«Թավիշն» ի՞նչ խոստումներ է տալիս Հայաստանի տարածքների վրա աչք դրած Ալիևին

Ռուսաստանի արտաքին գործերի նախարար Սերգեյ Լավրովը բեռնափոխադրումներով զբաղվող ռուսաստանյան ընկերություններին երեկ կոչ է արել ուշադրություն դարձնել Լեռնային Ղարաբաղի տարանցիկ ներուժին:

«Այնտեղ այժմ ակտիվ աշխատանք է ընթանում ենթակառուցվածքների, ավտոճանապարհների վերականգնման ուղղությամբ, ուստի խնդրում ենք ուշադիր լինել այդ հեռանկարային տարածքի նկատմամբ, այն, ըստ իս, կունենա ակնհայտ տնտեսական օգուտ», - ըստ ՏԱՍՍ-ի՝ ասել է Լավրովը: ՌԴ ԱԳ նախարարը միաժամանակ կարևորել է, որ Ղարաբաղի տնտեսական զարգացումն ընթանա Ռուսաստանի ակտիվ մասնակցությամբ:

Միաժամանակ, վերջին օրերին Ադրբեջանից հնչող սպառնալիքների, սահմանային ընդհանուր բավական լարված ֆոնին, հանկարծ տեղեկություն ստացվեց այն մասին, որ վերսկսվել են Հայաստան-Ադրբեջան-Ռուսաստան եռակողմ բանակցությունները՝ երեք երկրների փոխվարչապետների համանախագահությամբ:

Կառավարության տարածած մամլո հաղորդագրությունում նշվում էր խմբի նիստի մասին. «Հայաստանի Հանրապետության փոխվարչապետ Մհեր Գրիգորյանը, Ռուսաստանի Դաշնության փոխվարչապետ Ալեքսեյ Օվերչուկը և Ադրբեջանի Հանրապետության փոխվարչապետ Շահին Մուստաֆաևը վերսկսել են տարածաշրջանային տրանսպորտային ապաշրջափակման եռակողմ խմբի աշխատանքները: Օգոստոսի 17-ին կայացած նիստում կողմերը դիտարկել են Հարավային Կովկասի տարածաշրջանում տրանսպորտային հաղորդակցությունների վերականգնման հեռանկարները և քննարկել Հայաստանի Հանրապետության վարչապետի, Ռուսաստանի Դաշնության նախագահի և Ադրբեջանի Հանրապետության նախագահի 2021թ. հունվարի 11-ի հայտարարության շրջանակներում իրականացվող աշխատանքների հետագա ընթացքը»։

Հարավային Կովկասի տարածաշրջանում տրանսպորտային հաղորդակցությունների վերականգնման հեռանկարների քննարկման մասին, իհարկե, Հայաստանի «թավշյա» իշխանության տեսակետը պարզ է, նրանք շարունակաբար հայտարարում են, թե ապաշրջափակումը մեզ օգուտներ կբերի, Ադրբեջանի տարածքով, պարզվում է, դեպի Ռուսաստան հայաստանցիները կարող են ազատ տեղաշարժվել՝ նախընտրելով հենց այդ ճանապարհը, քան Վրաստանո՞վ:

Բայց հետաքրքիրն այն է, որ եռակողմ հանդիպումը կայացավ, Ալիևի կողմից հերթական սպառնալիքներից հետո: Այսինքն՝ Բաքուն հայտարարում է, թե Հայաստանի այս, կամ այն, քաղաքը ադրբեջանական է, ավելին՝ այդ տարածքների նվաճելու գործը համարում է հետագա փուլի անելիք, ու պաշտոնական Երևանը գնում է Բաքվի հետ տրանսպորտային հաղորդակցությունների վերականգնման հեռանկարների քննարկելու՞...

Սա այն դեպքում, երբ նախորդ օրը հայկական կողմը 2 զոհ է ունեցել: Ի դեպ, Ռուսաստանի Պաշտպանության նախարարությունն էլ իր հերթին հաղորդում է Ղարաբաղում հրադադարի խախտման նոր դեպքի մասին։ Ըստ վերջին հաղորդագրության, օգոստոսի 16-ին՝ երեկոյան 9-ին Շուշա (Շուշիի) շրջանում «Լեռնային Ղարաբաղի զինված խմբավորումների և Ադրբեջանի Հանրապետության զինված ուժերի միջև փոխհրաձգություն է արձանագրվել», որը շարունակվել է մոտ 15 րոպե։ Ռուսական խաղաղապահ առաքելության աջակցությամբ միջադեպը հարթվել է, տուժածներ չկան, հայտարարում է Ռուսաստանի ռազմական գերատեսչությունը։ Հաղորդագրությունը, սակայն, չի հստակեցնում՝ որ կողմն է առաջինը խախտել հրադադարը։

Ղարաբաղում նոյեմբերի 9-ից հաստատված հրադադարի խախտման մասին ռուսական կողմը հաղորդել էր նաև անցած շաբաթ․ նախորդ հաղորդագրության մեջ ՌԴ պաշտպանության նախարարությունն արձանագրել էր, որ Ադրբեջանի զինուժն է հարվածային անօդաչու թռչող սարքեր կիրառել Ղարաբաղի Պաշտպանության բանակի դիրքերի ուղղությամբ: «Ռուսական խաղաղապահ առաքելության պատասխանատվության գոտում հնարավոր միջադեպերը կանխելու ուղղությամբ համակարգված աշխատանքներ են տարվում Հայաստանի ու Ադրբեջանի ԶՈւ շտաբերի հետ», նշել է ՌԴ Պաշտպանության նախարարությունը։

Փաշինյանը պետք է մեր հասարակությանը բացատրի, ի՞նչ է թաքնված Ալիևի լկտի հայտարարությունների ու պահանջների ֆոնին՝ պաշտոնական Երևանի կողմից ադրբեջանցիների հետ բանակցելու այդ մղումը: Եթե հրապարակային Ալիևը Հայաստանի իշխանություններից այդքանն է պահանջում, փակ բանակցություններում ի՞նչ են քննարկում, ի՞նչ են ուզում Հայաստանից:

Հայկական կողմը ի՞նչ խոստումներ է տալիս՝ Հայաստանի տարածքների վրա աչք դրած Ալիևին:

Մետաքսյա Շալունց