային իրավիճակ էր ստեղծել, որի հետեւանքով ավտոբուսը բախվել էր Nissan-ին, այնուհետեւ հաստաբուն ծառին եւ կողաշրջվել: Ավտոբուսում եղել են 30-ից ավելի ուղեւորներ, որոնցից երեք կանայք մարմնական վնասվածքներ են ստացել եւ տեղզփոխվել հիվանդանոց։ Shamshyan.com-ի տեղեկություններով, մարդատար Scania ավտոբուսը հաշվառված է Երեւան քաղաքի 16 թաղամասի բնակիչ, 29-ամյա Ալբերտ Մովսիսյանի անվամբ: